06/08/2026
विश्व स्तनपान सप्ताहको अवसरमा सुक्रौलीमा जनचेतनामूलक कार्यक्रम सम्पन्न ।
लुम्बिनी, श्रावण २१, २०८३।
लुम्बिनी सांस्कृतिक नगरपालिका शहरी स्वास्थ्य केन्द्र, सुक्रौलीको आयोजनामा विश्व स्तनपान सप्ताह (साउन १६–२२, २०८३) को अवसरमा "दिगो जीवनको स्वस्थ सुरुवात, प्रभावकारी स्तनपानका लागि सबैको साथ" भन्ने मूल नारासहित लुम्बिनी सांस्कृतिक नगरपालिका वडा नं. १३, सुक्रौलीमा जनचेतनामूलक कार्यक्रम सम्पन्न गरिएको छ।
कार्यक्रममा शहरी स्वास्थ्य केन्द्र सुक्रौलीका सि.हे.व. अनिल बरई, अ.न.मी. सम्झना काउचा तथा का.सा. अवनिश हरिजन को सक्रिय सहभागिता रहेको थियो। साथै सेतो गुराँस बाल विकास सेवा, रूपन्देही का प्रशिक्षक सिम्पु श्रीवास्तव ले प्रभावकारी स्तनपान, आमा तथा शिशुको पोषण र स्वास्थ्यसम्बन्धी सहजीकरण गर्नुभएको थियो।
कार्यक्रमलाई सम्बोधन गर्दै सि.हे.व. अनिल बरई ले स्तनपान शिशुको पहिलो र सबैभन्दा महत्वपूर्ण पोषण भएको उल्लेख गर्दै जन्मेको एक घण्टाभित्र स्तनपान सुरु गर्न तथा पहिलो ६ महिनासम्म आमाको दूध मात्र खुवाउन आग्रह गर्नुभयो। उहाँले "दिगो जीवनको स्वस्थ सुरुवात, प्रभावकारी स्तनपानका लागि सबैको साथ" भन्ने मूल नारालाई सफल बनाउन परिवार, समुदाय, स्वास्थ्यकर्मी र सबै सरोकारवालाको साझा भूमिका आवश्यक रहेको बताउनुभयो।
उक्त कार्यक्रममा लुम्बिनी सांस्कृतिक नगरपालिका वडा नं. १३ का गर्भवती महिला, महिला स्वास्थ्य स्वयंसेविका तथा अन्य सरोकारवालासहित ४५ जनाको सहभागिता रहेको थियो। कार्यक्रमले प्रभावकारी स्तनपानसम्बन्धी जनचेतना अभिवृद्धि गर्न महत्वपूर्ण योगदान पुर्याएको आयोजकले जनाएको छ।
