05/09/2026
काठमाडौँ, २० भदौ : प्रधानमन्त्री वालेन्द्र शाहले बाढी प्रभावित ज्येष्ठ नागरिकलाई आफूहरू एक्लो नरहेको महसुस गर्न आग्रह गर्दै राज्य र सरकार सधैँ उनीहरूको साथमा रहेको बताउनुभएको छ।
सामाजिक सञ्जालमार्फत सन्देश जारी गर्दै प्रधानमन्त्री शाहले भन्नुभएको छ, “तपाईंहरू एक्लो हुनुहुन्न, राज्य तपाईंको साथमा छ, सरकार तपाईंको साथमा छ।”
नुवाकोटको विदुर–१०, बेत्रावतीमा सशस्त्र प्रहरी बल, नेपाल र नेपाल प्रहरीको संयुक्त उद्धार टोलीले ६४ वर्षीया चन्द्रिका श्रेष्ठलाई उद्धार गरेको घटनाले आशा जगाएको उहाँले बताउनुभएको छ। उहाँका अनुसार यसले खोज तथा उद्धारको काम अझै जारी रहेको सन्देश दिएको छ।
प्रधानमन्त्री शाहले चन्द्रिका आमाको उमेर समूह तथा त्यसभन्दा माथिका धेरै ज्येष्ठ नागरिकलाई प्रभावित क्षेत्रबाट उद्धार गरिएको जानकारी दिनुभएको छ। बाढीका बेला कतिपय ज्येष्ठ नागरिकले आफ्ना नातिनातिनालाई च्यापेर ज्यान जोगाउन डाँडातर्फ भाग्नुपरेको र जीवनको उत्तरार्धमा अत्यन्त कठिन परिस्थिति भोग्नुपरेको उहाँले उल्लेख गर्नुभएको छ।
बाढीले घर, खेतबारी, पशुपन्छी र वर्षौँदेखिको दैनिकी मात्र होइन, ज्येष्ठ नागरिकको सामाजिक जीवनसमेत तहसनहस बनाएको प्रधानमन्त्रीको भनाइ छ। उहाँले भन्नुभएको छ, “अहिले न ती घरआँगन छन्, न त चौतारीमा बसेर दुःखसुख साट्ने अवस्था नै छ।” भोटेकोशीको विनाशकारी बाढीले क्षणभरमै धेरै कुरा खोसेर लगेको उहाँले बताउनुभएको छ।
बाढीका क्रममा कतिपयले आफ्नै आँखाअगाडि छोराछोरी र नातिनातिना बगेको देख्नुपरेको तथा कतिपयले जीवनसाथी गुमाएर एक्लिनुपरेको उहाँले उल्लेख गर्नुभएको छ।
सरकारले अस्थायी शिविर तथा होल्डिङ सेन्टरमा ज्येष्ठ नागरिकका लागि राहत, स्वास्थ्य सेवा र आवश्यक सुविधाको व्यवस्था गरेको प्रधानमन्त्रीले बताउनुभएको छ। नुवाकोटको देवीघाट ज्येष्ठ नागरिक संरक्षण तथा अध्ययन प्रतिष्ठान, विदुर भवन क्षतिग्रस्त भएपछि त्यहाँ रहेका सात जनालाई काठमाडौँको म्हैपीस्थित नेपाल सिनियर केयर र १७ जनालाई नुवाकोटको इनारपाटीस्थित कृष्णप्रणामी मन्दिरमा अल्पकालीन आश्रय दिइएको उहाँले जानकारी दिनुभएको छ।
उहाँहरूका लागि ह्वीलचियर तथा वाकर उपलब्ध गराइनुका साथै स्वास्थ्य परीक्षण र मनोसामाजिक परामर्शसमेत निरन्तर सञ्चालन भइरहेको प्रधानमन्त्रीले बताउनुभएको छ।
“अस्थायी बसाइलाई सकेसम्म छोटो बनाइ हजुरहरूलाई हरसम्भव छिटो सुरक्षित बसोबासको व्यवस्था मिलाउने छौँ”, उहाँले भन्नुभएको छ।
बाढी प्रभावित ज्येष्ठ नागरिकको पीडा आफूहरूले हृदयदेखि महसुस गरेको बताउँदै प्रधानमन्त्री शाहले उनीहरूलाई जीवनको कठिन मोडमा कहिल्यै अलपत्र नछाड्ने प्रतिबद्धता जनाउनुभएको छ।
“हजुरहरूले आफूलाई एक्लो नठान्नु होला । जीवनको यो कठिन मोडमा हजुरहरूलाई कहिल्यै अलपत्र छोड्दैनौँ । हजुरहरूसँग यो राज्य छ, यो सरकार छ”, उहाँले भन्नुभएको छ।
ज्येष्ठ नागरिकको घर र जायजेथा बाढीले बगाए पनि उनीहरूको स्वाभिमान, अनुभव र मार्गदर्शनलाई बाढीले बगाउन नसक्ने प्रधानमन्त्रीको भनाइ छ। उहाँले भन्नुभएको छ, “हजुरहरू यो देशका जग र हाम्रा मार्गदर्शक हुनुहुन्छ”, साथै मन दह्रो बनाउन र परिवारकै सदस्य मानेर सल्लाह तथा मार्गदर्शन दिन आग्रह गर्नुभएको छ।
बाढीमा ज्यान गुमाएका ज्येष्ठ नागरिकप्रति प्रधानमन्त्रीले भावपूर्ण श्रद्धाञ्जली व्यक्त गर्नुभएको छ। उनीहरू घरपरिवारका मूल खम्बा, संस्कार र ज्ञानका स्रोत रहेको उहाँले उल्लेख गर्नुभएको छ।
आफन्त गुमाएका नागरिकको आक्रोश स्वाभाविक भएको बताउँदै प्रधानमन्त्रीले भन्नुभएको छ, “एकै क्षणमा आफ्नो संसार गुमाएकाहरूको आक्रोश, आक्रोशभन्दा बढी पीडा व्यक्त गर्ने माध्यम हो”। पीडितको आक्रोशलाई संयमतापूर्वक सुन्नुपर्नेमा जोड दिँदै उहाँले संवेदनशील समयमा पीडितमाथि अनावश्यक टिप्पणी, हियाउने व्यवहार वा थप पीडा दिने प्रयासप्रति सरकार निर्मम हुने चेतावनी दिनुभएको छ।
बाढीपछि खोज तथा उद्धारमा सुरक्षाकर्मी अझै सक्रिय रहेको बताउँदै प्रधानमन्त्रीले दलदल र खण्डहर बनेका क्षेत्रमा उनीहरूले ज्यान जोखिममा राखेर खोजी गरिरहेको उल्लेख गर्नुभएको छ।
“हाम्रा सुरक्षाकर्मीहरू अझै पनि कुनै बहाना नबनाई बाढीपछिको दलदल र खण्डहर बनेका क्षेत्रमा खोस्रिरहेका छन् । उहाँहरूका आँखा चनाखा छन्”, उहाँले भन्नुभएको छ।
ज्यान जोखिममा राखेर उद्धार तथा खोजीमा खटिएका सुरक्षाकर्मीप्रति हरेक दिन हृदयदेखि कृतज्ञता व्यक्त गर्नु र उनीहरूको आत्मबल बढाउनु सबैको कर्तव्य भएको प्रधानमन्त्री शाहले बताउनुभएको छ।
