08/08/2026
हिमालसँगै जीवन बिताएका लाप्राकका साहसी पुत्र पुर बहादुर (युक्त) गुरुङ अब कहिल्यै फर्केर आउने छैनन्
गोरखा। गोरखा जिल्लाको विकट लाप्राक गाउँमा जन्मिएका पुर बहादुर गुरुङ, जसलाई पर्वतारोहण जगतले प्रेमपूर्वक "युक्त गुरुङ" भनेर चिन्थ्यो, अब यो संसारमा छैनन्। पाकिस्तानको ८,०४७ मिटर अग्लो ब्रड पिक हिमालमा शिखरतर्फ अघि बढिरहेका बेला आएको भीषण हिमपहिरोले उनको जीवन यात्रा सदाका लागि रोकिदियो। उनीसँगै विश्वका अन्य अनुभवी पर्वतारोहीहरू पनि हिमालकै काखमा बिलाए।
सन् १९८८ डिसेम्बर २३ मा गोरखाको लाप्राकमा सामान्य किसान परिवारमा जन्मिएका युक्तले बाल्यकालदेखि नै अभाव, संघर्ष र हिमाली जीवनसँग मित्रता गाँसेका थिए। गाउँको विद्यालयमा कक्षा ८ सम्म अध्ययन गरेपछि देशको द्वन्द्वकालीन परिस्थितिले उनलाई गाउँ छोड्न बाध्य बनायो। मुस्ताङमा होटलमा काम गर्दै सुरु भएको उनको संघर्ष विस्तारै नेपालको पर्यटन र पर्वतारोहण क्षेत्रमा प्रवेश गर्ने बाटो बन्यो।
ट्रेकिङ गाइडबाट यात्रा सुरु गरेका युक्तले अथक मेहनत, अनुशासन र साहसका कारण केही वर्षमै अन्तर्राष्ट्रिय स्तरका उच्च हिमाली गाइडको पहिचान बनाए। हजारौँ विदेशी आरोहीका सपना पूरा गराउन उनले आफ्नो ज्यान नै जोखिममा राखे। हिमाल उनका लागि केवल पेशा थिएन, त्यो उनको जीवन थियो।
उनले सगरमाथा, K2, कञ्चनजङ्घा, मनास्लु, धौलागिरि, अन्नपूर्ण, मकालु, चोयु लगायत विश्वका कठिन हिमालहरू सफलतापूर्वक आरोहण गरे। उनी नेपालका अत्यन्त अनुभवी उच्च हिमाली गाइडमध्ये एक मानिन्थे। सन् २०२३ मा उनले प्रकाश गुरुङसँग मिलेर ६,७५९ मिटर अग्लो खुम्जुङ हिमालको पहिलो सफल आरोहण गर्दै नेपाली पर्वतारोहण इतिहासमा अर्को नयाँ अध्याय थपेका थिए।
तर नियतिले उनको अन्तिम अभियानका लागि ब्रड पिक रोज्यो।
सन् २०२६ जुलाई ३० मा पाकिस्तानको काराकोरम क्षेत्रमा रहेको ब्रड पिक आरोहणका क्रममा क्याम्प–२ र क्याम्प–३ बीच अचानक आएको भीषण हिमपहिरोले अन्तर्राष्ट्रिय टोलीलाई बगायो। मौसम प्रतिकूल भएकाले उद्धार कार्य निकै कठिन बन्यो। केही दिनको खोजीपछि पुर बहादुर (युक्त) गुरुङको शव फेला पर्यो। यस दुर्घटनाले नेपालले,गुरुङ समुदाय ले आफ्नो एक साहसी र अनुभवी पर्वतारोही गुमायो।
युक्तको निधनले लाप्राक गाउँ मात्र होइन, सम्पूर्ण गुरुङ समुदाय ,नेपाली पर्वतारोहण समुदाय शोकमा डुबेको छ। उनी सधैँ मुस्कुराउने, साथीहरूलाई साथ दिने, जोखिममा पनि आत्मविश्वास नहार्ने र हिमाललाई सम्मान गर्ने व्यक्तिका रूपमा सम्झिने गरिन्छ।
आज लाप्राकको त्यो गाउँले एउटा साहसी छोरा गुमाएको छ। नेपाली हिमालहरूले एउटा समर्पित आरोही गुमाएका छन्। संसारका अग्ला शिखरहरूमा नेपालको झण्डा फहराउने सपना बोकेर हिँड्ने युक्त स्वयं भने अन्ततः हिमालकै काखमा सदाका लागि निदाए।
तपाईंको साहस, समर्पण र संघर्षको कथा सधैँ नेपाली पर्वतारोहण इतिहासमा जीवित रहनेछ।
"हिमाल चुम्ने सपना पूरा भयो, तर फर्किने बाटो भने हिमालमै टुङ्गियो।"
तमु संचारकर्मिको समन्वयमा गत जेष्ठ २४ गते गुरुङ पर्यटन व्यावसायि संघ ( जिटिन ) द्वारा सगरमाथा आरोही गुरुङ हरुलाइ सम्मान गरिएको थियो । अगस्ट 7 मा वहाँ को मृत शरीर लाई गुरुङ परमपरा अनुसार स्यम्बुमा बोन लम द्वारा अन्तेस्टी गरिएको थियो । वहाको श्रीमती र १३ वर्षीय छोरा रहेका छन ।
