26/10/2025
पाँचथरमा बुबाबाट छोराको गोली हानी हत्या
पाँचथर, कार्तिक ९ - पाँचथर जिल्लाको मिक्लाजुङ गाउँपालिका–८ दुर्दिम्बामा आइतबार बुबाले आफ्नै छोराको गोली हानी हत्या गरेका छन्।
जिल्ला प्रहरी कार्यालय पाँचथरका अनुसार स्थानीय विजय सिङ्घकले आइतबार दिउँसो करिब ३ बजे आफ्ना १७ वर्षीय छोरा सफल सिङ्घकलाई भरुवा बन्दुक प्रयोग गरी गोली प्रहार गरेका हुन्। घटनास्थलमै छोराको मृत्यु भएको प्रहरीले जनाएको छ।
प्रहरीका प्रारम्भिक अनुसन्धान अनुसार विजय सिङ्घक दीर्घकालीन मदिरा सेवन गर्ने बानीका कारण परिवारमा प्रायः विवाद हुने गर्थ्यो। आइतबार पनि सोही कारणले घरायसी विषयमा विवाद भएको र त्यसै क्रममा उनले छोरामाथि गोली चलाएको अनुमान गरिएको छ।
स्थानीयवासी गणेश वाजीका अनुसार विजय सिङ्घक अत्यधिक मदिरा सेवन गर्ने बानीका कारण पारिवारिक झगडा नियमितजस्तै हुने गरेको थियो। उनले उक्त घटनापछि गाउँमा त्रास फैलिएको बताए।
जिल्ला प्रहरी कार्यालय पाँचथरका निमित्त प्रमुख रुपेश तामाङका अनुसार घटनापछि प्रहरी टोलीले आरोपी बुबालाई नियन्त्रणमा लिएको छ। घटनाबारे थप अनुसन्धान जारी रहेको उनले जानकारी दिएका छन्।
