15/08/2026
Mahigit 30 Kaso Naisampa sa Loob ng 10 Buwan Kontra sa Anti-Mining Defenders, Lawyers; Pagtindig ng Simbahan, DWRV Binigyang Diin ng Diosesis ng Bayombong
Aabot na sa mahigit 30 kaso ang isinampa laban sa mga environmental defender kasama ang mga lider ng Indigenous People (IP) at mga abogado mula sa lalawigan ng Nueva Vizcaya sa loob lamang ng 10 buwan dahil sa kanilang patuloy na pagtindig ukol sa isyu ng pagmimina.
Ito ang inilantad sa ginanap na Press Conference noong Agosto 14, 2026 sa St. James the Apostle Parish sa Santiago City, Isabela.
Ang mga kaso ay inihain sa Municipal Trial Courts ng Kasibu, Dupax del Norte at Bambang, gayundin sa mga tanggapan ng Provincial Prosecutor ng Nueva Vizcaya at Isabela. Kabilang sa mga kasong isinampa ng Woggle Corporation at North Luzon Minerals Resources Corporation ay ang mga reklamong cyberlibel laban sa ilang indibidwal kasama ang mga abogado ng grupo na hayagang nagpahayag ng kanilang pagtutol sa pagmimina at sumuporta sa mga apektadong komunidad.
Ayon kay Atty. Edgardo Balgos, isa sa mga abogadong nakasuhan ng cyberlibel, ang mga kasong isinampa laban sa mga environmental defender ay maituturing lamang na Strategic Lawsuits Against Public Participation (SLAPP) at isang uri ng harassment.
Paliwanag ni Balgos, may mga probisyon sa Rules of Procedure for Environmental Cases ng Korte Suprema na nagbibigay ng proteksyon laban sa mga kasong ang pangunahing layunin ay mang-harass o manakot sa mga indibidwal na nakikilahok sa mga usapin hinggil sa pangangalaga sa kalikasan.
Ayon naman kay Atty. Fidel Santos, isa ring abogado na nahaharap sa cyberlibel case, hindi sila titigil sa pagtupad ng kanilang tungkulin sa mga mamamayan ng Dupax at Kasibu at sa kanilang mga kliyenteng may mga kasong kinakaharap.
“Matapang kami dahil matatapang ang mga kaparian at kababayan natin doon, at alam namin na nandoon kami sa matuwid at hindi kami titigil sa pagtindig, kasi kung hindi po kami kikibo, sino ang kikibo at kailan pa?” saad ni Atty. Santos.
Hinimok din nila ang mga residente ng Dupax del Norte at Kasibu na huwag panghinaan ng loob sa kabila ng sunod-sunod na paghain ng kaso laban sa mga ito.
Samantala, iginiit ni Rev. Fr. Christian Dumangeng, kinatawan ng Diosesis ng Bayombong at Station Manager ng DWRV Radyo Veritas, na hindi dapat manahimik ang Simbahang Katolika patungkol sa usapin ng mga isyung panlipunan, lalo na kung sangkot ang hustisya, korapsyon, kahirapan, karapatang pantao, kapayapaan at pangangalaga sa kalikasan.
“Patuloy na nagbibigay ng boses at inspirasyon ang Simbahan sa mga taong naaapektuhan at nahihirapan dahil sa mga operasyon ng mga mining companies sa probinsiya ng Nueva Vizcaya,” ani Fr. Dumangeng.
Dagdag pa niya, ang himpilan ng radyo na pagmamay-ari ng Simbahang Katolika ay may tungkuling ipabatid sa publiko ang mga kaganapan at isyung may malaking epekto sa mga komunidad. Binigyang-diin niya na matagal nang nag-uulat at nagbibigay ng boses ang Radyo Veritas sa isyu ng pagmimina at hindi lamang ilabas ang mga kontrobersiya na kinasasangkutan ng mga naturang kumpanya ng pagmimina.
“Ang punto ko lang naman ay mayroon pong karapatan ang radyo to tell the truth. Hindi po bayaran, kasi po kung bayaran, talagang tatahimik 'yan. Pero hindi, dahil ang inspirasyon namin—truth,” dagdag ni Fr. Dumangeng.
Matatandaang isa si Fr. Dumangeng sa mga nakasuhan dahil sa forcible entry at pagtindig sa posisyon ng Simbahan, ngunit, agad ding ibinasura ang kasong inihain laban sa kanya gayundin kay Bishop Jose Elmer Mangalinao kasama ang mga ilan pang indibidwal.
Sa isinagawang press conference, muling nanawagan ang mga kinatawan ng Simbahan, legal sector at mga environmental defender ng mas malawak na pagkakaisa at pakikilahok ng publiko sa usapin ng pagmimina, lalo na sa mga komunidad na direktang maaapektuhan ng mga aktibidad ng pagmimina sa Nueva Vizcaya.
Ang naturang press conference ay inorganisa ni Bishop Jose Elmer Mangalinao, Obispo ng Diosesis ng Bayombong, sa pamamagitan ng koordinasyon ni Fr. Tony Ancheta ng St. James the Apostle Parish. Layunin nitong bigyang-linaw at ilantad sa publiko ang kalagayan ng mga komunidad, environmental defenders, IP leaders, at mga abogadong patuloy na humaharap sa mga kasong may kaugnayan sa kanilang pagtutol sa pagmimina.
