01/11/2025
आगजनीपछिको मर्मत कार्यमा अनियमितता आराेप
स्थानीय युवाहरुले गरे राेकथाम
इनरुवा । जेन जी आन्दोलनकाे क्रममा आगजनीमा परेकाे भाेक्राहा नरसिंह गाउँपालिकाकाे प्रशासनीक भवन पुनः सञ्चालनमा ल्याउने क्रममा अनियमितता भएको आराेप लागेको छ ।
आगजनीपछि मर्मत तथा रंगराेगन, ढोका–झ्याल, अलमुनियम क्याबिन निर्माणलगायतका काम गाउँपालिकाले सुरु गरेपछि स्थानीय युवाहरूले साे कार्यमा आपत्ति जनाएका छन् ।
युवाहरूका अनुसार गाउँपालिकाले करिब ६० लाख रुपैयाँ बराबरकाे मर्मत कार्यलाई टुक्रा टुक्रा पारेर १०–१० लाखकाे दरले आफ्ना नजिकका व्यक्तिहरूलाई काेटेसनमार्फत् दिइएकाे आराेप छ ।
सूचनापत्र, टेन्डर वा काेटेसन प्रकृया सार्वजनिक नगरी नजिकका व्यक्तिहरूलाई काम बाँडिएको आराेपमा स्थानीय युवाहरूले कार्यस्थलमै पुगेर साे काम स्थगित गर्न माग गरेका थिए ।
उनीहरूकाे भनाइमा“गाउँपालिकाले कसरी, कुन प्रक्रियाबाट, कति रकममा र कसलाई काम दिएको भन्ने कुरा सार्वजनिक गरिएको छैन। पारदर्शिता नहुने काममा हामी मौन बस्दैनौं।”
यस घटनापछि गाउँपालिकाको निकट मानिएका केही व्यक्तिहरूले विरोध गर्ने युवामाथि राजनीतिक प्रतिशोधका बहानामा फसाउने प्रयास गरिरहेको युवाहरूकाे दाबी छ ।गाउँपालिकामा भैरहेकाे निर्माण कार्यकाे तस्बिर,भिडियो लिनका लागि गाउँपालिका भित्र प्रवेश गर्दा सुरक्षा गार्डले राेकेकाे स्थानीय सञ्चारकर्मी तजमुल हुसेनले जानकारी दिए ।
यस विषयमा गाउँपालिकाकाे तर्फबाट भने आधिकारिक प्रतिक्रिया आउन बाँकी छ, गा.पा अध्यक्षसंग यश बिषयमा प्रतिक्रिया लिनका लागि फाेन सम्पर्क गर्दा उनिसंग फाेन सम्पर्क सफल हुन सकेन ।
