29/08/2026
हिजोआजका केही दृश्य : हामी साँच्चै कहाँ जाँदैछौँ?
हिजोआज सुर्खेतका सडक, चोक र गल्लीहरूमा देखिने केही दृश्यले मनमा गहिरो प्रश्न उठाउँछन्। हातमा चुरोट, रक्सीको बोतल अनि उमेरभन्दा धेरै अगाडि पुगेको जीवनशैली…। यो प्रश्न केवल छोरा वा छोरीको होइन, हाम्रो परिवार, हाम्रो समाज र हाम्रो अभिभावकत्वको प्रश्न हो। छोरालाई स्वतन्त्रता दिँदा गर्व गर्ने हामी, छोरीलाई स्वतन्त्रता दिँदा पनि त्यत्तिकै गर्व गर्छौँ, गर्नैपर्छ। तर स्वतन्त्रता अधिकार मात्र होइन, जिम्मेवारी पनि हो। समान अधिकारको अर्थ गलत बाटोमा हिँड्ने छुट होइन; सही निर्णय गर्ने अवसर र त्यसको परिणाम बुझ्ने जिम्मेवारी हो।
आज समस्या केटा वा केटी को धेरै भन्ने होइन। समस्या त कुलतलाई सामान्य ठान्न थाल्नु हो।
न परिवारको डर, न आफन्तको संकोच, न समाजप्रतिको जिम्मेवारी। घरबाट विभिन्न बहाना बनाएर निस्कने र घरबाहिर पुगेपछि आफूखुसी गर्ने प्रवृत्ति बढ्दै जाँदा हामी अभिभावकहरू पनि समयमै सचेत हुन आवश्यक छ। आफ्ना छोराछोरी घरबाट निस्कँदा सोधौँ, " कहाँ जाँदैछौ?, कोसँग जाँदैछौ?, किन जाँदैछौ?, कति बेला फर्किन्छौ?, र म पनि जान्छु .....
यी प्रश्न अविश्वासका होइनन्, मायाका प्रश्न हुन्। सन्तानलाई विश्वास गरौँ, तर आँखै चिम्लेर होइन। उनीहरूको संगत बुझौँ, दिनचर्या बुझौँ, मनको कुरा सुनौँ। किनकि ठूलो दुर्घटना धेरैपटक सानो बेवास्ताबाट सुरु हुन्छ। चुरोट र रक्सीलाई “केही हुँदैन” भनेर सामान्य नठानौँ। धेरै गलत बाटोहरू सामान्य देखिने सानो सुरुवातबाटै सुरु हुन्छन्। आजको एउटा गलत संगतले भोलिको एउटा सुन्दर भविष्य खोस्न सक्छ। कुलतले उमेर हेर्दैन, लिङ्ग हेर्दैन, परिवारको अवस्था हेर्दैन। अवसर पाएपछि यसले सपना, स्वास्थ्य, सम्बन्ध र भविष्य सबै खोस्न सक्छ।
