22/04/2025
ठोरीमा स्काई भ्यू टावरको उद्घाटन, पर्यटन प्रवर्द्धनमा नयाँ आशा
********************************************
l
ठोरी निर्मल मध्यवर्ती उपभोक्ता समितिको अध्यक्ष श्री बालकुमार बस्नेतको सभापतित्वमा स्काई भ्यू टावरको औपचारिक उद्घाटन प्रमुख अतिथि ठोरी गाउँपालिका अध्यक्ष श्री लालबहादुर श्रेष्ठले गर्नुभयो । टावरको निर्माण कार्य निर्मल–ठोरी मध्यवर्ती उपभोक्ता समितिले अधुरो अवस्थामा रहेको संरचनालाई पुनः निर्माण गरी सम्पन्न गरेको हो ।
यो स्काई भ्यू टावरबाट ठोरी क्षेत्रको सम्पूर्ण दृश्य एकै स्थानबाट अवलोकन गर्न सकिन्छ, भने मौसम सफा रहेमा नेपालको प्रमुख हिमालहरू समेत देख्न सकिने महत्वपुर्ण भएको समितिको दावी रहेको छ ।
उद्घाटन समारोहमा बोल्दै ठोरी गाउँपालिका अध्यक्ष श्री लाल बहादुर श्रेष्ठले गोलेडाँडा क्षेत्रमा विद्युत्, खानेपानी तथा पूर्वाधार विकासमा गाउँपालिकाको विशेष प्राथमिकता रहने प्रतिबद्धता व्यक्त गर्नुभयो । उहाँले यस क्षेत्रको विकासका लागि मधेस प्रदेशसँग पनि छलफल भइरहेको जानकारी गराउनुभयो ।
सोही अवसरमा नेपाली कांग्रेस ठोरीका सभापति श्री सन्तोष श्रेष्ठले ठोरी प्राकृतिक तथा ऐतिहासिक कारणले पर्यटनको प्रचुर सम्भावना बोकेको क्षेत्र भएको बताउँदै, वेलायतका राजा जर्ज पञ्चले सन् १९११ मा शिकार खेलेको ऐतिहासिक भूमि भएकाले यस क्षेत्रको पुरातात्विक महत्वलाई थप अध्ययन–अनुसन्धान गरी नेपाल र भारत मात्र होइन, बेलायती पर्यटक समेत आकर्षित हुने वातावरण बनाउनु पर्नेमा जोड दिनुभयो ।
नेकपा (एमाले) ठोरीका अध्यक्ष श्री खगेन्द्र श्रेष्ठले स्काई भ्यू टावरले ठोरीको पहिचान तथा पर्यटन प्रवर्द्धनमा महत्वपूर्ण योगदान पुर्याउने विश्वास व्यक्त गर्नुभयो । साथै, टावर निर्माणमा योगदान गर्ने सबैलाई धन्यवाद दिनुभयो । त्यस्तै, नेकपा (माओवादी केन्द्र) का प्रतिनिधि श्री शुसिल अधिकारीले टावर सञ्चालनको शुभकामना व्यक्त गर्दै, मध्यवर्ती कार्यक्रमप्रति फरक मत राख्दै टावरको क्षमतामा स्पष्टता ल्याउनुपर्ने धारणा राख्नुभयो ।
कार्यक्रमको समापन गर्दै उद्घाटन समारोहका सभापति श्री बालकुमार बस्नेतले अधुरो अवस्थामा रहेको टावर निर्माण सम्पन्न गर्न झण्डै ११ लाख रुपैयाँ खर्च भएको जानकारी दिनुभयो । उहाँले टावरलाई अलि मोडिफाइ गरी सिसाको प्रयोग गरिएको हुँदा पर्यटनमा अझ आकर्षण थपिने विचार व्यक्त गर्नुभयो । साथै, विगतमा टावर निर्माणमा सहयोग गर्ने सबैलाई धन्यवाद दिँदै, ठोरीको पर्यटन क्षेत्रमा एउटा इँटा थप्न सकेकोमा समितिले गौरव महसुस गरेको बताउनुभयो । उद्घाटन समारोहमा स्वागत भाषण समितिका तर्फबाट श्री यादव राज कुवरले गर्नुभएको थियो
श्रोत: रेडियो बिजयबस्ति
