02/03/2025
नवनिर्वाचित कार्यसमितिका पदाधिकारीलाई प्रमाणपत्र वितरण र पदभार हस्तान्तरण तथा निवर्तमान अध्यक्षको जन्मोउत्सव मनाइयो
नेपालगञ्ज १७ फागुन, अवधी पत्रकार संघ नेपाल बाँके शाखाका नवनिर्वाचित कार्यसमितिलाई प्रमाणपत्र वितरण गर्नुका साथै पदभार हस्तान्तरण गरिएको छ ।
कार्यक्रमका प्रमुख अतिथी प्रतिनिधी सभा सदस्य लक्ष्मी तिवारीले अवधी भाषा, संस्कृतिकलाई संरक्षण, सम्बर्धन गर्न र संस्थागत विकासका लागि सहयोग गर्ने बताउनुभयो । उहाँले अवधी भाषी महिला पत्रकारहरुको सहभागिता बढाउनका लागि अवधी पत्रकार संघको भुमिका बढाउनुपर्नेमा जोड दिदै अवधी समुदायका महिलाहरुको शसक्तिकरण गर्नुपर्ने बताउनुभयो ।
पत्रकारिता क्षेत्रमा समाबेशीतालाई विशेष प्राथमिकता दिनुभपर्नुे भन्दै सांसद तिवारीले हरेक निकायमा महिलालाई अवसर प्रदान गरि सहभागिता गराउनुपर्नेमा जोड दिनुभयो ।
अवधी पत्रकार संघ नेपालका केन्द्रीय अध्यक्ष राकेशकुमार मिश्रले देशभरका अवधी भाषी पत्रकारहरुको क्षमता अभिबृद्धि गरि दक्ष बनाउने र मुस्लिम महिला पत्रकारहरुको सहभागिता बृद्धि गर्ने बताउनुभयो । उहाँले अवधी भाषाको विकासका लागि पत्रकारिता पेशालाई अझ शसक्त बनाउनुपर्नेमा जोड दिदै लोप हुन लागेको अवधी कला संस्कृतिको संरक्षणका लागि विशेष पहल आवश्यक रहेको बताउनुभयो ।
कार्यक्रममा निर्वाचन समिति संयोजक लियाकत अली, सदस्यद्धय सुर्यलाल यादव र मोहम्मद आरिफ अन्सारीलगायताले नवनिर्वाचित कार्यसमितिलाई प्रमाणपत्र वितरण गर्नुभएको थियो ।
त्यस अवसरमा अवधी पत्रकार संघ नेपाल बाँके शाखाका निवर्तमान अध्यक्ष प्रल्लाद विश्वकर्माले निर्णय पुस्तिका (माइन्युट बुक) लगायत कागजातहरू नवनिर्वाचित अध्यक्ष समिर अलीलाई हस्तान्तरण गर्नुभएको थियो । कार्यक्रममा नेपाल जडीबुटी व्यवसायी सङ्घ बाँकेका अध्यक्ष टंकप्रसाद शर्मा लगायतले बोल्नुभएको थियो ।
गत शनिबार बाँकेको डुडुवा गाउँपालिका–५ पशुपति पिकनिक पार्कमा आयोजित अवधी पत्रकार संघ नेपाल बाँकेको पाँचौ जिल्ला अधिबेशनले समिर अलीको नेतृत्वमा ९ सदस्यीय कार्यसमिति सर्बसम्मत रुपमा चयन गरेको थियो ।
आज (फागुन १७ गते) संघ बाँकेका निवर्तमान अध्यक्ष प्रहलाद विश्वकर्माको जन्मदिन परेकोले केक काटेर जन्मोउत्सव समेत मनाइएको थियो ।
