14/06/2026
Dalagita, Natagpuang Patay sa Kasibu, Nueva Vizcaya
Bangkay na nang matagpuan ng kanyang kapamilya ang 14 na anyos na dalagita sa comfort room ng Information Center Tourism Building sa Capisaan, Kasibu, Nueva Vizcaya Sabado ng hapon, June 13.
Nakita ang biktima na nakahandusay sa sahig na may umaagos na dugo at nylon belt sa kanyang leeg at walang kasuotan na pambaba.
Ayon sa ulat ng Kasibu PNP, alas sais pa lamang ng umaga, hinahanap na siya ng kanyang kapatid na babae hanggang sa napadpad siya sa nasabing gusali na walang nakabantay. Nakita umano niya ang sapatos ng kanyang kapatid sa nasabing lugar kung kayat pumasok siya sa audio visual room.
Gayunpaman, hinarangan umano siya ng kanyang pinsang lalaki na nasa loob at inilock ang pinto.
Muli umanong bumalik ang kapatid ng biktima kasama ang kanyang ina pasado alas dos ng hapon upang ipagpatuloy ang paghahanap sa kapatid. Dito na nakita ang walang buhay na katawan ng dalagita. Agad silang nanghingi ng tulong bagamat walang signal ng cellphone sa nasabing lugar at nataon pang brownout nang maganap ito.
Nakasaad sa report ng pulisya na napatay sa pamamagitan ng “asphyxsia by strangulation” o pagsakal base sa pagsusuri ng doktor na nageksamin sa kanya.
Nang magresponde ang pulisya, agad na nagsagawa ng hot putsuit operation kontra sa 17 anyos na itinuring ng Child in Conflict with the Law(CICL) na tumakas na sa nasabing lugar. Sa tulong ng ama ng suspek na kapatid ng nanay ng biktima, natunton ang CICL sa bahay ng kanyang lolo sa Barangay Dine, na halos tatlong oras nang lalakarin bago marating.
Nasa kustodiya na ng Kasibu PNP ang menor de edad,kasama ang MSWD at magulang para sa kaukulang imbestigasyon.
📸NVPPO
