12/01/2026
NEGROS ORIENTAL POLICE DIRECTOR GIN-RELIEVE SA PWESTO MATAPOS ANG NAGLUNTAD NGA PAGPANGLUTHANG SANG PULIS SA PAREHO MAN SINI NGA MGA PULIS SA BANWA SANG SIBULAN
Gin-relieve na sa pwesto si Negros Oriental Police Provincial Office director Colonel Criscent Tiguelo epektibo subong nga adlaw, Enero 12, matapos ang nagluntad nga pagpangluthang sang isa ka pulis sa mga kasubong man sini nga pulis sa banwa sang Sibulan, sadtong Enero 9.
Sandig sa press release sang Police Regional Office-Negros Island Region, ang pag-relieve kay Tiguelo sa pwesto ang kabahin sang command responsibility nga ginapatuman sang Philippine National Police kag agod padayon nga mapabilin ang patas nga imbestigasyon sa amo nga insidente.
Magatindog bilang temporaryo nga Officer-In-charge sang NOrPPO ang Deputy Regional Director for Operations sang PRO-NIR nga si Colonel Lito Patay.
Ginapasiguro naman sang kapulisan nga magapadayon ang operasyon sang NOrPPO sa idalom sang pagpamuno ni Patay kag ipatuman man ang istrikto nga superbisyon sang tanan nga police units samtang nagapadayon ang administrative process.
Madumduman nga napatay sa pagpangluthang ang chief of police sang Sibulan nga si Capt. Jose Edrohil Cimafranca, subong man si SMS Tristan Chua, Patrolman Rey Albert Temblor kag sibiliyan nga si Shiela Mae Dinawanao.
Ginatudlo naman nga suspek sa krimen ang pulis man nga si SSG Bonifacio Saycon.
Sa karon, wala pa matumod sang kapulisan kon ano ang motibo ni Saycon sa pagpatay kay Dinawanao kag sa tatlo ka mga pulis.
