08/06/2026
"रोस्ट्रम घेराउ अमर्यादित, संसदलाई नाराबाजीको थलो नबनाऔँ"
- सांसद सुहाङ नेम्वाङ
झापा बिर्तामोड , सुहाङ नेम्बाङ ले संसदको रोस्ट्रम घेराउ र नाराबाजीलाई अमर्यादित अभ्यास भन्दै जनताका मुद्दामा केन्द्रित हुनुपर्ने बताएका छन्।
उनले विरोधका लागि आफू आफ्नो स्थानमा उभिन तयार रहे पनि रोस्ट्रममा पुगेर घेराउ र नाराबाजी गर्ने पक्षमा नरहेको स्पष्ट पारे। "म विरोधका लागि आफ्नो स्थानमा उभिन तयार छु, तर घेराउ र नाराबाजीका लागि रोस्ट्रममा जाँदिनँ। रोस्ट्रम घेर्नु अमर्यादित कुरा हो," उनले भने।
सांसद नेम्वाङले अहिले बजेट तथा जनजीविकासँग जोडिएका विषयमा गम्भीर बहस हुनुपर्ने बेला संसदको बहुमूल्य समय रोस्ट्रम घेराउमा खर्च गर्नु उपयुक्त नहुने धारणा राखे। उनले प्रतिपक्षले रचनात्मक भूमिका निर्वाह गर्नुपर्नेमा जोड दिँदै भने, "अहिले बजेटदेखि जनताका मुद्दामा केन्द्रित हुनुपर्ने बेला रोस्ट्रम घेराउमा समय नफालौं, बरु रचनात्मक प्रतिपक्षी बनौं।"
"संसद सुशासनको मन्दिर हो र मन्दिरजस्तो पवित्र स्थलमा नाराबाजी गर्नु सुहाउँदैन। जनताले हामीलाई रोस्ट्रम घेराउ गर्न होइन, उनीहरूका समस्या समाधान गर्न निर्वाचित गरेका हुन्," उनले उल्लेख गरे।
उनको भनाइले संसदमा बढ्दो अवरोध र विरोधका शैलीमाथि पुनः बहस सुरु गराएको छ। राजनीतिक दलहरूले असहमति जनाउने लोकतान्त्रिक अधिकार प्रयोग गर्दा पनि संसदीय मर्यादा र संस्थागत गरिमालाई प्राथमिकता दिनुपर्ने आवाज बलियो बन्दै गएको छ।
