VPON Media & Broadcasting

05/12/2025

05/12/2025

TU'UNGA 'OKU 'IAI TEU FILI PALEMIA - KEI POUPOUA 'A DR 'AISAKE EKE

Koe anga 'eni 'a e vakai atu mei Vava'u ni ki he 'etau teu fili Palemia 'aia 'i he 'ene a'u mai ki he 'aho ni na'e kei toko 3 pe ngaahi hingoa ki he fili Palemia neongo koe toko taha pe kuo 'osi lesisita ki Fale Alea. Ko hai 'oku totonu ke kanititeiti Palemia? Kotoa pe toko 26 'oku 'iai 'enau totonu kenau kanititeiti Palemia pea 'oku nau lelei kotoa pe kenau Palemia he na'e 'osi fuatautau kinautolu 'e he kakai 'o e ngaahi vahenga pea mahino 'oku nau taau mo fe'unga kenau tataki e Pule'anga pea mo 'ofa he kakai. Ka koe toko taha pe 'eni 'aia 'oku ou tui ko 'Aiske Valu Eke pe kuo 'osi 'ave 'ene tohi fokotu'u kanititeiti Palemia. Koe 'uhi 'oku nau taau kotoa pe ka koe fili Palemia ko hai 'oku tokolahi taha 'a hono poupou he toko 26 'i Fale Alea. Manatu'i koe ngaahi fika ko 'eni teu 'oatu 'i lalo 'e malava pe ke liliu he ngaahi 'aho 'oku toe he taumaia 'oku tuku e fealealea'aki moe feinga ke ma'u 'ete toko 14 kate fa'u ha Pule'anga. Ka koe ngaahi fika falala'anga 'ena ki he 'aho ni mei he 'eku satelaite he hotele 'i Vava'u ni.

1. DR 'AISAKE VALU EKE (15)
'I he 'ene tu'u koia 'i he 'aho ni 'oku toko 15 'a e kau poupou kia Dr 'Aisake Eke 'aia koe toko 5 mei he Kapineti lolotonga (TT4, TT5, TT7, TT10, Eua 11), pea toko 5 mei he kau MPs fo'ou ki Fale Alea (TT6, HP12, HP13, VV15, Niua17) pea mo VV14 pehe ki he toko 4 kau Nopele neongo he'ikai keu 'oatu ngaahi hingoa kau Nopele koe 'uhi 'e malava pe ke uesia 'enau fili. 'Aia kapau na'e fakahoko e fili PALEMIA 'i he 'aho ni pea 'e kei hoko atu pe 'a Dr 'Aisake Eke 'i he lakanga Palemia 'aki e toko 15. Koe toko 14 pe 'oku fiema'u kae malava ke fa'u 'aki ha Pule'anga.

2. LORD FAKAFANUA (6)
'Oku toenga leva 'a e kau Nopele 'e toko 5 'ia Lord Fakafanua fakataha pea moe Fakafofonga 'o TT 8 'o toko 6 'aki. 'Aia ko 'ene tu'u 'i he 'aho ni 'oku 'ikai ke lava 'a Lord Fakafanua ia ke ma'u 'ene toko 14 kae malava kene fa'u Pule'anga 'aia 'oku fiema'u 'ene toko 8. 'E malava ke ma'u 'a e toko 8 koia he ngaahi 'aho 'oku toe pea fakahoko e fili Palemia? 'IO, 'okapau 'e mana 'a Langi ke hoko ha fu'u nga'unu holo mei he kau memipa Fale Alea mei he 'aho ni ki he 'aho fili Palemia. 'I he 'eku tui ka kei toko 6 ai pe fika 'a Fakafanua, 'e malava pe ke 'ikai fakahu 'eia hono hingoa ke kanititeiti Palemia tautau tefito kapau 'oku split heni kau Nopele. 'E malava pe ia kenau 'unu kotoa toko 9 Nopele kia 'Aisake Eke kenau tu'u fakataha ai pe koe 'unu toko 5 Nopele ko 'eni kia Siaosi Sovaleni.

3. SIAOSI SOVALENI (4)
'Oku mahino mai he 'aho ni 'a e kei pikitai pe kau seniale taukei 'a Siaosi Sovaleni 'aia ko TT1, TT3, TT 9 pea mo VV 16. 'E malava ke fa'u Pule'anga 'a Sovaleni? 'IO, kapau 'e hoko ha mana mei langi ke fakahoko ha fu'u fenga'unuaki 'o ma'u 'ene toko 10 'oku ne fiema'u. 'I he tu'u koia he 'aho ni 'oku 'ikai ha Nopele 'e poupou kia Sovaleni pea 'oku 'ikai mahino pe koe kaupeau pe 'eni kuo 'osi 'oku te'eki ke liliu ka ko 'ene a'u mai 'ena ki he 'aho ni. Ko TT1 ‘oku ou fa’a tete e satelaite taimi oku feinga ke muimui ai hhh. Sai pe oku kei toe lahi pe ngaahi aho kake ofa mai a satelaite ha’u a keke Ofa hhh. Kapau 'e ikai ke toe kanititeiti Palemia 'a Fakafanua pea 'e malava pe ke 'unu kau Nopele toko 5 kia Sovaleni pe koe Eke. Kapau tenau 'unu kia Sovaleni pea 'e 'alu hake leva fika 'a Sovaleni 'o toko 9 pea 10 'aki a TT8 kapau 'e 'unu moia kiai.

'Oku 'iai leva 'a e MP fo'ou 'e taha 'oku te'eki ke fakapapau'i 'a hono loto pe koe fe tafa'aki e poupou kiai. 'Oku tau tui 'e a'u atu pe ki he 'aho fili PM kuo maau e fakafofonga.

'I he fakakaukau koia 'o e NGAUE FAKATAHA pea moe TU'U FAKATAHA 'a e toko 17 na'e fili 'e he kakai. Kapau leva 'oku toko 4 pe 'a e kau poupou 'o Sovaleni, 'oku 'uhinga lelei nai 'enau tu'u mei he tuliki koia 'o ui mai kia 'Aisake Eke ke tali ho telefoni pea faka'ata mai ha faingamalie kemau talanoa atu ki ha'a tau ngaue fakataha?

Koe ha 'oku 'ikai kemou kaniseli homou fai'anga kemi toko (4) kamou 'alu pe kia 'Aisake Eke 'o fakataha kiai kemou fili ha Pule'anga ma'ae kakai pea tuku kia 'Aisake Eke kene toki toli mo filifili e ngaahi kakala ki he Kapineti he koia 'oku poupoua he taimi ni? 'E malava pe ia ke faka'uhinga'i koe 'uhinga ho'omou toe 'alu o ui mai mei he tuliki ke hanga atu 'a 'Aisake Eke pea mou tala kiai kapau teke 'omai 'a e Tokoni Palemia moe Minisita MOI moe Minisita Lao pea temau 'alu atu ketau ngaue fakataha. Kapau na'e a'u pe fika ia 'o ha kanititeiti PM 'o 10 pea 'e mahino pe kia kitautolu e 'uhinga 'enau kanititeiti PM neongo 'oku faka'ata pe 'ehe lao ke fokotu'u hoto hingoa pea poupou kiai ha toko taha pe ua pea te tukuna atu kita o fakaongoongo ai pe ki he ola e fefakatau'aki lakanga Minisita.

Ka toe 'iai ha liliu mei he ngaahi fika fakasatelaite ko 'ena teu toe tuku atu pe he 'oku kei taimi pe pea kei lele moe toutou 'eva moe fetuku moe 'a 'aho hhh 'a 'aho he koha putu hhh. Ko 'eku li atu pe 'ena ke 'iai ha me'a kemou kamata ai kau toki vilo holo satelaite keu lava sio ki he 'enau fekolosi'aki holo 'o muhumuhu ki he fili Palemia hhh. Mou kataki 'oua temou fu'u fakamaatoato mai he ko 'eku sio satelaite atu mei Vava'u ni pea 'oku 'iai e naunau e tete, matemate moe makohikohi hhh 'ifo lahi mo'oni

04/12/2025

Notice:
“Fatufonua Fo’ou” efiafi Tokonaki (6Dec) taimi 7pm. Malo

04/12/2025

Letio Kakai -
Toko 12 Aisake Eke
Toko 4 Sovaleni
Toko 10 kau Nopele

04/12/2025

04/12/2025

Kuo fakahu e tohi fokotu'u ki he kanititeiti Palemia ka 'e toki fakaha pe hono hingoa he aho e fakahoko ai e fili Palemia.

02/12/2025

Kuo vave pe ke mahino pea aofangatuku ko hai e Palemia he ta’u e 4 ka hoko mai. Oku tau amanaki lelei ki ha Puleanga mă’a Tonga.