15/09/2024
DOSE KA MGA BARANGAY SA NEGROS OCCIDENTAL NALAKIP SA POSIBLE MAAPEKTUHAN SANG LAVA FLOW KUN MAGLUNTAD ANG MAGMATIC ERUPTION SANG BULKAN KANLAON
Ginpaguwa sang Philippine Institute of Volcanology and Seismology (PHIVOLCS) ang listahan sang mga lugar nga posible maapektuhan sang lava flow sang Bulkan Kanlaon sa tion nga magluntad ang magmatic eruption.
Ang mga lokal nga gobyerno sa probinsya sang Negros Occidental nga apektado amo ang banwa sang La Castellana, Moises Padilla siudad sang Bago kag La Carlota.
Base sa ginpaguwa nga datus sang PHIVOLCS, pinakamadamo nga Barangay nga posible maapektuhan sang Lava Flow ang banwa sang La Castellana sa diin naglambot sa 9 ka mga Barangay nga amu ang Biak na Bato, Cabagnaan, Masulog, Puso, Cabacungan, Manghanoy, Mansalanao, Camandag kag Sag-Ang.
Ang Barangay Guinpana-an sa banwa sang Moises Padilla, Barangay San Miguel sa siudad sang La Carlota kag Barangay Ilijan sa siudad sang Bago ang nalakip man sa Lava Flow Hazard Map nga ginpaguwa sang Phivolcs.
Sa dose ka mga Barangay, ang Biak na Bato kag Cabagnaan ang ginakabig "High Danger Area" sang Lava Flow.
Nahibaloan, ang magma ukon molten rock ang makit-an sa idalom sang Bulkan ukon sa Magma Chamber. Ang magma chamber amu ang pinaka madalom nga parte sang Bulkan nga may kadalumon nga 1 tubtub 10 kilometros depende sa Bulkan. Ang magma ang may kumbinasyon sang volatiles parehos sang water v***r kag carbon dioxide kag solid minerals. Nagaluntad ang magmatic eruption bangud sa pressure kag formation sang gas bubbles nga ara sa sulod sang Bulkan. Ang temperatura sini nagalambot halin 600°c tubtub 1,300°c.
Samtang, ang lava na man, sa tion nga magluntad ang magmatic eruption kag maguwa na sa surface sang Bulkan ginatawag na ini nga lava. Ang temperatura sini ang nagadangat sa halin 700°c tubtub 1,200°c.*dc
