Nikel Journo

19/08/2026

Batarazians, simulan natin sa tamang pagtatapon ng basura♻️

Ang isang malinis, maayos, at luntiang Bataraza ay nagsisimula sa simpleng hakbang—ang tamang pagtatapon ng basura. Sa pamamagitan ng video na ito, hinihikayat ang bawat Batarazian na matutong maghiwalay at magtapon ng basura sa tamang basurahan ayon sa kulay nito.

Tamang pagtatapon, para sa mas malinis na kinabukasan ng Bataraza.

12/08/2026

𝐄𝐃𝐈𝐓𝐎𝐑𝐘𝐀𝐋 ||

𝐇𝐮𝐰𝐚𝐠 𝐡𝐚𝐲𝐚𝐚𝐧𝐠 𝐦𝐚𝐩𝐮𝐭𝐨𝐥 𝐚𝐧𝐠 𝐦𝐚𝐛𝐮𝐭𝐢𝐧𝐠 𝐧𝐚𝐬𝐢𝐦𝐮𝐥𝐚𝐧 𝐬𝐚 𝐁𝐚𝐭𝐚𝐫𝐚𝐳𝐚

Hindi nasusukat sa dami ng bagong proyekto ang lalim ng pag-unlad ng isang bayan kundi sa kakayahan nitong pangalagaan at palawakin ang mga mabuting nasimulan. Sa bawat pagbabagong nagaganap sa pamahalaan, nananatiling mahalaga ang pagpapatuloy ng mga serbisyong may tunay na pakinabang sa mamamayan.

Batay sa State of the Municipality Address, nakapagtala ang Municipal Engineering Office ng 25 pangunahing proyekto noong 2025, kung saan 22 ang ganap nang natapos at tatlo ang patuloy na isinasagawa. Kabilang dito ang mga kalsada, daycare centers, health stations, drainage systems, fishport at water supply na nagsisilbing tugon sa iba’t ibang pangangailangan ng mga komunidad sa Bataraza.

Hindi dapat manatili sa talaan ang mga proyektong ito dahil ang kanilang tunay na halaga ay nasusukat sa pakinabang na naiiwan sa mamamayan. Sa pagpapatuloy ng mga nasimulan, napangangalagaan ang pondong inilaan, oras na ginugol at pagsisikap na inilatag upang maisakatuparan ang mga ito. Higit na nagiging makabuluhan ang isang proyekto kapag hindi natatapos ang silbi nito kasabay ng pagtatapos ng isang administrasyon.

Matingkad din ang ganitong pagpapatuloy sa serbisyong pangkalusugan. Sa pamamagitan ng PuroKalusugan, medical at dental missions at Kasilasah ha Barangay Integrated Health Caravan, nakapagtala ng 1,840 medical consultation at 504 dental extraction sa unang semestre ng 2026. Sa kabuhayan naman, patuloy na binibigyan ng pagkakataon ang mga mamamayan sa pamamagitan ng TUPAD, SPES, GIP, livelihood assistance, job fairs at skills training.

Maaaring isipin na kailangang magkaroon ang bawat bagong administrasyon ng sariling mga proyekto upang maipakita ang sariling kakayahan at maiwan ang sariling marka. Ngunit hindi dapat maging sukatan ng mabuting pamamahala ang dami ng bagong proyektong maikakabit sa isang pangalan. Higit na dapat pahalagahan ang kakayahang kilalanin ang mabuting nasimulan, paghusayin ito at tiyaking patuloy itong nagsisilbi sa publiko.

Ipinakikita rin ng pananaw ng mga mamamayan na hindi hiwalay ang pagpapaunlad sa pakikilahok ng komunidad. Para kay Mhoy Medlina, isang residente ng Bataraza na nakinig sa SOMA, ang pagkakaisa ang isa sa pinakamahalagang kailangan ng isang pamayanan sapagkat sa sama-samang pagtulong, lalo na sa panahon ng problema, mas napapabilis ang pag-unlad ng bayan. Sa ganitong diwa, hindi lamang pamahalaan ang tagapagpatuloy ng mabubuting programa kundi pati ang mga mamamayang nakikinabang at nakikibahagi rito.

Hindi sapat na maipatupad lamang ang isang programa; kailangang mapanatili ang mga serbisyong napatunayang kapaki-pakinabang at patuloy na mapahusay ang mga ito. Ang bawat administrasyon ay may pagkakataong magdagdag ng bagong hakbang nang hindi isinasantabi ang pundasyong nauna nang itinayo. Sa ganitong paraan, ang isang termino ay hindi nagiging panibagong simula kundi karugtong ng mas mahabang paglalakbay tungo sa pag-unlad.

Ipagpatuloy ang mabubuting nasimulan, palawakin ang mga serbisyong may pakinabang at pangalagaan ang mga pundasyong itinayo para sa mamamayan. Sapagkat ang tunay na pamana ng pamamahala ay hindi isang pangalan sa proyekto kundi isang serbisyong patuloy na nararamdaman—isang pag-unlad na hindi napuputol sa pagpapalit ng administrasyon kundi lalo pang pinatitibay ng bawat susunod na hakbang.

🖌: 𝐊𝐡𝐚𝐲𝐫 𝐒𝐮𝐥𝐭𝐚𝐧

12/08/2026

Panoorin||

Mas efficient at transparent na pangongolekta ng buwis, isinusulong sa Bataraza.

🎥:Sanhera Obstaculo
Waheeda Amil
💻: Denielle Dela Rosa
Czarianne Dumara-og

12/08/2026

𝐁𝐚𝐭𝐚𝐫𝐚𝐳𝐚, 𝐩𝐢𝐧𝐚𝐥𝐚𝐤𝐚𝐬 𝐚𝐧𝐠 𝐤𝐨𝐥𝐞𝐤𝐬𝐲𝐨𝐧 𝐧𝐠 𝐤𝐢𝐭𝐚 𝐬𝐚 𝐭𝐚𝐨𝐧𝐠 𝟐𝟎𝟐𝟔

Tumaas ng ₱981.6M ang kabuuang taxable assessed value ng bayan ng Bataraza matapos magsagawa ang Municipal Assessor’s Office ng masinsinang field validation, GIS mapping, at digitalization ng mga ari-arian, na maaaring magdagdag ng ₱19.632M sa taunang kita ng bayan, ayon sa State of the Municipality Address (SOMA) nitong ika-12 ng Agosto, 2026.

Isinulong din ng lokal na pamahalaan ang Enhanced Tax Revenue Assessment and Collection System (ETRACS) upang gawing mas transparent at episyente ang digital na pangangasiwa at pangongolekta ng kita ng nasabing bayan.

𝐃𝐢𝐠𝐢𝐭𝐚𝐥𝐢𝐬𝐚𝐬𝐲𝐨𝐧, 𝐩𝐢𝐧𝐚𝐢𝐠𝐭𝐢𝐧𝐠
Ayon kay Mayor Al-Shaiff W. Ibba, ang mas maayos na sistema ng pangongolekta ng buwis ay mahalaga upang matiyak na maibabalik sa mamamayan ang bawat pisong nakokolekta ng pamahalaan.

“Bawat piso na nakolekta natin nang tama at transparent ay piso na maibabalik sa anyo ng kalusugan, klinika, iskolarship, at tulong sa pamilyang nangangailangan,” ani Ibba.

Sinabi rin ng alkalde na ang sistemang may kaayusan ay nagbubunga ng pamahalaang may pananagutan, na siyang layunin ng administrasyon para sa Bataraza.

𝐊𝐢𝐭𝐚, 𝐥𝐮𝐦𝐚𝐦𝐩𝐚𝐬 𝐬𝐚 𝐭𝐚𝐫𝐠𝐞𝐭
Nakapagtala naman ang Municipal Treasurer’s Office ng mahigit ₱162.16M na nakolektang kita mula Enero hanggang Hulyo 2026, na lumampas sa 50% ng itinakdang target ng bayan.

Kasabay nito, nakapaghatid ang lokal na pamahalaan ng mahigit 2,000 Notice of Delinquency at nakapagbigay ng halos ₱1.9M na kaluwagan sa penalties sa ilalim ng Tax Amnesty Program.

𝐊𝐨𝐥𝐞𝐤𝐬𝐲𝐨𝐧 𝐩𝐚𝐫𝐚 𝐬𝐚 𝐬𝐞𝐫𝐛𝐢𝐬𝐲𝐨
Binigyang-diin ni Mayor Ibba na ang pagpapalakas ng kita ng bayan ay nakatuon sa kakayahan ng pamahalaang maghatid ng mas maraming serbisyo at oportunidad sa mga mamamayan.

“Ang isang sistemang may kaayusan ay isang pamahalaang may pananagutan,” ani Ibba, kasunod ng pagsusulong ng digital revenue administration sa bayan.

Inaasahan naman ni Junaide Dawili, Municipal Tourism Officer at residente ng Bataraza, na mas marami pang proyekto ang maisasakatuparan sa bayan, kabilang ang pabahay na makatutulong sa mga mamamayan ng Bataraza.

“Masasabi po nating tangible project kung sakaling maisakatuparan ang mga proyekto ng ating bayan,” dagdag pa niya.

Sa pamamagitan ng mas mataas na taxable assessed value at mas episyenteng sistema ng pangongolekta, inaasahang mapalalakas ng Bataraza ang kapasidad nitong pondohan ang mga serbisyong direktang makikinabang ang mga mamamayan, kabilang ang kalusugan, edukasyon, at iba pang pangangailangan ng komunidad.

✒: 𝐕𝐞𝐚 𝐒𝐡𝐢𝐞𝐫𝐚𝐦𝐚𝐞 𝐌𝐚𝐫𝐭𝐢𝐥𝐥𝐚𝐧𝐚
: 𝐒𝐲𝐥-𝐣𝐚𝐲 𝐀𝐫𝐢𝐞𝐠𝐨

📸: 𝐉𝐨𝐬𝐡𝐮𝐚 𝐉𝐨𝐡𝐧 𝐋𝐢𝐛𝐨-𝐨𝐧
: 𝐀𝐛𝐝𝐮𝐥 𝐌𝐮𝐪𝐭𝐚𝐝𝐢𝐫 𝐌𝐚𝐦𝐚-𝐨
:𝐇𝐚𝐬𝐦𝐢𝐧𝐚 𝐒𝐚𝐥𝐢𝐜

12/08/2026

𝐒𝐞𝐫𝐛𝐢𝐬𝐲𝐨 𝐚𝐭 𝐩𝐚𝐠-𝐮𝐧𝐥𝐚𝐝, 𝐬𝐞𝐧𝐭𝐫𝐨 𝐧𝐠 𝐤𝐚𝐮𝐧𝐚-𝐮𝐧𝐚𝐡𝐚𝐧𝐠 𝐒𝐎𝐌𝐀 𝐧𝐢 𝐌𝐚𝐲𝐨𝐫 𝐈𝐛𝐛𝐚

Inilunsad ang kauna-unahang State of the Municipality Address (SOMA) sa bayan ng Bataraza, kung saan inilahad ni Mayor Al-Shariff W. Ibba ang mga proyekto, programa, at plano ng kaniyang administrasyon para sa patuloy na pag-unlad ng munisipalidad, na ginanap sa Bataraza Mini Coliseum nitong Agosto 12, 2026.

Alinsunod sa temang: "Bawat Tagumpay ay Bunga ng pagkakaisa; Bawat Hamon ay hakbang Tungo sa kaunlaran," layunin nito na talakayin ang kasalukuyang kalagayan ng bayan, kabilang ang mga pangunahing problema, solusyon, proyekto, programa, at mga hakbang na isinasagawa ng lokal na pamahalaan upang matugunan ang pangangailangan ng mga mamamayan.

Ayon kay Michael Villanueva, IT Officer I at isa sa mga nakinig sa SOMA, malaking hakbang ang kauna-unahang State of the Municipality Address ni Mayor Al-Shariff Ibba tungo sa mas transparent at accountable na pamahalaan.

“Malaking bagay ang pagkakaroon ng kauna-unahang SOMA dahil nabibigyan ng pagkakataon ang mga mamamayan na malaman ang mga nagawa, kasalukuyang programa, at mga plano ng ating lokal na pamahalaan,” ani Villanueva.

Dagdag pa niya, inaasahan niyang magtutuloy-tuloy ang digital transformation, mahusay na serbisyong publiko, at mga programang direktang makikinabang ang mga mamamayan, gayundin ang pagsasakatuparan ng mga inilatag na programa para sa mas maunlad na Bataraza.

Bunsod nito, binigyang-diin sa SOMA ang mga pangunahing programa at proyekto na nakatuon sa pagpapaunlad ng mga serbisyong pampubliko, imprastraktura, kabuhayan, edukasyon, kalusugan, at iba pang sektor na mahalaga sa mga residente ng Bataraza.

Sa pamamagitan ng SOMA, inaasahang mas mapapalakas ang ugnayan ng pamahalaang lokal at ng mga mamamayan sa pamamagitan ng mas malinaw na pagbabahagi ng mga nagawa, kasalukuyang programa, at mga susunod pang hakbang ng administrasyon.

Sa huli, nagsilbing pagkakataon ang kauna-unahang SOMA upang maipakita ng pamahalaang lokal ang kasalukuyang kalagayan ng Bataraza at ang mga adhikain nito para sa isang mas maunlad, organisado, at serbisyong pamahalaang higit na nakatuon sa pangangailangan ng bawat Batarañon.

✒ : 𝐒𝐲𝐥-𝐣𝐚𝐲 𝐀𝐫𝐢𝐞𝐠𝐨
: 𝐕𝐞𝐚 𝐒𝐡𝐢𝐞𝐫𝐚𝐦𝐚𝐞 𝐌𝐚𝐫𝐭𝐢𝐥𝐥𝐚𝐧𝐚


📸: 𝐉𝐨𝐬𝐡𝐮𝐚 𝐉𝐨𝐡𝐧 𝐋𝐢𝐛𝐨-𝐨𝐧
: 𝐀𝐛𝐝𝐮𝐥 𝐌𝐮𝐪𝐭𝐚𝐝𝐢𝐫 𝐌𝐚𝐦𝐚-𝐨
:𝐇𝐚𝐬𝐦𝐢𝐧𝐚 𝐒𝐚𝐥𝐢𝐜

12/08/2026

Panoorin||

SOMA 2026: Tinalakay ni Mayor Al-Shariff Ibba ang mga programa at hakbang ng pamahalaang munisipal tungo sa patuloy na pag-unlad ng Bataraza, kabilang ang mga programang sumusuporta sa mga magsasaka at mangingisda.

🎥: Czarianne Dumara-og
Waheeda Amil
Sanhera Obstaculo
💻:CD

12/08/2026

12/08/2026

‎BREAKING NEWS ||
‎
‎Makasaysayang unang soma, pormal nang nagsimula sa Bataraza
‎
‎Opisyal nang sinimulan ang kauna-unahang State of the Municipality Address (SOMA) sa Bayan ng Bataraza, kung saan ilalahad ang kalagayan ng munisipalidad, mga naisakatuparang programa at proyekto, gayundin ang mga pangunahing hamon at susunod na hakbang ng lokal na pamahalaan, na kasalukutang ginaganap sa Bataraza Mini Coliseum, ngayong Agosto 12, 2026.
‎
‎Mananatiling nakatutok para sa mga mahahalagang ulat at kaganapan mula sa SOMA.

10/08/2026

𝘽𝙖𝙬𝙖𝙩 𝙏𝙖𝙜𝙪𝙢𝙥𝙖𝙮 𝙖𝙮 𝘽𝙪𝙣𝙜𝙖 𝙣𝙜 𝙋𝙖𝙜𝙠𝙖𝙠𝙖𝙞𝙨𝙖; 𝘽𝙖𝙬𝙖𝙩 𝙃𝙖𝙢𝙤𝙣 𝙖𝙮 𝙃𝙖𝙠𝙗𝙖𝙣𝙜 𝙏𝙪𝙣𝙜𝙤 𝙨𝙖 𝙆𝙖𝙪𝙣𝙡𝙖𝙧𝙖𝙣.

Inaanyayahan ang lahat na tunghayan ang 2026 State of the Municipality Address (SOMA) ng Lokal na Pamahalaan ng Bataraza, isang mahalagang pagkakataon upang balikan ang mga naging tagumpay, programa, proyekto, at mga hakbangin ng ating bayan tungo sa patuloy na pag-unlad.

📅 Agosto 12, 2026 | 9:00 AM
📍 Bataraza Mini Coliseum, Marangas, Bataraza, Palawan

Sama-sama nating saksihan ang mga tagumpay na bunga ng pagkakaisa at ang mga hamong nagsisilbing hakbang tungo sa mas maunlad na Bataraza.

Makilahok, makinig, at maging bahagi ng paghubog sa kinabukasan ng ating bayan!

09/08/2026

𝐘𝐄𝐒-𝐎, 𝐧𝐚𝐧𝐠𝐮𝐧𝐚 𝐬𝐚 𝐥𝐚𝐛𝐚𝐧 𝐤𝐨𝐧𝐭𝐫𝐚 𝐛𝐚𝐬𝐮𝐫𝐚

Nagsagawa ng malawakang paglilinis ang mga kawani at kasapi ng Youth for Environment in Schools Organization (YES-O) sa Bataraza National High School (BNHS) upang matugunan ang problema sa basura at mapanatili ang kalinisan ng kapaligiran sa loob ng paaralan nitong Agosto 9, 2026.

Batay sa inisyatibo ng organisasyon na “Yes for Green, Oo sa Clean,” isinagawa ang clean-up drive bilang bahagi ng adbokasiya sa pangangalaga ng kapaligiran, alinsunod sa DepEd Order No. 52, s. 2011, na nagtataguyod sa YES-O bilang katuwang sa mga gawaing pangkalikasan.

Ayon kay John Revo Italia, Teacher l at YES-O Adviser, pangunahing layunin ng aktibidad na linisin at ayusin ang Materials Recovery Facility (MRF) ng paaralan, kasabay ng pagtuturo sa mga mag-aaral ng wastong waste segregation.

“Hindi lamang ito simpleng clean-up drive, kundi isang pagkakataon upang maturuan ang mga bata ng tamang waste classification sa pamamagitan ng aktuwal na pagkilos,” ani Italia.

Dagdag pa niya, naging matagumpay ang aktibidad dahil sa aktibong pakikilahok ng YES-O officers at suporta ng school principal, at isinagawa umano ito sa Linggo upang hindi maabala ang klase ng mga mag-aaral.

Pahayag naman ni Sheng Ayson, Grade 12 Representative, mahalaga ang pagpapanatili ng kalinisan ng paaralan para sa ligtas at maayos na kapaligiran.

"So as the YES-O officers we should lead by example and encourage everyone to work together in keeping our school clean and green," giit niya.

Paglilinaw pa niya, nakatutulong ang malinis na kapaligiran sa kalusugan, pag-aaral, at disiplina ng mga mag-aaral.

Samantala, panawagan naman ng YES-O sa mga mag-aaral na isagawa ang wastong paghihiwalay ng biodegradable, non-biodegradable, at recyclable na basura bago ito itapon, katuwang ang Municipal Environment and Natural Resources Office (MENRO) sa regular na pagkolekta ng mga basurang nasa MRF.

✒: 𝐒𝐲𝐥-𝐣𝐚𝐲 𝐀𝐫𝐢𝐞𝐠𝐨

📸: 𝐃𝐞𝐧𝐢𝐞𝐥𝐥𝐞 𝐃𝐞𝐥𝐚 𝐑𝐨𝐬𝐚
: 𝐉𝐨𝐡𝐧 𝐑𝐞𝐯𝐨 𝐈𝐭𝐚𝐥𝐢𝐚 (𝒑𝒉𝒐𝒕𝒐 𝒄𝒐𝒖𝒓𝒕𝒆𝒔𝒚)