18/08/2026
पोखराको विजयपुर खोला तर्ने क्रममा शनिबार बेपत्ता भएका दुई बालकमध्ये १४ वर्षीय निक्सन गुरुङको शव चार दिनपछि भेटिएको छ।
पोखरा–१४ छिनेडाँडाका गुरुङको शव मंगलबार दिउँसो घटनास्थलबाट करिब १.५ किलोमिटर तल गोरखा भिलेज पछाडि भत्किएको पर्खालको रडमा अड्किएको अवस्थामा फेला परेको हो।
सशस्त्र प्रहरी बल नेपाल नं. २४ गण कालिकाबाट प्रहरी निरीक्षक साजन श्रेष्ठको नेतृत्वमा तीन गोताखोरसहित ११ जनाको टोलीले खोजी गरेको थियो। रोप रेस्क्यु विधिबाट करिब ६०–७० मिटर गहिरो खोँचमा पुगेर खोजी गर्ने क्रममा शव फेला परेको प्रहरीले जनाएको छ। एक्स्काभेटरको सहायताले दिउँसो २ः२६ बजे शव पानीबाट बाहिर निकालिएको हो।
आफन्तले शवको पहिचान गरेका छन्।
विजयपुर खोलामा बेपत्ता भएका १५ वर्षीय ओमन राईको खोजी भने जारी रहेको जिल्ला प्रहरी कार्यालय कास्कीका प्रवक्ता वीरेन्द्रकुमार पासवानले जानकारी दिएका छन्।
