25/05/2025
"जीवनलाई सरल र सुखमय बनाउने रहस्य पैसामा होइन, दिनचर्यामा लुकेको छ।"
धनी हुनु जरुरी छैन, तर सन्तुलित दिनचर्या अपनायौं भने,
गरिब भएर पनि राजाको जस्तो जीवन बाँच्न सकिन्छ।
बिहानको सुरु – शान्ति र आभारको साथ
– दिनको पहिलो घडी उठ्नेबित्तिकै मोबाइल हेर्ने होइन,
– आँखा बन्द गरेर भगवानलाई धन्यवाद दिने –
"म फेरि एक दिन बाँच्न पाएको छु" भनेर।
– सानो ध्यान वा प्रार्थना – केवल ५ मिनेट मौन भएर आफूलाई सम्झने।
– एक गिलास मनतातो पानी वा जिरा-ज्वानो-बेसारको झोल – शरीरलाई ताजगी दिने।
– अनि थोरै समय शारीरिक व्यायाम वा सामान्य चलहपहल।
यति गरेपछि मात्र दिन सुरु गर्नुहोस्, तपाईंको अनुहार आफैं चम्किन्छ।
दिनको मध्यान्ह – कर्म, धैर्यता र सन्तुलनको साथ
– जति सकिन्छ इमानदारीले काम गर्नुहोस्,
– हाँस्दै बोल्नुहोस्, गार्हो भए पनि गुनासो नगर्नुहोस्।
– बीचमा केही समय आफ्नो लागि राख्नुहोस् – केही सकारात्मक पढ्ने, लेख्ने, सोच्ने।
– कहिल्यै पनि अरूको तुलना नगर्ने –
"ऊसँग गाडी छ, मसँग पाइला छ – मैले आकाश हेर्न सक्छु।"
यस्तो सोच राख्ने।
– बेलुकीतिर काम सकिँदै जाँदा धन्यवाद दिन सिक्नुहोस् –
"आजको दिन पनि बित्यो, केही सिकेँ, केही सहेँ, अझ बलियो भएँ।"
साँझको समय – परिवार र आत्मासँगको संवाद
– मोबाइल भन्दा आफ्ना नजिकका मान्छेहरूलाई समय दिनुहोस्।
– श्रीमती, श्रीमान, छोराछोरी, बा-आमासँग १०–१५ मिनेट खुलेर कुरा गर्नुहोस्।
– गुनासो भन्दा पनि “तिमीलाई सम्झेँ” भन्ने शब्द प्रयोग गर्नुहोस्।
– बिहान बनाएको योजना पूरा भएको छ कि छैन हेर्नुहोस् – आत्ममूल्याङ्कन गर्नुहोस्।
– एक कप चिया, शान्त संगीत वा पुरानो सम्झनाको किताब –
साँझलाई चुपचाप सुन्दर बनाउनुहोस्।
रातको अन्त्य – आत्मशुद्धि र आभारको साथ
– सुत्नुअघि फोन होइन, मन हेर्नुहोस्।
– आज कोहीलाई दुःखी त बनाइनँ?
– आफूलाई क्षमा गर्नुहोस् र अरूलाई पनि मनमनै क्षमा गर्नुहोस्।
– अनि आफूलाई भन्नुहोस् –
"सबै कुरा ठीक छ, म राम्रो छु, भोलि अझ राम्रो हुनेछ।"
– सुत्नुअघि भगवानलाई धन्यवाद दिनुहोस् –
"आजको जीवनका लागि आभार छ।"
यस्तो जीवन शैली अपनायौं भने –
धन नभए पनि मनमा सम्पत्ति हुनेछ,
प्रसन्नता बेचिने चिज होइन –
यसलाई बनाउने कला हो, त्यो तपाईंको आफ्नै अनुशासन र सोचमा लुकेको छ।
"धनी हुनु गर्व होइन, शान्त हुनु गौरव हो।"
आउनुहोस्, सादा तर सन्तुलित जीवन सुरु गरौं –
जहाँ बिहान आभारले सुरु हुन्छ, दिन कर्मले भरिन्छ, साँझ माया बाँडिन्छ, र राति आत्मशान्तिमा बगिन्छ।
