06/06/2026
Patay ang live-in partner sang isa ka person deprived of liberty (PDL) matapos ginluthang sang riding-in-tandem suspects sa atubang sang Negros Occidental District Jail sa Barangay Tabunan, Bago City, pasado alas 4:00 sang hapon, Hunyo 6.
Ginkilala ang biktima kay Ma. Lowela Foster, 41-anyos, residente sang Barangay 2, Manapla.
Suno kay Police Lt. Col. James Latayon Jr., hepe sang Bago City Police Station, ginbisita ni Foster ang iya live-in partner nga si alias Ramil sa NODJ kaupod ang duha sini ka mga abyan kag nakagwa na sa pasilidad sang hinali lamang ini nga ginluthang sang riding-in-tandem suspects.
Ang driver sang itom nga motorsiklo ang nagasuksok sang yellow-gold sweatshirt kag itom nga bonnet samtang ang back rider ang nagasuksok sang itom nga t-shirt kag itom nga bonnet, lunsay wala sang mga helmet.
Nakaangkon sang igo sa nawala nga bahin sang guya ang biktima nga gintunaan sang iya kamatayon.
Narecover sa crime scene ang isa ka bala kag slug sang .45 caliber pistol.
Suno kay Latayon, napriso ang live-in partner ni Foster bangud sa kaso angot sa illegal nga druga sang 2019 kag nakagwa sang 2021 apang liwat nga napriso sa pareho nga kaso sang 2024.
Sa karun gina-imbestigahan pa sang kapulisan ang motibo sa krimen.*
