12/10/2026
मध्यविन्दुमा विपद् व्यवस्थापन समिति बैठक तथा स्वयंसेवक ब्युरो गठनसम्बन्धी मस्यौदामाथि छलफल
मध्यविन्दु, असोज २६। मध्यविन्दु नगरपालिकामा नगरस्तरीय विपद् व्यवस्थापन समितिको बैठक एवं स्वयंसेवक ब्युरो गठन तथा परिचालन कार्यविधिको मस्यौदामाथि छलफल कार्यक्रम सम्पन्न भएको छ।
नगर प्रमुख भिमलाल अधिकारीको अध्यक्षतामा सम्पन्न बैठकमा विभिन्न समयमा आएका बाढी तथा अन्य विपद्को व्यवस्थापन, खोज तथा उद्धार, राहत वितरण, नदी कटान नियन्त्रण र विपद् जोखिम न्यूनीकरणलगायत विषयमा छलफल गरिएको थियो।
बैठकमा प्रमुख प्रशासकीय अधिकृत गोकर्ण पन्थी, विभिन्न राजनीतिक दलका प्रतिनिधि, उद्योग वाणिज्य संघ, रेडक्रस नेपाल, मध्यविन्दु नगर प्रहरी, तमसरीया प्रहरी चौकी, आरुंगखोला प्रहरी चौकी, कोल्हुवा प्रहरी चौकी तथा सशस्त्र प्रहरी बल, नेपालका चोरमरा बेस क्याम्पका प्रतिनिधिहरूको उपस्थिति रहेको थियो। बैठकको सञ्चालन राजस्व शाखा प्रमुख प्रेमबहादुर सारुले गर्नुभएको थियो।
मध्यविन्दु नगरपालिका, नेपाल रेडक्रस सोसाइटी र स्विस रेडक्रसको सहकार्यमा सहरी पूर्वतयारी तथा वातावरणीय उत्थानशीलता प्राविधिक परियोजनाअन्तर्गत कार्यक्रम आयोजना गरिएको हो।
