https://www.facebook.com/110781098228729/

BulakeNews, Barangay Lolomboy, Bocaue (2026)

10/10/2025

PANIBAGONG MALAKAS NA LINDOL, TUMAMA SA DAVAO ORIENTAL NGAYONG GABI

Muling niyanig ng malakas na magnitude 6.9 na lindol ang Manay, Davao Oriental kaninang alas-7:12 ng gabi ngayong Biyernes, Oktubre 10, ilang oras lamang matapos tumama ang magnitude 7.4 na lindol kaninang umaga.

Ang panibagong pagyanig sa Davao Oriental ay kasing lakas nag tumamang magnitude 6.9 na lindol sa Cebu noong Setyembre 30.

Ayon sa Philippine Institute of Volcanology and Seismology (PHIVOLCS), ang pinakabagong lindol ay naitala sa 36 kilometers ng timog-silangan ng Manay, Davao Oriental.

May lalim itong 10 kilometro at tectonic ang pinagmulan.

Naramdaman ang Intensity IV sa Davao City at Bislig City sa Surigao del Norte.

Parehong intensity din ang naramdaman sa iba pang lugar gaya ng Magpet, Cotabato; Digos City, Davao del Sur; Sta. Maria, Davao Occidental; Nabunturan, Davao de Oro; Gingoog City, Misamis Oriental; Malungon, Alabel, Sarangani; Tupi, South Cotabato; at Hinunangan, Southern Leyte.

Kaugnay nito, nag-isyu ang Phivolcs ng tsunami alert kasunod ng aftershock.

Inaasahang ang unang bugso ng tsunami sa pagitan ng alas-7:12 ng gabi hanggang alas-9:12 ng gabi at maaaring magpatuloy pa ang malalaking alon sa loob ng ilang oras.

Kaugnay nito, inaabisuhan ang mga residente malapit sa mga baybayin sa nabanggit na mga probinsiya na agad lumikas sa mas mataas na lugar o sa mas ligtas na lugar.

Nagbabala rin ang Phivolcs sa mga pinsala at aftershocks kasunod ng panibagong lindol.

10/10/2025

UNANG LOCALLY FUNDED MRI FACILITY SA BULACAN, PINASINAYAAN

Isang makasaysayang hakbang sa larangan ng kalusugan ang naisakatuparan sa lalawigan ng Bulacan matapos buksan ang kauna-unahang locally funded Magnetic Resonance Imaging (MRI) facility sa Bulacan Medical Center (BMC) sa Lungsod ng Malolos nitong Huwebes, Oktubre 9.

Pinangunahan ni Governor Daniel R. Fernando ang pagpapasinaya sa bagong MRI Section sa ilalim ng Department of Radiology ng BMC. Ayon sa gobernador, ito ay isang malaking katuparan ng kanyang layuning maihatid ang abordable, ligtas, at de-kalidad na serbisyong pangkalusugan para sa lahat ng Bulakenyo.

“Natupad na po ang pangarap natin,” ani Fernando.
“Matagal na po nating pangarap ito—na magkaroon ang BMC ng ganitong high-tech na medical equipment. Ngayon, hindi na kailangang gumastos nang malaki o bumiyahe pa ng malayo para sa MRI scan dahil mayroon na tayong sariling world-class MRI unit na kayang magsagawa ng detalyado at komprehensibong pagsusuri sa iba’t ibang bahagi ng katawan.”

Binigyang-diin din ni Fernando sa mga healthcare workers ang kahalagahan ng paglilingkod nang may malasakit sa bawat pasyente.

Ayon kay Dr. Alberto D. Gabriel, hepe ng Department of Radiology, ang bagong MRI machine ay maaaring gamitin para sa pagsusuri ng utak, gulugod, tuhod, kalamnan, at tiyan, at kayang tumanggap ng walo hanggang sampung pasyente bawat araw. Bukas din ito para sa serbisyo pitong araw sa isang linggo.

“Sa aking mga minamahal na Bulakenyo, bukas na po ang ating MRI sa BMC. Pumunta lamang kayo, at kami ay handang maglingkod sa inyo,” ani Gob. Fernando.

10/10/2025

SINKHOLE, IKINABABAHALA NG MGA RESIDENTE SA SAN JOSE DEL MONTE

Nagdulot ng pangamba sa mga residente ng Barangay San Manuel, Lungsod ng San Jose del Monte, Bulacan ang biglaang paglitaw ng mga sinkhole sa kanilang lugar.

Ayon kay Barangay Chairman Gilbert Baptista, mayroong limang sinkhole na natagpuan malapit sa mga kabahayan, ang ilan dito ay may habang limang metro. Isa sa mga ito ay matatagpuan sa Diamond Crest Village, Pleasant Hills Subdivision, at ang isa naman ay sa Perga Street, Phase 5, Pleasant Hills Subdivision.

Ibinahagi rin ni Baptista na noong nakaraang taon ay may tatlong sinkhole ding lumitaw sa likuran ng Savano Hotel sa Molave Street, Phase 6 ng nasabing subdivision.

Ayon sa opisyal, naiparating na nila ang ulat sa lokal na pamahalaan ng San Jose del Monte, at agad namang nagpadala ng inspection team mula sa City Engineering Office upang magsagawa ng pagsusuri at agarang aksyon.

Isa sa mga sinkhole ay nasa harapan mismo ng bahay ni Alexander Bitales, isa sa mga residente.
Kwento ni Bitales, napansin niya ang sinkhole noong nakaraang buwan pa lamang kaya nilagyan niya ito ng mga bato upang hindi bumigay ang pundasyon ng kanyang bahay. Umaasa siya na agad na aaksyon ang mga awtoridad upang maiwasan ang posibleng panganib sa mga residente.

Batay sa ulat ng lokal na pamahalaan, ang tuloy-tuloy na pag-ulan kamakailan ang isa sa mga itinuturong dahilan ng pagguho ng lupa at paglitaw ng mga sinkhole.

Samantala, noong 2015, iniwan ng lokal na pamahalaan ang Karahume Elementary School sa naturang lungsod matapos tukuyin ng Philippine Institute of Volcanology and Seismology (PHIVOLCS) na ang paaralan ay nakatayo mismo sa ibabaw ng West Marikina Valley Fault. Ang fault line ay dumaraan sa gitna ng gusali ng paaralan, at makikita ang mga bitak sa mga pader at sahig ng mga silid-aralan.

10/10/2025

ANIM NA HAPONES, ARESYADO SA BULCAN AT QUEZON

Iniulat ng Bureau of Immigration (BI) nitong Huwebes ang pagkakaaresto ng anim na Japanese nationals sa magkakahiwalay na operasyon.

Ayon sa BI, lima sa anim na suspek ay umano’y konektado sa JP Dragon gang, isang grupong kilala sa mga kasong pandaraya at pagnanakaw sa Japan. Naaresto ang mga suspek nitong Martes at pawang may mga kasong fraud, theft, at forgery sa kanilang bansa.

Sa San Jose del Monte, Bulacan, nadakip si Yukio Monde, 53 anyos, na may kasong palsipikasyon ng dokumento at pandaraya sa Hiroshima, Japan.

Samantala, sa Lucena City, natimbog naman si Norichika Harada, 48 anyos, na hinahanap dahil sa pagnanakaw matapos umanong magpanggap bilang alagad ng batas upang linlangin ang mga matatandang biktima.

Sa parehong araw, sa Candelaria, Quezon, naaresto rin sina Nobuyuki Arima (45), Yano Yuya (32), Iwamoto Miyako (34), at Ayumi Osawa (33). Ayon sa mga awtoridad, pinapatakbo umano ng grupo ang isang online scam hub gamit ang iba’t ibang numero ng telepono at mga pekeng dokumento.

Sinabi ng BI na ang anim na suspek ay kasalukuyang sumasailalim sa deportation proceedings at ilalagay sa blacklist upang hindi na muling makapasok sa bansa.

10/10/2025

TINAGURIANG ‘HAUNTED HOSPITALS’ NG DOH, OVERPRICED FARM-TO-MARKET ROADS NG DA PWEDENG ISABAY SA PAGIIMBESTIGA NG ICI - MALAKANYANG

Bukas ang Malakanyang na isabay sa imbestigasyon sa mga anomalya sa flood control projects ang iba pang kwestyonableng proyekto ng gobyerno.

Pahayag ito ng Palasyo sa gitna ng ulat na mayroong ‘haunted hospitals’ ang Department of Health habang extremely overpriced naman umano ang mga farm-to-market roads ng Department of Agriculture.

Sa press briefing, sinabi ni Palace Press Officer Claire Castro na lahat ng maanomalyang proyektong pang-imprastraktura ay maaaring imbestigahan ng Independent Commission for Infrastructure.

Kaya kung mayroon anyang mga dokumento ay maaaring ibigay agad sa ICI para maipatawag ang mga sangkot.

Una rito, naghain ng resolusyon si Rep. Leila De Lima na nagpapa-imbestiga sa umano’y pag-aaksaya ng pondo ng DOH na nagresulta sa abandonado o hindi kumpleto at non-operational hospitals, health centers, at mga katulad na pasilidad.

Ibinunyag naman ni Sen. Sherwin Gatchalian na higit P10 bilyon ang naluging pondo ng gobyerno dahil sa umano’y overpricing ng farm-to-market road projects ng DA mula 2023 hanggang 2024.

10/10/2025

KLASE SA BAGUIO, SINUSPINDE DAHIL SA LINDOL; ILANG MAG-AARAL, NAHIMATAY

Sinuspinde ang klase mula pre-school hanggang senior high school sa lungsod ng Baguio matapos ang isang lindol na yumanig sa ilang bahagi ng Cordillera Region, umaga nitong Huwebes, Oktubre 9, 2025.

Ayon sa ulat ng Philippine Institute of Volcanology and Seismology (PHIVOLCS), naitala ang lindol sa lakas na Magnitude 4.4 na may epicenter sa bayan ng Pugo, La Union.

Bagaman hindi kalakasan ang magnitude, umabot sa Intensity V ang naramdaman sa Baguio City, dahilan upang agad na ipatupad ang suspensyon ng klase bilang pag-iingat.

Dahil sa malakas na pagyanig, agad na pinalabas ang mga pasyente at kawani ng Cancer Center ng Baguio General Hospital and Medical Center upang matiyak ang kanilang kaligtasan. Sa isang hotel sa lungsod, napilitang lumikas ang mga panauhin at kalahok ng isang pagtitipon matapos maramdaman ang pag-uga ng gusali.

Ilang mag-aaral naman sa Baguio City National High School ang hinimatay dahil sa matinding takot at gulat dulot ng pagyanig.

Kaugnay nito, nakikipag-ugnayan na ang City Building and Architecture Office, sa pangunguna ni Architect Johnny Degay, sa mga administrador ng paaralan, mall, at iba pang pampubliko at pribadong gusali upang masigurong ligtas ang mga estruktura at walang nasira sa gitna ng lindol.

Tiniyak din ng lokal na pamahalaan na isinasagawa ang assessment sa mga pangunahing gusali sa lungsod.

Nagpaalala si Albert Mogol, Regional Director ng Office of the Civil Defense – Cordillera, sa publiko na laging maging handa at sundin ang tamang hakbang sa oras ng lindol gaya ng “Duck, Cover, and Hold.”

Hinihikayat rin ng ahensya ang mahigpit na pagsunod sa mga protocol upang maiwasan ang anumang disgrasya sakaling magkaroon ng mga aftershock.

Sa ngayon, patuloy na binabantayan ng mga awtoridad ang sitwasyon habang nagpapatuloy ang pagsusuri sa posibleng pinsala sa iba’t ibang bahagi ng lungsod.

10/10/2025

CONGRESSMAN BARZAGA, MAGHAHAIN NG IMPEACHMENT COMPLAINT LABAN KAY PBBM

Nagbigay ng sorpresa si Cavite 4th District Rep. Francisco “Kiko” Barzaga sa kanyang latest vlog nang ipakita ang impeachment complaint na inihanda laban kay Pangulong Ferdinand Marcos Jr.

Sa kanyang vlog na ipinalabas noong Oktubre 8, sinabi ni Barzaga, “Welcome back to the crocodile farm”, isang banat sa kanyang mga kasamahan sa Kongreso.

Ayon kay Barzaga, ang impeachment ay nakabatay sa “paglabag sa tiwala ng publiko” at layunin niyang tanggalin si Marcos upang magsimula ng imbestigasyon sa mga anomalya sa flood control projects.

Ang impeachment complaint ay kailangang isumite kay House Secretary General upang opisyal na maisagawa. Kung itutuloy, ito ang magiging kauna-unahang impeachment complaint laban kay Marcos.

Si Marcos na rin ang nagbunyag ng mga alleged anomalies sa flood mitigation projects ng gobyerno. Bilang tugon, bumuo ang Malacañang ng Independent Commission for Infrastructure (ICI) upang imbestigahan ang isyu.

10/10/2025

ROMUALDEZ, HANDANG HUMARAP SA IMBESTIGASYON NG ICI

Tiniyak ni Leyte 1st District Rep. Ferdinand Martin Romualdez na ito ay haharap sa imbestigasyon ng Independent Commission for Infrastructure (ICI).

Sinabi ng kampo nito na natanggap na ng dating House Speaker ang imbitasyon mula sa ICI.

Dagdag pa nito na ang pagharap sa imbestigasyon ay tsansa para maipaliwanag ang panig nito sa pagkakasangkot niya sa maanomalyang flood control projects.

Itinanggi rin ng kampo ng dating House Speaker ang lumabas na balita na ito ay nagtatago na sa ibang bansa.

10/10/2025

ICI, NAGLABAS NG LOOKOUT ORDER SA 33 NA PERSONALIDAD NA KASAMA SA IIMBESTIGAHAN HINGGIL SA FLOOD-CONTROL SCANDAL

Humiling ng Immigration Lookout Bulletin Order (ILBO) ang Independent Commission for Infrastructure (ICI) sa Department of Justice (DOJ) at Bureau of Immigration (BI) laban sa 33 personalidad na iniimbestigahan kaugnay sa umano’y flood control scandal.

Ayon kay ICI Spokesperson Atty. Brian Keith Hosaka, bahagi ito ng fact-finding process ng komisyon upang mapabilis ang pangangalap ng impormasyon at maiwasan ang anumang pagkaantala sa imbestigasyon.

Nilinaw ni Hosaka na hindi nangangahulugang awtomatikong ipatatawag ng komisyon ang lahat ng nasa listahan, dahil nakadepende pa rin ito sa magiging takbo ng kanilang imbestigasyon. Aniya, ang ilang personalidad ay humarap na rin sa mga pagdinig nitong mga nakaraang araw. Dagdag pa niya, agad nilang isusumite sa DOJ ang naturang listahan para sa pormal na aksyon.

Kabilang sa mga isinama sa ILBO ay ang mga sumusunod:

Congressman Ferdinand Martin Romualdez, Sr.�Senator Francis Joseph “Chiz” Escudero�Senator Jose “Jinggoy” Ejercito Estrada�Senator Emmanuel “Joel” Villanueva�Former Senator Ramon “Bong” Revilla Jr.�Mayor Maria Lourdes Binay Angeles�Commissioner Mario G. Lipana�Marilou Laurio-Lipana�Undersecretary Trygve L. Olaivar�Carlene Villa�Maynard Ngu�Cong. Roman Romulo�Cong. James “Jojo” Ang�Cong. Patrick Michael “PM” Vargas�Congr. Juan Carlos “Arjo” Atayde�Cong. Nicanor “Nikki” Briones�Cong. Marcelino “Marcy” Teodoro�Cong. Florida “Rida” Robes�Cong. Eleandro Jesus Madrona�Cong. Benjamin “Benjie” Agarao�Former Cong. Florencio Gabriel “Bem” Noel�Cong. Leody “Ode” Tarriela�Cong. Reynante “Reynan” Arogancia�Former Cong. Marvin Rillo�Cong. Teodorico “Teodoro” Haresco, Jr.�Cong. Antonieta Eudela�Cong. Dean Assistio�Cong. Marivic Co-Pilar�District Engr. Loida Busa �“Bogs” Magalong�District Engr. Ramon Devanadera�District Engr. Johnny Protesta, Jr.�District Engr. Arturo Gonzales Jr.

10/10/2025

OMBUDSMAN, MAARING MAGSAGAWA NG SARILING IMBESTIGASYON SA FLOOD CONTROL SCANDAL SA KABILA NG IBA PANG IMBESTIGASYON - GORDON

Binigyang-diin ni dating Senator Richard Gordon na maaari ring magsagawa ng motu proprio investigation ang Office of the Ombudsman ukol sa anomalyang bumabalot sa mga infrastructure project ng bansa.

Ito ay sa kabila ng mga serye ng imbestigasyong isinasagawa ng iba’t-ibang ahensiya at sangay ng pamahalaan tulad ng Department of Justice (DOJ), Independent Commission for Infrastructure (ICI), at ang naunang pagdinig na ginawa ng Kamara de Representantes at ng Senado.

Ayon kay Gordon, maaari ring magsagawa ng sariling imbestigasyon ang Ombudsman at agad maghain ng mga kaso, kahit hindi hinihintay ang resulta ng imbestigasyong isinasagawa ng ibang ahensiya.

Giit ng dating Senate Blue Ribbon Committee Chairman, dati na niyang tinatawagan ang Ombudsman noong siya pa ay Senador upang igiit na magsagawa ang constitutional anti-graft body ng sarili nitong hiwalay na pagsisiyasat, oras na may nakita o napansin itong iregularidad.

Inihalimbawa ng batikang Senador ang halos araw-araw na daan-daang milyong piso ang inilalabas ng mga kontraktor gayong napakaliit na halaga lamang ang kanilang kapital, ilan dito ay mas mababa pa sa isang milyon.

Dito pa lamang aniya ay matutukoy na ng Ombudsman na may iregularidad na nangyayari sa kalakaran ng mga flood control project sa bansa.

Kahapon ay opisyal nang itinalaga si dating DOJ Secretary Jesus Crispin Remulla bilang Tanodbayan, ilang buwan matapos magretiro si dating Ombudsman Samuel Martires.

Bago umalis sa DOJ, sinimulan na rin ni Remulla ang imbestigasyon sa flood control scandal, sa tulong ng National Bureau of Investigation, kabilang dito ang umano’y pagtanggap ng ilang mambabatas ng donasyon mula sa mga government contractor.

10/10/2025

BIR, NAGSAMPA NG P7.1 BILYONG PISONG TAX EVASION CASE LABAN SA DISCAYA COUPLE

Pormal nang isinampa ng Bureau of Internal Revenue (BIR) ang kasong tax evasion laban sa mag-asawang Sarah at Curlee Discaya, matapos matuklasan ang umano’y hindi pagbabayad ng buwis na umaabot sa mahigit P7.1 bilyon.

Personal na inihain ni BIR Commissioner Romeo Lumagui Jr. ang reklamo sa Department of Justice (DOJ) ngayong umaga, kasabay ng pagsasampa rin ng kaso laban sa isang corporate officer ng St. Gerard Construction Gen. Contractor and Development Corporation, kung saan konektado ang Discaya couple.

Ayon sa BIR, lumabas sa kanilang masusing pagsusuri na may malalaking tax deficiencies ang kompaniya at ang mga opisyal nito, kabilang ang hindi deklaradong kita at hindi tamang pag-file ng tax returns.

Ang hakbang na ito ay bahagi ng pinaigting na kampanya ng ahensya laban sa mga malalaking tax evaders sa bansa.

Sa ilalim ng Run After Tax Evaders (RATE) Program ng BIR, layunin nitong papanagutin ang mga indibidwal at korporasyong lumalabag sa batas sa pagbubuwis, upang mapalakas ang koleksyon ng pondo para sa mga pangunahing serbisyo ng pamahalaan.

08/10/2025

HABAGAT, NAGTAPOS NA; AMIHAN, POSIBLENG MAGSIMULA NA

Opisyal nang idineklara ng state weather bureau ang pagtatapos ng Habagat season o southwest monsoon sa bansa.

Pangunahing umiiral ito sa rehiyon ng western Luzon at Visayas.

Ibig sabihin, tapos na ang panahon ng tag-ulan sa mga nasabing lugar, at inaasahang magsisimula na ang pag-iral ng Amihan o northeast monsoon sa mga susunod na linggo.

Gayunman, magkakaroon muna ng monsoon break at inaasahang lalakas ang easterlies.

Ang Habagat ay karaniwang nagdadala ng malalakas na ulan, lalo na sa kanlurang bahagi ng bansa, mula Hunyo hanggang Setyembre.

Sa pagtatapos nito, inaasahan ang mas malamig na simoy ng hangin, mas kaunting pag-ulan, at paglamig ng temperatura sa hilagang bahagi ng Luzon, mga palatandaan ng papasok na Amihan.

Ayon sa ahensya, ang paglipat ng panahon ay may epekto rin sa agrikultura, kalusugan, at paghahanda sa mga posibleng bagyo na maaaring pumasok sa huling bahagi ng taon.

Ang Amihan ay inaasahang magtatagal hanggang sa unang bahagi ng 2026, at kadalasang nagdadala ng malamig at tuyong hangin mula Siberia at China patungo sa Pilipinas.

BulakeNews

10/10/2025

10/10/2025

10/10/2025

10/10/2025

10/10/2025

10/10/2025

10/10/2025

10/10/2025

10/10/2025

10/10/2025

10/10/2025

08/10/2025

Address

Telephone

Website

Alerts

Contact The Business

Shortcuts

Share

Category