10/09/2025
PRESIDENT MARCOS, HANDA NGA IPAIDALUM SA WITNESS PROTECTION PROGRAM ANG MGA DISCAYA
Bukas si President Ferdinand Marcos Jr. nga ipaidalom sa witness protection program ang mag-asawa nga Discaya matapos nga ila ginhingadlan ang pila ka mga congressmen nga ginaalegar imbolbado sa mga anomaliya sa flood control projects.
Suno sa Presidente, kun mapamatud-an lang man nga kwalipikado ang mag-asawa, gilayon sila nga mapaidalom sa programa.
Ginpahayag pa sini nga gilayon man nga magahulag ang otoridad kun may yara sang pagpamahog sa ila kabuhi, ini bilang kabahin lang sang imbestigasyon kag katungdanan sang estado nga siguraduhon ang seguridad sang tagsa ka mga Pilipino apisar pa nga indi sila karon makabig nga state witness.
Siguraduhon man sang Presidente nga ang isa ka independente nga komisyon nga pagatukuron ang maid-id nga magausisa sang mga alegasyon sang mag-asawa nga Discaya.
Matandaan nga sa Senate Blue Ribbon Committee sang nagligad nga adlaw nagtambong kag nagpahayag sang ila joint statement ang mag -asawa kag ila ginbuyagyag ang pila ka mga kongresista, kag DPWH officials nga nagakuha sang kick backs sa ila nga mga contractor.
Samtang sa Tricom Infra Comm hearing sang Kamara kahapon, nagtambong man si Pacifico Discaya samtang wala naman ang asawa sini nga si Sarah bangud ginpahayag naglain ang pamatyag sini.
|via RMN Iloilo
