05/12/2023
हजार सपना...अनि मेरो गितार !
हरसाँझ घिन्ताङ्, घिन्ताङ् मादल घन्किने गुरुङ गाउँमा मेरो बाल्यकाल बित्यो । दसैं, तिहार, रोधी, लाहेर झार्ने, अर्घुम, माघे सङ्क्रान्तिका रातै छिचोल्थ्यो मादलले । त्यसैले होला मादलको ताल मेरो डिएनएसँगै जोडिए झै लाग्छ । र मलाई मादल बजाउन मनपर्छ पनि । सन् १९९६ मा म गाउँबाट सहर पसेँ । कलेज पढ्न पृथ्वीनारायण क्याम्पस झरेँ । 'जोमसोमै बजारमा' गीतले सहर तताइसकेको थियो । नेपथ्य ब्यान्डको यस गीतभित्र एउटा बाजा बज्थ्यो त्यो बाजा मादलजस्तो थिएन । सारङ्गीजस्तो पनि थिएन । सरस्वतीले बोक्ने विणा जस्तै लाग्थ्यो । खासमा त्यो गितार थियो ।
गीतार गुरुङ गाउँमा कहिल्यै बजेन । यो हाम्रो रैथाने लोकबाजा थिएन । यो सजिलै किन्न सकिने बाजा पनि थिएन । लोकसङ्गीत सुनेर हुर्केको मेरो मनमा नेपथ्यका गीतहरू लोकगीत जस्तै हुन्थे तर भित्र त्यै अनौठा बाजा गितारको मेलोडी सुनिन्थ्यो । कहिल्यै नदेखेको बाजा भए पनि मलाई गीतरको कुरुङ् कुरुङ् ...धुन औधी मन पर्थ्यो । तर गीतार सीमित मान्छेले मात्र बोक्थे । म त्यस्तै बुझ्थेँ गितार धनीका विलाशिताको साधन हो । मलाई गीतार सुन्न मन लाग्थ्यो । नजिकबाट छुन मन लाग्थ्यो । किन्न मन लाग्थ्यो तर चाहनाको बोजले थिचिएको रित्तो खल्तीबाहेक मसँग केही थिएन । गीतार किन्न सपना त थियो तर त्यो पूरा नहुने कित्तामा पर्थ्यो ।
म बिस्तारै कलेजका उपल्ला सिढीँमा निस्कँदै गएँ । नेपथ्यका थप गीतहरू निस्कँदै गए । गितार र लोकबाजाको कक्टेल धुन झन् लोकप्रिय हुँदै गयो । नेपथ्यकै 'उडायो रेलैले' गीतमा झन् राम्रो गितार बजेको धुन सुन्दै मैले स्नातक पास गरेँ । त्यति बेलासम्म पनि ममा गितार किन्ने स्वप्निल रहर त थियो तर खल्ती झन् उजाड थियो सहर झर्दा ताकाको भन्दा पनि बढी ।
जब म गीतार किन्ने हैसियतको भएँ ती भर्जिन रहरहरू कतै छुटे । ती सुन्दर चाहना कतै सेलाए । खल्तीमा दाम भए पनि मलाई गितार किन्न मन लागेन । मैले किन नसकेका सबै कुरा छोरीलाई किनिदन्छु भन्ने सोच्दै थिएँ अचानक अचेतनमा एउटा भाव जुर्मुरायो कहिल्यै नफुलेका वनस्पति पनि हरियै छैनन् र ? अधुरा सपनाभित्र पनि सुन्दरता टलक देख्न सकिँदैन र ? फलतः मैले ढिलै भए पनि गीतार किन्ने निधो गरेँ । किनेँ । अचेल गुनगाउछु सम्झिएर ती मुर्झाएका चाहनालाई । गाउँछु सेतीका डिलबाट पल्टिएका हजारौँ आकाङ्क्षाका सारेगम । हरसाँझ म गितारलाई अङ्कमाल गर्दै र चुम्दै भनिरहन्छु "हजार सपनाहरूको माया लागेर आउँछ...।
