05/09/2026
नेपालमा बाढीपछि जलविद्युत् आयोजनाका सुरुङमा फसेका दुई कामदारको जीवित उद्धारलाई अन्तर्राष्ट्रिय सुरुङ उद्धार विज्ञ अर्नोल्ड डिक्सले असाधारण उपलब्धि भनेका छन्।
नेपालको उद्धार अभियानमा सिड्नीबाट टाढै रहेर मार्गदर्शन गरिरहेका डिक्सले दुई कामदारलाई जीवितै बाहिर निकालिनु उद्धार टोलीका लागि ठूलो सफलता भएको बताएका छन्।
उनका अनुसार बहुवटा जलविद्युत् आयोजना ध्वस्त भएपछि एकैपटक विभिन्न सुरुङमा उद्धार अभियान सञ्चालन गरिएको घटना विश्वमै अभूतपूर्व रहेको छ। उनले यस घटनाले सुरुङ उद्धारसम्बन्धी स्थापित मान्यतासमेत बदल्ने बताएका छन्।
भोटेकोशी नदीमा आएको विनाशकारी बाढीपछि त्रिशूली–३ ‘ए’ जलविद्युत् आयोजनाको सुरुङ अवरुद्ध भएको थियो। सुरुङभित्र फसेका कामदारको खोजीका क्रममा उद्धार टोलीले ढुंगा, लेदो र अन्य अवरोध हटाउँदै अघि बढेको थियो।
उद्धारका क्रममा सफा हावा सुरुङभित्र पुर्याउन पाइप राख्ने तथा एक्स्काभेटर प्रयोग गरेर ठूलो परिमाणमा भग्नावशेष हटाउने काम गरिएको थियो।
डिक्सका अनुसार बाढी आउँदा कामदारहरू सुरुङभित्र माथितिर भागेका हुनसक्छन्। पानी, ढुंगा, माटो र लेदोको तीव्र बहावबाट बच्न उनीहरू सुरुङको माथिल्लो भागतर्फ पुगेको र त्यसपछि ढुंगा तथा भग्नावशेषले सुरुङको बाटो बन्द गरेको हुनसक्ने उनको विश्लेषण छ।
