13/05/2026
सरकारले संघीय मन्त्रालयहरूको संरचनामा ठूलो पुनर्संरचना गर्दै मन्त्रालयको संख्या घटाउने निर्णय गरेको छ। बुधबार बसेको मन्त्रिपरिषद् बैठकले कार्यविभाजन नियमावली २०८३ स्वीकृत गर्दै मन्त्रालय संख्या घटाउने औपचारिक बाटो खुलाएको हो।
नयाँ व्यवस्थाअनुसार अब प्रधानमन्त्री तथा मन्त्रिपरिषद् कार्यालयसहित मन्त्रालयहरूको संख्या १७ वटा मात्र रहनेछ। यसअघि २२ वटा मन्त्रालय रहेकोमा सरकारले गाभ्ने र खारेज गर्ने निर्णयमार्फत संरचना सानो बनाएको हो।
सरकारी योजनाअनुसार युवा तथा खेलकुद, खानेपानी तथा सरसफाइ, शहरी विकास र संघीय मामिला तथा सामान्य प्रशासन मन्त्रालयलाई पुनर्संरचना गर्दै विभिन्न मन्त्रालयहरूमा गाभ्ने तयारी गरिएको छ।
खेलकुद क्षेत्रलाई शिक्षा मन्त्रालयसँग एकीकृत गरी “शिक्षा तथा खेलकुद मन्त्रालय” बनाइनेछ। त्यस्तै, युवासम्बन्धी जिम्मेवारीलाई महिला, बालबालिका तथा ज्येष्ठ नागरिक मन्त्रालयसँग तथा स्वास्थ्य र सामाजिक सुरक्षा क्षेत्रसँग समेटेर “लैंगिक समानता तथा सामाजिक विकास मन्त्रालय” गठन गर्ने तयारी छ।
खानेपानी तथा सरसफाइ मन्त्रालयको सरसफाइ पक्षलाई स्वास्थ्य मन्त्रालयमा गाभिने र खानेपानी तथा शहरी विकासलाई भौतिक पूर्वाधार मन्त्रालयमा एकीकृत गरी “एकीकृत भौतिक पूर्वाधार मन्त्रालय” बनाइने प्रस्ताव पनि अघि बढाइएको छ।
सरकारको यो निर्णयले प्रशासनिक खर्च घटाउने र संरचनालाई अझ चुस्त तथा प्रभावकारी बनाउने अपेक्षा गरिएको छ।
