02/12/2025
Viral ka te..
Asawa mikatkat ug misuksok sa kisame sa motel human nasakpan sa bana nga mi-check in kauban sa kabit nga seaman
Nagtingkagol karon sa bilanggoan sa station 2 sa Mandaue City Police Office ang usa ka asawa ug ang giingong kabit nga seaman, 43 anyos, taga Bukidnon.
Ang bana nga usa usab ka seaman ug kining iyang asawa nga polos naa sa early 40's, nagpuyo sa Talisay City kauban sa 3 ka anak.
Ang International boxing judge Edward Ligas, program anchor sa dyLA, miingon nga nagpatabang niya ang bana kaganihang buntag kay nasundan niini ang asawa kauban ang kabit nga seaman ngadto sa motel sa Mandaue City.
Si Ligas nga amigo sa bana, gihangyo sa bana nga manawag og polis human nga nasundan niya sa Moonlight motel ang iyang asawa ug kabit.
Sa asoy ni Ligas sa iyang programa, ang bana ug asawa nagkuyog pa og sakay sa taxi kay ang asawa paingon sa trabaho, samtang ang bana minaug ra sab dapit ra sa Dumlog.
Apan nagduda na ang bana nga moadto kini sa iyang kolokadidang, mao nga pagbiya sa sa taxi, misakay sab siya og laing taxi aron sundan.
Dugang ni Ligas, nakit-an sa bana nga ang taxi sa asawa mipaingon sa pier area sa Cebu City ug gipasakay kining seaman, dayon milahos sa Moonlight motel.
Ang bana naghuwat sa gate sa motel ug gitawgan si Ligas aron magdala og polis.
Pag-abot sa mga polis, daw nakabantay na ang asawa ug ang seaman.
Matod ni Ligas, migawas na ang seaman sa kwarto, dala ang bag. Apan wala ang babaye.
Gipasulod og balik ang seaman sa kwarto ug kauban sa mga policewomen, ilang gipangita ang babaye.
Matod ni Ligas nga nagduda silang gipasibat na ang babaye.
Apan may milagobo sa kisame, ug nabuslot o nahunlak, natagak ang 2 ka sandal sa babaye ug migimaw ang tiil.
Mao nga gikombinsir kining manaug ug kinahanglan silag hagdan nga kanaugan.
Matod ni Ligas, ang kabit nga seaman miangkon nga 3 na sila ka tuig nga nagkarelasyon ug ang babaye. Gikan ang seaman sa Manila.
Ang duha gidala sa station 2 sa MCPO.
Basi sa kasayuran ni Ligas, ang bana mikompisal niya nga 2017 nasakpan na sa ilang anak ang pagpangabit sa iyang asawa.
Ang bana nakabantay sab nga matag uli niya human manakayan sanglit usa man sab siya ka seaman, nausab gyod iyang asawa ug dili na ganahan makig-sex niya, magpasukosuko hinoon.
Matod ni Ligas nga atol sa pandemic period, ang bana miangkon nga wa na gyod siya maka-score sa iyang asawa..
Karon dugang ni Ligas, disidido ang bana nga ikiha iyang asawa ug ang kabit, ug hingpit na siyang makigbuwag ug ibaligya nalang ang ilang balay.
(Photos: gikan ni Edward Ligas)
