Magnum C - Caraga Region News

31/07/2026

𝗠𝗗𝗥𝗥𝗠𝗢, 𝗕𝗙𝗣 𝗨𝗚 𝗣𝗖𝗚 𝗕𝗨𝗘𝗡𝗔𝗩𝗜𝗦𝗧𝗔 𝗡𝗔𝗚𝗛𝗜𝗨𝗦𝗔 𝗦𝗔 𝗣𝗔𝗚𝗣𝗔𝗟𝗜𝗚-𝗢𝗡 𝗦𝗔 𝗗𝗜𝗦𝗔𝗦𝗧𝗘𝗥 𝗥𝗘𝗦𝗣𝗢𝗡𝗦𝗘

Nagkahiusa ang Municipal Disaster Risk Reduction and Management Office (MDRRMO) Buenavista, Bureau of Fire Protection (BFP) Buenavista, ug Philippine Coast Guard (PCG) Buenavista sa pagpahigayon og duha ka adlaw nga Skills Enhancement Training alang sa Disaster Control Group niadtong Hulyo 30 ug 31, 2026.

Sa unang adlaw, nagtudlo ang PCG og mga leksyon sa paglangoy, water safety, ug sea protocols, samtang ang MDRRMO nagpahigayon og refresher course sa Basic Life Support (BLS )aron mapalig-on ang kahibalo sa mga responder sa paghatag og unang tabang panahon sa emerhensiya.

Sa ikaduhang adlaw, ang BFP Buenavista nagtudlo sa fire safety, fire suppression, ug emergency response pinaagi sa lecture ug praktikal nga mga ehersisyo.

Tumong sa maong pagbansay ang pagpalig-on sa koordinasyon, kahibalo, ug kahandam sa mga responder aron mas epektibo nilang mapanalipdan ang kinabuhi, kabtangan, ug komunidad sa Buenavista panahon sa kalamidad ug uban pang emerhensiya.

31/07/2026

𝗟𝗣𝗔 𝗠𝗔𝗚𝗗𝗔𝗟𝗔 𝗢𝗚 𝗨𝗟𝗔𝗡 𝗦𝗔 𝗨𝗕𝗔𝗡𝗚 𝗕𝗔𝗛𝗜𝗡 𝗦𝗔 𝗩𝗜𝗦𝗔𝗬𝗔𝗦 𝗨𝗚 𝗠𝗜𝗡𝗗𝗔𝗡𝗔𝗢

Gipaabot sa PAGASA ang pag-ulan sa pipila ka bahin sa Visayas ug Mindanao tungod sa trough o tumoy sa Low Pressure Area (LPA), bisan pa og gamay ra ang posibilidad nga kini mahimong bagyo.

Lakip sa mga lugar nga mahimong maapektuhan sa ulan ang Northern Mindanao, Caraga Region, Davao Region, Masbate, Sarangani, ug South Cotabato.

Sumala sa PAGASA, ang LPA katapusang namatikdan sa gilay-on nga 1,315 kilometros sa sidlakan sa Southeastern Luzon ug nagpabilin pa kini sa gawas sa Philippine Area of Responsibility (PAR).

Samtang, gilauman nga magpadayon ang hayag ug maayong panahon sa Metro Manila ug sa kadaghanan sa ubang mga bahin sa nasod.

31/07/2026

𝗕𝗔𝗚-𝗢𝗡𝗚 𝗔𝗖𝗧𝗜𝗡𝗚 𝗖𝗜𝗧𝗬 𝗝𝗔𝗜𝗟 𝗪𝗔𝗥𝗗𝗘𝗡, 𝗚𝗜𝗗𝗔𝗪𝗔𝗧 𝗦𝗔 𝗦𝗨𝗥𝗜𝗚𝗔𝗢 𝗖𝗜𝗧𝗬 𝗝𝗔𝗜𝗟

Mainitong gidawat sa mga personnel sa Surigao City Jail si JSINSP Bernard G. Pobe isip bag-ong Acting City Jail Walden.

Sa maong pagdawat, gipadayag sa mga personnel ang ilang suporta ug paglaom sa iyang pagpangulo, giya, ug dedikasyon sa pagpadayon sa misyon sa Bureau of Jail Management and Penology (BJMP).

Gilauman nga ubos sa iyang liderato, mapalig-on pa ang paghatag og luwas, sigurado, makatawhanon, ug rehabilitatibong serbisyo alang sa mga Persons Deprived of Liberty (PDLs) samtang ginatuman ang mandato sa ahensya.

31/07/2026

31/07/2026

𝟮𝗡𝗗 𝗦𝗨𝗥𝗜𝗚𝗔𝗢 𝗗𝗘𝗟 𝗦𝗨𝗥 𝗣𝗠𝗙𝗖, 𝗡𝗔𝗚𝗛𝗜𝗠𝗢 𝗢𝗚 𝗖𝗢𝗨𝗥𝗧𝗘𝗦𝗬 𝗩𝗜𝗦𝗜𝗧 𝗦𝗔 𝗣𝗥𝗢𝗕𝗜𝗡𝗦𝗬𝗔𝗟 𝗡𝗚𝗔 𝗣𝗔𝗡𝗚𝗚𝗔𝗠𝗛𝗔𝗡𝗔𝗡

Naghimo og courtesy visit si PLTCOL Nelson C. Nelmida, Force Commander sa 2nd Surigao del Sur Provincial Mobile Force Company (PMFC), sa Provincial Government of Surigao del Sur isip kabahin sa pagpalig-on sa koordinasyon ug panag-uban tali sa kapulisan ug lokal nga panggamhanan.

Sa maong pagbisita, si Provincial Administrator John Vincent C. Pimentel ang midawat sa delegasyon isip representante sa Provincial Government.

Gipasalamat usab ang iyang pag-atiman ug pagdumala aron mahimong hapsay ug mabungahon ang maong panagtagbo.

Gipasiugda sa duha ka panig nga nagpabiling lig-on ang panagtambayayong tali sa Philippine National Police ug sa Provincial Government sa pagmintinar sa kalinaw, kalig-on ug seguridad sa Surigao del Sur.

Subay niini, gipadayag usab ang padayon nga paningkamot sa duha ka sektor sa pagsiguro nga ang lalawigan magpabiling luwas, malinawon ug andam alang sa dugang pang kalamboan ug pag-uswag.





,share,follow

31/07/2026

𝟯𝟵 𝗔𝗡𝗬𝗢𝗦 𝗡𝗚𝗔 𝗟𝗔𝗟𝗔𝗞𝗜, 𝗡𝗔𝗦𝗜𝗞𝗢𝗣 𝗦𝗔 𝗕𝗨𝗬-𝗕𝗨𝗦𝗧 𝗢𝗣𝗘𝗥𝗔𝗧𝗜𝗢𝗡 𝗦𝗔 𝗕𝗜𝗦𝗟𝗜𝗚 𝗖𝗜𝗧𝗬

Nasikop sa usa ka buy-bust operation sa kapulisan ang usa ka 39 anyos nga lalaki sa Purok 3, Gamaon District, Barangay Mangagoy, Bislig City, alas-9:00 sa gabii niadtong Hulyo 30.
Ang nadakpan giila lamang sa alyas nga "Boy," walay trabaho ug residente sa maong lugar. Ang operasyon gipahigayon sa Bislig Component City Police Station sa pakigtambayayong sa Regional Intelligence Division 13, Surigao del Sur Police Provincial Office Provincial Intelligence Unit, Provincial Drug Enforcement Unit, ug sa Philippine Drug Enforcement Agency (PDEA).

Narekober gikan sa suspek ang upat ka sachet nga gituohang adunay shabu, nga adunay kinatibuk-ang gibana-banang timbang nga usa ka gramo ug gibanabanaang kantidad nga ₱6,800. Apil usab sa mga nasakmit ang buy-bust money ug nagkadaiyang drug paraphernalia.

Human sa pagrekisa, pagmarka ug inventory sa mga ebidensya, gidala ang suspek ngadto sa Bislig Component City Police Station alang sa hustong dokumentasyon ug pagpasaka sa kasong paglapas sa Republic Act 9165 o ang Comprehensive Dangerous Drugs Act of 2002.

Samtang, gipadayon sa kapulisan ang ilang pahimangno sa publiko nga ang aktibong kooperasyon sa komunidad maoy usa sa labing epektibong paagi aron mapugngan ang pagbaligya ug paggamit sa ilegal nga droga ug mapadayon ang kalinaw ug kahapsay sa Bislig City.





,share,follow

31/07/2026

𝗛𝗜𝗡𝗔𝗧𝗨𝗔𝗡 𝗠𝗣𝗦, 𝗡𝗔𝗚𝗛𝗜𝗠𝗢 𝗢𝗚 𝗖𝗢𝗠𝗠𝗨𝗡𝗜𝗧𝗬 𝗢𝗨𝗧𝗥𝗘𝗔𝗖𝗛 𝗦𝗔 𝗥𝗢𝗫𝗔𝗦 𝗡𝗔𝗧𝗜𝗢𝗡𝗔𝗟 𝗛𝗜𝗚𝗛 𝗦𝗖𝗛𝗢𝗢𝗟

Nagpahigayon og Community Outreach Program ang Hinatuan Municipal Police Station (MPS) sa Roxas National High School sa Barangay Roxas, Hinatuan, Surigao del Sur, isip kabahin sa padayon nga kampanya sa kapulisan sa pag-edukar sa mga kabatan-onan bahin sa kaluwasan ug pagsunod sa balaod.

Gipangulohan ang kalihokan ni PCMS Yodelou C. Gascon ubos sa pagdumala ni PMAJ Nurlsan T. Muhadalam, OIC sa Hinatuan MPS, uban sa partisipasyon ni Ms. Janniyah P. Barrios, Registered Social Worker gikan sa Municipal Social Welfare and Development (MSWD) Office.

Atol sa Information and Education Campaign o IEC, gipasabot sa mga estudyante ang nagkalain-laing mga hilisgutan sama sa Drug Awareness, Republic Act 9262 o Anti-Violence Against Women and Their Children Act, Republic Act 8353 o Anti-Rape Law, Republic Act 9344 o Juvenile Justice and Welfare Act, Anti-Bullying Awareness, ug ang Safe Spaces Act o Republic Act 11313.

Tumong sa maong kalihokan ang pagpalambo sa kahibalo sa mga estudyante bahin sa pagpugong sa krimen, personal nga kaluwasan, responsableng pagkalungsoranon, ug sa importansya sa pagtahod ug pagsunod sa mga balaod.

Aktibong mitambong ang mga estudyante sa Roxas National High School, nga nagpakita sa ilang interes ug dedikasyon sa pagkahimong responsableng, disiplinado ug masinugtanon nga mga miyembro sa komunidad.





,share,follow

31/07/2026

𝗖𝗜𝗧𝗬 𝗧𝗢𝗨𝗥𝗜𝗦𝗠 𝗢𝗙𝗙𝗜𝗖𝗘
𝗨𝗚 𝗣𝗥𝗢𝗩𝗜𝗡𝗖𝗜𝗔𝗟 𝗧𝗢𝗨𝗥𝗜𝗦𝗠 𝗢𝗙𝗙𝗜𝗖𝗘, 𝗡𝗔𝗚𝗛𝗜𝗨𝗦𝗔 𝗦𝗔 𝗣𝗔𝗚𝗣𝗔𝗦𝗜𝗚-𝗨𝗟𝗜 𝗦𝗔 𝗞𝗨𝗟𝗧𝗨𝗥𝗔𝗟 𝗡𝗚𝗔 𝗣𝗔𝗡𝗨𝗟𝗢𝗡𝗗𝗢𝗡

Opisyal nang gisugdan sa City Government of Bislig, pinaagi sa City Tourism Office ug sa pakigtambayayong sa Provincial Tourism Office, ang tulo ka adlaw nga Beadwork Training niadtong Hulyo 30 aron mapalambo ang lokal nga kultura, kahanas ug pagkamamugnaon sa mga lumulupyo.

Gitambongan kini sa mga partisipante nga interesado sa pagkat-on sa beadwork, usa ka tradisyonal nga porma sa paghimo og mga dekorasyon ug handicrafts nga adunay dakong papel sa pagpreserbar sa lokal nga kultura.

Sa mensahe nga gipadayag alang kang City Mayor Florencio C. Garay, gipasiugda ni Executive Assistant IV Milly U. Vios ang lig-on nga suporta sa kagamhanan sa siyudad sa pag-amuma sa kultural nga panulondon ug sa pagdasig sa lokal nga mga artista ug mga mananahi.

Gipangulohan ang pagbansay ni Daniel L. Tacbas, Assistant Professor I ug Cultural Coordinator, kinsa mipasabot sa katuyoan sa programa ug sa mga kalihokan nga pagahimoon sulod sa tulo ka adlaw nga workshop.

Padayon ang maong pagbansay sa mosunod pang duha ka adlaw aron mahatagan ang mga partisipante og praktikal nga kasinatian sa beadwork, samtang gipalig-on usab ang pagpreserbar sa lokal nga tradisyon ug ang pag-uswag sa creative community sa Bislig City.





,share,follow

30/07/2026