24/07/2025
सरकार लुटेरा जस्तो होइन, अभिभावक जस्तो बनोस ! टिकापुर नगरपालिकाले लगाएको वार्षिक ७२ हजार करले ढाड भाँचिएका ४० जना फोटोग्राफर युवाहरूका पक्षमा ......
टीकापुर नगरपालिकाको मातहतमा रहेको टीकापुर पार्कमा एक वर्षदेखि करिब ४० जना १८ देखि २५ वर्षसम्मकाे उमेर समूहका युवाहरू फोटोग्राफर पेशामा संलग्न छन्।
उनीहरूका अनुसार उनीहरू दैनिक ५०० देखि १००० सम्म कमाउँदै आएका छन् ।
टीकापुर नगरपालिकालाई उनले गतवर्ष मासिक ३०००का दरले प्रति व्यक्ति कर तिर्दै आएका थिए।
टीकापुर नगरकार्यपालिकाले गत वर्ष नै फोटोग्राफरलाई टेन्डरमा लैजाने निर्णय गर्यो।
खप्तड खबर लगायत सबै मिडिया नागरिक समाजको आवाज विरुद्धमा जान थालेपछि नगरपालिका फोटोग्राफर पेशालाई टेन्डरमा लैजाने निर्णय कार्यान्वयनबाट पछाडि हट्यो।
तर यस वर्ष फेरि मासिक ३००० राजस्व तिर्दै आएका उनीहरु लाई मासिक ६०००का दरले राजस्व बढाउने निर्णय टिकापुर नगरपालिकाले निर्णय गरेको भन्दै उनीहरु आन्दोलनमा उत्रिएका छन्।
अहिलेको प्रमुख समस्या भनेको युवाहरू नेपालमा रोक्न नसक्नु नै हो।
यसका लागि सरकारले स्टार्ट अफ योजनादेखि लिएर सहुलियत कर्जाका कार्यक्रम समेत ल्याएको छ।
यी कार्यक्रमको उद्देश्य युवाहरूलाई स्वदेशमै केही गरी खाने वातावरण निर्माण गर्ने भन्ने हो।
एकातिर सरकार यसरी युवाहरुलाई स्वदेशमा रोक्नका निम्ति कार्यक्रम गरिरहेको छ भने अर्कोतिर टीकापुरको स्थानीय सरकार आफूले नै ५ लाख सम्मको क्यामेरा किनेर स्वरोजगारीमा लागेका युवाहरुलाई रोजगारीबाट विस्थापित हुने गरी मासिक ६००० वार्षिक ७२ हजार कर तिर्न पर्ने बाध्यात्मक निर्णय गर्दैछ । यस्तो किन ?
के टीकापुर नगरपालिकामा जनप्रतिनिधिहरू छैनन्? कर्मचारीहरूले भनेको मानेनन् भने जनप्रतिनिधिले त जनताको समस्या सुन्नुपर्छ ?
टीकापुर नगरपालिका वार्ड नं १ देखि ९ सम्म जनताको मत लिएर निर्वाचित जनप्रतिनिधिहरूले यस्तै मर्कामा परेका युवाहरूको कुरा सुनेनन् भने उनीहरु जनताको प्रतिनिधि कसरी बन्न सक्छन् ?
जनताबाट भोट लिएर जितेका जनप्रतिनिधिहरूलाई केही प्रश्न गरौं अब ........
१- टीकापुर पार्कभित्रको फलफुल बगैँचाबाट वार्षिक ४ लाख नगरपालिकाले आम्दानी गर्थ्यो। त्यो टेन्डर तपाईँहरुले किन लगाउन सक्नुभएन ?
२- टीकापुर नगरपालिकाको कर्णाली नदीको गिट्टी बालुवाको टेन्डर यसभन्दा अगाडि १ करोड जतिमा वार्षिक जाने गरेको थियो। आन्तरिक राजस्व नै बढाउनु छ भने तपाईँहरुले त्यो टेन्डर किन लगाउन सक्नुभएन ?
३ -टीकापुर नगरपालिकाभित्रका विभिन्न घाटहरूमा वार्षिक दशौँ लाख राजस्व उठ्ने गर्दथ्यो। त्यो टेन्डर तपाईँहरुले किन लगाउन सक्नुभएन ?
४- टिकापुर पार्क नजिकको आइल्यान्ड वार्षिक दशौं लाख टेन्डरमा जाने गरेको थियो। टिकापुर नगरपालिकाकै उच्च पदस्थ कर्मचारीहरूको मिलेमतोमा त्यो पार्क टेन्डरमा नदिएर भित्रभित्रै मिलोमतोमा दिएको दुनियालाई जगजाहेर नै छ । कि होइन ?
५- नगरपालिकाभित्र टेन्डर मार्फत उठ्न सक्ने आन्तरिक राजस्व र आम्दानीका स्रोतहरू सुकाउँदै गएको टीकापुर नगरपालिका ले आफ्नै करिब पाँच लाख लगानीमा क्यामेरा किनेर आएका पर्यटकहरूबाट आफ्नो व्यवसाय चलाइरहेका बिचरा युवाहरूको पेटमा लात हान्ने अधिकार राख्दछ ?
६-के युवाहरुलाई देशमा रोकेर केही काम गर्न गराउनका लागि तपाईहरुको दायित्व होइन जनप्रतिनिधिहरूको ?
७- तपाईँहरूको व्यवहार हेर्दा त अब तपाईँहरू कुनै दिन सुत्केरी कर लाउनुहोला जस्तो छ। जनताको पेटमा लात्ती हान्नलाई लाज लाग्दैन ?
अन्तमा ती ४० जना युवाहरू जसले आफ्नो पौरखले यो देशमा केही गर्छु भनेर लागिरहेका छन् उनीहरूलाई तपाईँहरूले थोपरेको कर फिर्ता लिनुस्, लिनुभएन भने तपाईँहरूको यो साम्राज्य धेरै दिन टिक्ने छैन। भोलि आम जनता भएर समाजमै बस्न पर्दा ती युवाहरूले तपाईँहरूलाई प्रश्न गर्नेछन्। जवाफ दिन सक्नुहुन्छ ?
@
