14/07/2025
दोमुखा पर्यटक गन्तव्यमा विदेशी आकर्षण बढ्दो
राजकुमार ओली, दोमुखा
प्राकृतिक सुन्दरताले भरिपूर्ण झापाको शिवसताक्षी नगरपालिका–१० मा अवस्थित दोमुखा क्षेत्र आन्तरिक पर्यटनको प्रमुख गन्तव्य बन्दै आएको छ । पछिल्लो समय यहाँ स्तरीय सेवा र सुरक्षित वातावरणसहितका होटल तथा होमस्टे सञ्चालनमा आएपछि विदेशी पर्यटकको आकर्षणसमेत बढ्न थालेको छ ।
नेपालकै पूर्वी तराईमा पर्ने यो क्षेत्र माई नदीको छङछङ बग्ने पानी, झुलुङ्गे पुल, हरियालीले ढाकिएको वन क्षेत्र र शान्त वातावरणका कारण यात्रुहरुलाई लोभ्याउने प्रमुख कारण बनेको छ । यहाँ विशेषगरी सप्ताहान्तमा झापा, इलाम, मोरङ, सुनसरी लगायतका जिल्लाबाट आउने आन्तरिक पर्यटकको घुइँचो लाग्ने गर्दछ ।
दुमुखा क्षेत्रको पर्यटन प्रवर्द्धनमा सक्रिय होटल व्यवसायी सङ्घ शिवसताक्षीका अध्यक्ष किरण ओलीका अनुसार अहिले यहाँ युरोप र अमेरिका लगायत विभिन्न देशका पर्यटकहरु पनि आउन थालेका छन् । उनले भने, “पहिले आन्तरिक पर्यटक मात्रै आउँथे, अहिले भने केही विदेशी पाहुना पनि यहाँको शान्ति र सौन्दर्यमा रमाउन आउने गरेका छन् ।”
दोमुखा आसपासका क्षेत्रमा सुन्दर झरना, हरित वनजङ्गल, चिडीच्याहा आवाजले भरिएको प्रकृति र सुरम्य माई नदी पर्यटकका लागि रमणीय गन्तव्य बनेको छ । साथै, स्थानियको आतिथ्यता र मौलिक परिकारले समेत पाहुनालाई आकर्षित गर्ने गरेको व्यवसायीहरुको भनाइ छ ।
शिवसताक्षी नगरपालिकाले पनि दुमुखालाई व्यवस्थित पर्यटन गन्तव्यका रूपमा विकास गर्ने योजनासहित पूर्वाधार विस्तारमा जोड दिएको छ । स्थानीय स्तरमा पदमार्ग निर्माण, सार्वजनिक शौचालय, संकेत चिह्न र फोहर व्यवस्थापनका काम सुरु गरिएको वडा कार्यालयले जनाएको छ ।
दोमुखाको समग्र पर्यटन विकासका लागि राज्य, निजी क्षेत्र र स्थानीयवासीको संयुक्त पहल आवश्यक रहेको व्यवसायीहरुको जोड छ । उचित प्रचार–प्रसार, पूर्वाधार विस्तार र सांस्कृतिक कार्यक्रममार्फत यो क्षेत्र निकट भविष्यमा अझै बढी पर्यटक भित्र्याउन सक्ने सम्भावना रहेको पर्यटन विज्ञहरु बताउँछन् ।
