20/09/2025
बडा दशैं, शुभ दीपावली तथा छठ पर्वको अवसर पारेर सुन्दरपुर ब्याडमिन्टन क्लबले आयोजना गर्दै आएको ९ औं संस्करणको इतिहासिक खसीकप ब्याडमिन्टन प्रतियोगिता यस वर्ष विशेष महत्वका साथ सम्पन्न हुने भएको छ । असोज १० गतेदेखि ११ गतेसम्म सञ्चालन हुने प्रतियोगितामा स्थानीय तथा अन्य आमन्त्रित दर्जनौं खेलाडीहरूको सहभागिता रहने क्लबले जनाएको छ ।
यसअघि कभर्डहल अभावका कारण हरेक वर्ष आउट डोर ब्याडमिन्टन कोर्टमा कठिनाइका बीच प्रतियोगिता सञ्चालन हुँदै आएकोमा यसपटक पहिलो पटक नव निर्मित कभर्डहलमा खेल सञ्चालन हुने भएपछि खेलाडीहरूमा उत्साह थपिएको छ ।
क्लबका सचिव प्रमोद चौधरीका अनुसार, प्रतियोगिताले स्थानीय खेलाडीहरूको खेलस्तर उकास्नुका साथै खेल पर्यटन प्रवर्द्धनमा समेत टेवा पुर्याउने विश्वास लिइएको छ । उनले थपे, “यो प्रतियोगिता केवल प्रतिस्पर्धा मात्र नभई खेलकुदमैत्री सम्बन्ध विस्तार गर्ने महत्वपूर्ण अवसर पनि हो।”
प्रतियोगितामा विजेताले आकर्षक नगद पुरस्कारसहित ट्रफी,मेडल र प्रमाणपत्र प्राप्त गर्ने व्यवस्था गरिएको छ । साथै, दर्शकहरूले पहिलो पटक इनडोर कभर्डहलमै प्रतिस्पर्धात्मक खेल हेर्ने अवसर पाउने भएका छन् ।
![सुन्दरपुरमा बर्षा हुनु भन्दा अगाडि साझ देखिएको दृश्य । [फोटो फिचर]](https://img4.medioq.com/583/537/1097871635835374.jpg)
