Pahayagan ni Kulas

16/08/2026

Paleria, Gutierrez nanguna sa gintong ani ng Arsenians sa Taekwondo
ni Lorence Frias

Nanguna sina Janelle Paleria at Khianna Gutierrez sa kampanya ng Arsenians sa Taekwondo matapos kapwa makasungkit ng gintong medalya laban sa malalakas na pambato ng SPS, Enverga, at Central sa Palarong Quezon noong Agosto 9, 2026 sa Livelihood, Calauag, Quezon. Dahil sa kanilang pagkapanalo, susulong sila para lumaban sa Palarong Quezon Provincial Meet.

Waging nakasungkit ng medalyang ginto, silver, at bronze matapos sumipa at makipagsabayan sa malalakas na pambato ng SPS, Enverga, at Central sa Palarong Quezon nito lamang araw ng Agosto 9, 2026 sa Livelihood, Calauag, Quezon ang ating mga manlalarong Arsenians sa Taekwondo.
Sa kabuuang 8 na pambato, 6 lang ang nakalaro dahil ang dalawa ay advance na para sa Palarong Quezon Provincial Meet.

Nagsama-sama ang mga natira upang lumaban at sumungkit ng panalo.
Unang sumalang si Jayvee na nakipagsipaan kontra Central. Bawat sipa ng pambato ng Central, ramdam ang hirap na nararanasan ni Jayvee sa pakikipagpalitan ng sipa, ngunit kitang-kita ang determinasyon ng dalawang magkatunggali para sa inaasam na pagkapanalo.
Sa huli, Central pa rin ang nanaig sa laban sa iskor na 16–5.
Samantala, sumunod na nagtunggali ang pambato ng Arsenians na si Reyvin Paraiso kontra sa pambato ng Central. Sa kabila ng kaniyang masamang nararamdaman, hindi ito naging rason upang sukuan ang laban, at nagbitbit ng iskor na 12–10.

Sa pagpapatuloy ng daloy ng laro, isinalang naman ang ating ikatlong pambato na si John Michael Balbido kontra sa manlalaro ng SPS ngunit hindi ito nagtagumpay at nabigong manalo sa iskor na 24–4.

Sa pagwawagi ni Reyvin, muli siyang isinalang kontra sa pambato ng SPS upang masungkit ang medalyang ginto. Una pa lamang, namigay na agad ng malalakas na sipa kay Reyvin ang pambato ng SPS. Sa kabila nito, hindi nagpapatinag si Reyvin bagkus patuloy pa rin ito sa pakikipagbigayan ng malalakas na sipa.

Sa kabila nito, hindi nagwagi ang pambato ng Arsenians at tinapos ng pambato ng SPS ang laban para sa gintong medalya, habang silver naman para sa pambato ng Arsenians.

Sa pagtigil ng laro, inihanda naman ang mga pambato ng Taekwondo girls upang unang isabak ang pambato ng Arsenians na si Jazzlyne Esguerra kontra Enverga.

Palitan ng malalakas na sipa at pagkuha ng puntos sa ulo ng dalawang magkatunggali upang makuha ang mataas na puntos. Sa kabila nito, bigo ang pambato ng Arsenians sa pagsungkit ng ginto at Enverga ang tumuldok sa laban, 17–4.

Bigo namang masungkit nina Diane kontra Enverga, at Raiza Romero kontra SPS ang panalo para sa ginto.

Samantala, nasungkit naman ng pambato ng Arsenians na si Andrea Ermita na lumaban sa Poomsae kontra Enverga.

Ipinakita nila ang pag-atake, pagdepensa, at paggalaw sa harap ng mga hurado. May ilang pagkakamali si Andrea na itinama ng isa sa mga referee.

Nakipagsabayan naman ang pambato ng Enverga sa mga galaw ni Andrea, nasungkit pa rin niya ang silver na medalya.

Sa pagtatapos ng laban, tagumpay ang pambato ng Arsenians sa Taekwondo na magkaroon ng maiuuwiing karangalan sa paaralan. Napawi ang kalungkutan ng bawat manlalaro dahil mayroong nakasungkit ng ginto, silver, at mayroong bronze.

14/08/2026

NIKULAS, NABIGO SA SINGLES SEMIFINALS NG BADMINTON TOURNAMENT
ni Alessandra Gregory Trudis
‎
Bigong maka-tungtong‎ sa semi finals si Terrence Leonor manlalaro ng Dr. Arsenio C. Nicolas Integrated National High School kontra SPS sa Badminton Tournament na ginanap noong ika 8, ng Agosto 2026 sa Evacuation Center Municipal of Calauag, 30-16.

‎Nagpakita ng husay ang parehong manlalaro habang nagpapalitan sila ng puntos sa bawat set. Gayunpaman, naging mas matitibay ang Saint Peter's School sa mga mahahalagang sandali ng laban at nakuha ang panalo.
‎
Mahalaga ang naging laban dahil ang mananalo ay makakapasok sa finals. Sa huli, hindi na nakapasok sa finals si Terence Leonor ng Nikulas matapos siyang matalo sa semifinals, habang ang Saint Peter's School naman ang magpapatuloy sa finals.

Samantala, bigo naman si Riodel sa dikitang laban kontra sa pambato ng Bantulinao Integrated School sa single match.
‎
‎ Nagpalitan ng palo ang dalawang manlalaro sa buong laban. Pareho silang nagpakita ng mabilis na galaw at magandang depensa, ngunit sa mga huling puntos ay nakalamang ang Bantulinao Integrated School at nakuha ang panalo sa iskor na 30–27.
‎
Sa kabila ng pagkatalo, hindi sumuko si Riodel Cubida at ipinagpatuloy ang laban hanggang sa huling puntos ng kalaban.

12/08/2026

Arsenians, nabigo sa pagtatangkang makapasok sa championship matapos ang 3–2 kampanya
-ni Aivrell Mitch Cantillana

Bigo ang Arsenians na makapasok sa championship matapos walisin ng San Roque, 2–0, sa kanilang huling laban para sa championship berth noong Agosto 9, 2026, sa Calauag High National High School, matapos magtala ng tatlong panalo at dalawang talo sa kanilang kampanya sa Palarong Pambayan.

Sa kanilang unang laban noong Agosto 8, agad na ipinakita ng Arsenians ang kanilang determinasyon matapos maagaw ng Enverga ang unang set, 25–23. Bumawi ang Arsenians sa ikalawang set at kinuha ito, 25–10, bago tuluyang isara ang deciding third set, 25–11, upang makumpleto ang comeback at manalo, 2–1.

Gayunman, hindi nagtagal ang kanilang momentum nang makaharap ang Saint Peter School (SPS). Kontrolado ng SPS ang laro mula sa unang set at tuluyang nakuha ang dalawang set, 25–5, 25–18, upang biguin ang Arsenians.

Bumawi naman ang Arsenians sa kanilang sumunod na laban kontra Rufina. Matapos makuha ang unang set, 25–17, nakabawi ang Rufina sa ikalawang set, 25–11. Sa deciding third set, muling umarangkada ang Arsenians at mula sa 2–4 na kalamangan ng Rufina ay nakabawi hanggang lumamang, 13–6. Hindi na nila binitawan ang momentum at tinapos ang set, 25–17, para sa 2–1 panalo.

Kinabukasan, Agosto 9, muling umarangkada ang Arsenians kontra Lamon Bay. Kontrolado ng Arsenians ang laro matapos kunin ang unang set, 25–17. Hindi rin nagpaawat ang koponan sa ikalawang set at muling nanaig, 25–11, upang walisin ang Lamon Bay, 2–0.

Sa huling laban kontra San Roque para sa championship berth, hindi naging sapat ang pagsisikap ng Arsenians upang makausad. Nakuha ng San Roque ang unang set, 25–15, bago muling mangibabaw sa ikalawang set, 25–13, upang tapusin ang laban sa straight sets.

Sa kabila ng pagkabigo na makapasok sa championship, nagtapos ang Arsenians sa 3–2 na kampanya matapos magtala ng panalo kontra Enverga, Rufina, at Lamon Bay, habang natalo naman sa SPS at San Roque.

Bigo man sa pagtatapos ng kanilang kampanya, pinaalalahanan ng coach ang mga manlalaro na manatiling positibo at ngumiti sa kabila ng resulta.

10/08/2026

ARSENIANS, Bigo sa Semis Spot Matapos ang 3 Panalo sa Elims

ni Clouie Dollente

Ipinamalas ng Dr. Arsenio C. Nicolas Integrated National High School (DACNINHS) Arsenians ang determinasyon sa sunod-sunod na laban sa ginanap na volleyball tournament sa Sabang Dos Elementary School noong Agosto 8–9, 2026.

Sa unang araw ng kompetisyon, nakapagtala ang Arsenians ng tatlong panalo at isang pagkatalo sa apat na laro laban sa Calauag National High School,Manuel S. Enverga University Foundation Inc.(CALAUAG), Saint Peter's School (CALAUAG)inc, at San Roque Ilaya National High School.

Sa unang laro kontra CNHS, agad na nakakuha ng unang puntos ang Arsenians matapos makuha ang first ball. Bagama’t nakabawi ang CNHS sa pamamagitan ng spike, nagpatuloy ang Arsenians sa kanilang malalakas na serve at atake na naging mahalagang bahagi ng kanilang pagkuha ng puntos.

Isa sa naging highlight ng laban ang malakas na spike ni Salamat na nagpasigla sa mga manonood. Sa ikalawang set, nagpatuloy ang magandang depensa at pag-atake ng Arsenians hanggang sa makuha nila ang panalo.

Sa kanilang ikalawang laban, hinarap naman ng Arsenians ang Enverga. Dito naranasan ng koponan ang mas matinding pressure matapos agad na umarangkada ang kalaban gamit ang malalakas na spike.

Patuloy na humabol ang Arsenians at nakakuha ng 13 puntos, ngunit hindi ito naging sapat upang maagaw ang panalo mula sa Enverga.

Bumawi naman ang Arsenians sa kanilang ikatlong laban kontra Saint Peter. Naging mahalaga sa laro ang kanilang depensa, paghabol sa bola, at malalakas na serve, kung saan nanguna si Andre Olaya.

Naging epektibo ang mga serve ng Arsenians upang mahirapan ang Saint Peter sa kanilang reception. Gayunman, nakaranas din ng injury si Silayan sa gitna ng laban.

Sa kabila nito, ipinagpatuloy ng Arsenians ang kanilang laro at tinapos ang laban sa iskor na 25–19.

Sa huling laban ng unang araw, nagtapat ang Arsenians at San Roque sa isa sa mga pinakakumpetibong laro ng araw. Nagkaroon ng tabla sa unang dalawang set kaya umabot ang laban sa ikatlong set.

Kapwa ibinigay ng dalawang koponan ang kanilang natitirang lakas sa matinding palitan ng bola, dive, spike, at serve. Sa huli, nanaig ang Arsenians at tinapos ang laban sa iskor na 25–18, dahilan upang makapasok sila sa semifinals.

ARSENIANS BIGONG PUMASOK SA SEMIS

Noong Agosto 9, muling sumabak ang Arsenians para sa kanilang elimination round kontra Sto. Anghel.

Agad na nakakuha ng first ball at unang puntos ang Sto. Anghel, habang nahirapan naman ang Arsenians na makabawi sa depensa. Sa unang set, nakakuha pa rin ang Arsenians ng 17 puntos bago ito mapunta sa Sto. Anghel.

Sa ikalawang set, sinubukang buhayin ng Arsenians ang kanilang depensa. Naging kapansin-pansin ang matitinding paghabol at dive ni Jose San Juan , habang nakapagbigay rin ng depensang suporta sina Moniedo at Villanueva bilang blockers.

Sa kabila ng kanilang pagsisikap, hindi na nakahabol ang Arsenians at nagtapos ang laban sa iskor na 25–17 pabor sa Sto. Anghel.

Matapos ang laban, naging emosyonal ang magkabilang panig matapos ang resulta ng semifinal.

Ayon kay Mamasao , captain ball ng Sto. Anghel, kinilala nila ang ipinakitang laban ng Arsenians.

“Proud na proud pa rin po kami sa mga taga Arsenians, dahil patuloy po nilang nilaban! Nice game po!”

Samantala, inilahad ni Leonor ng Arsenians na naging malaking salik ang kanilang pagkabigo na makuha ang first ball at ang pressure ng semifinal.

“Kung nakuha namin ang first ball ay maaari pa sana naming mabaliktad ang laro, at nalamangan kami ng kaba dahil ito ay semi na. Pero babawi kami next year!”

Sa kabila ng pagkatalo, ipinahayag naman ni Coach Nikka ang kanyang suporta sa koponan.

“Proud na proud pa rin ako sa kanila dahil nilaban nila hanggang matapos ang laban. Lalo na ang teamwork at sacrifices ng grupo. At alam kong babawi ’yang mga ’yan next year! Saludo pa rin ako sa kanila.”

Bagama’t hindi nakapasok sa semi-finals, nagtapos ang kampanya ng Arsenians na may tatlong panalo at dalawang pagkatalo, matapos nilang lumaban sa bawat laro hanggang sa elimination round.

10/08/2026

ARSENIANS, NAGPAKITANG-GILAS SA APAT NA SAGUPAAN; TABLA SA 2–2
ni Nigel Gutierrez

Hindi natinag ang Arsenians sa apat na magkakasunod na basketball games matapos magtala ng dalawang panalo at dalawang pagkatalo kontra Lagay National High School at Saint Peter School of Calauag Inc.

Nagpakitang-gilas ang Arsenians sa kanilang dalawang panalo laban sa Lagay, ngunit kinapos sa dalawang pagkakataong nakaharap ang Saint Peter, na parehong nagwagi sa kanilang mga pagtatapat.

Sa unang laro, agad na kinuha ng Arsenians ang kontrol laban sa Lagay National High School matapos makabuo ng 15-puntos na kalamangan sa unang bahagi ng laban. Hindi na nila binitawan ang kanilang bentahe hanggang sa huling busina upang itala ang 83–69 na panalo.

Naging maganda rin ang simula ng ikalawang laro para sa Arsenians nang si Clarence ang unang nakapuntos para sa koponan. Gayunman, unti-unting nakontrol ng Saint Peter ang takbo ng laro matapos lumamang, 11–2, sa unang quarter.

Lalong lumaki ang agwat pagsapit ng second quarter sa 25–7 at umabot sa 53–20 sa third quarter. Nabigo ang Arsenians na makabalik sa laro at tuluyang yumukod sa Saint Peter, 84–45.

Sa kanilang ikatlong sagupaan, agad namang bumawi ang Arsenians kontra Lagay. Si Kian Candelaria ang unang nakapuntos matapos magtala ng dalawang puntos, habang si Charles Triste ang unang nakatanggap ng foul.

Nagtapos ang unang quarter sa 24–17 pabor sa Arsenians bago nila mapanatili ang kalamangan sa second quarter, 41–37. Sa third quarter, lalo pa nilang pinatatag ang kanilang hawak sa laro sa iskor na 68–56.

Hindi na nagpaawat ang Arsenians sa huling yugto at tuluyang pinabagsak ang Lagay, 96–77, upang makuha ang kanilang ikalawang panalo.

Sa ikaapat na laro, muling nagsagupa ang Arsenians at Saint Peter. Nakapagtala si Clarence ng dalawang puntos para sa Arsenians sa simula ng laban, ngunit agad na nakapagtayo ng malaking kalamangan ang Saint Peter.

Nagtapos ang unang quarter sa 28–14 at lumawak sa 51–31 pagsapit ng second quarter. Sa third quarter, umabot sa 79–44 ang kalamangan ng Saint Peter.

Bagama’t sinubukan ng Arsenians na makahabol sa huling quarter, hindi na nila nabago ang takbo ng laro. Tuluyang nagwagi ang Saint Peter, 93–60, para sa ikalawang panalo nito kontra Arsenians.

Sa kabila ng pagkatalo, pinuri ni Sapatero, team captain ng Lagay National High School, ang pagsisikap ng kanilang koponan at ang ipinakitang determinasyon sa laban.

“Maganda po dahil naipakita namin ang best namin. Kahit alam naming naging wala kaming laban sa kanila, ay nagpatuloy pa rin kami para lumaban nang patas. Nahirapan din po kami kay Candelaria Kian dahil napakabilis niya at napakalakas. Sa team ko naman po, masasabi kong napakagaling nila at binigay nila ang kanilang best. Solid po yung team namin. Kahit na talo man kami, naipakita po namin ang aming best. Congratulations po sa nanalo, sa Arsenians.”

Samantala, sinabi ng team captain ng Saint Peter School of Calauag Inc. na naging hamon para sa kanilang koponan ang Arsenians dahil sa ipinakita nitong determinasyon.

“Masaya po kami sa naging laro laban sa Arsenians. Medyo mahirap din po ang team dahil palaban ang Arsenians. Talagang nakita ko po ang determinasyon nilang manalo, pero thankful po kami kasi nakuha namin ang panalo. Congratulations po sa Arsenians.”

Mula naman sa Arsenians, sinabi ni Kian Candelaria, team captain ng koponan, na mahalaga ang mga naging resulta ng bawat laro sa kanilang pag-unlad bilang isang koponan.

“Thankful po kami kasi first game pa lang ay panalo na. Pero sa mga sumunod naming laban, thankful pa rin po kami sa mga nangyari at naging resulta ng bawat laro. Nahirapan lang din po kami sa depensa at sa aming pag-atake. Magagaling po ang mga kalaban namin, lalo na po ang Saint Peter, kaya talagang nahirapan din po kami sa kanila.”

Dagdag pa ni Candelaria, nananatiling positibo ang kanilang koponan sa kabila ng mga naging hamon.

“Masaya po kami at thankful dahil kahit papaano, nakakuha pa rin kami ng mga panalo. Hindi man naging madali ang mga laro, naipakita pa rin namin ang aming best. Maraming salamat po at congratulations sa mga nanalo.”

Sa pagtatapos ng apat na sagupaan, nagtala ang Arsenians ng 2–2 kartada—dalawang panalo kontra Lagay National High School at dalawang pagkatalo kontra Saint Peter School of Calauag Inc.

Higit sa mga puntos at panalo, naging pagsubok ang bawat laro sa tibay, disiplina, at pagkakaisa ng koponan. Sa bawat pagkatalo, may aral; sa bawat panalo, may kumpiyansa—mga karanasang maaaring magsilbing puhunan ng Arsenians sa kanilang mga susunod na laban.

10/08/2026

Cantillana, Olaviaga at Russel, nagdomina sa Calauag East chess tilt
ni Yushin Dizon

Binasag ni Chris Andrey Cantillana ang depensa ng kanyang mga katunggali matapos kumana ng dalawang sunod-sunod na panalo upang pamunuan ang ratsada ng mga manlalaro sa ginanap na chess tournament, Agosto 8- 9, 2026 sa palarong pambayan ng Calauag West District.

Hindi nagpaawat si Cantillana sa kanyang ipinakitang husay sa ibabaw ng 64-square board upang solong hakutin ang dalawang puntos para sa kanyang koponan.

Hindi rin nagpahuli si Russel na kailangan lamang ng isang oras upang patumbahin ang kanyang kalaban at maipuslit ang isang mahalagang panalo.

Samantala, nagpakita naman ng matinding agresyon si Maegan Encina gamit ang kanyang paboritong Sicilian Defense. Sa unang 10 tira pa lamang ay agad na itong nagbuwis ng isang pawn upang maagaw ang kontrol sa gitna ng board at maipitin ang depensa ng katunggali.

Nakiisa rin sa talahanayan ng mga nagwagi si Chrisza Mae Olaviaga matapos magpakita ng taktikal na laro na nagresulta sa isang direktang checkmate laban sa kanyang kalaban.

Sa kabilang dako, kapos naman ang naging kargada ng Arsenians matapos tumupi sa huling bahagi ng kanyang laro na humantong sa pagkatalo via checkmate.

Bagamat bigo sa kanyang huling laban, nananatiling positibo ang Arsenians at gagamiting aral ang karanasan upang magbalik nang mas malakas sa mga susunod na kompetisyon.

10/08/2026

Batang Nikulas Ipinamalas ang Galing, Billard ay Aarukin.
ni Bhea Bianca Igot

Lumahok sa larangan ng Billiard ang mag-aaral ng Dr. Arsenio C. Nicolas INHS na sina Renz Jian P. Chavez, 15-anyos na gulang ika-10 na baitang sa pagitan ng Villa San Isidro NHS na si Care A. Gerona, 17-anyos na gulang ika-12 na baitang, Lovely C. Meude, 13-anyos na gulang ika-8 na baitang sa pagitan ng St. Peter NHS na si Eunica H. Quejada. Ginanap noong Sabado, Agosto 8, 2026 sa Villa Linel Resort.

Namayagpag ang ginawang laban ng VSINHS na si Care Gerona sa pagitan ng DACNINHS na si Renz Jian Chavez.

Ayon kay Care, isa sa mga naging motibasyon niya sa pagkapanalo ay ang kaniyang pamilya at ganoon din sa mga g**ong naka suporta sa kaniya. Nais niyang ipagpatuloy ang kaniyang paglaban hanggat nakakamtan ang tagumpay.

Samantala, ayon naman sa pahayag ni Jian, isa sa mga nahirapan siyang kaharapin sa oras ng laro ay ang mga tira ng kalaban, at ganoon din sa sunod-sunod niyang nasasablay na pagtira ng bola. Handa siyang ipagpatuloy ang nasimulan sa natitira pa niyang dalawang taon.

Sa pagitan ng babaeng manlalaro ay hindi rin nagpahuli ang St. Peter NHS na si Eunica Quejada — "Naniwala ako sa sarili ko na sabi nila kaya ko, kaya 'yon pinaniwalaan ko sila na kaya ko at do'n ko napagtanto na kaya ko talaga."

Nagbigay din ng pahayag si Lovely Meude, mag-aaral ng DACNINHS ukol sa pagkabigo nitong manalo. Hingil sa kaniya, nakulangan siya sa matagalang pag eensayo para sa paglaban, ito umano ang naging dahilan ng kaniyang kaba sa pagharap sa laban.

Kahit hindi pinalad na maiuwi ang tagumpay ay pursigido ang dalawa sa susunod na laban at handang ipagpatuloy ang nasimulan.

Pagtitiyaga at dedikasyon ang puhunan sa inaasam-asam na tagumpay. Hindi kailan man magpapatinag, tungo sa panibagong pagharap.

10/08/2026

Nikulas, Hindi Pahuhuli sa Bilis ng Biyas.
ni Jhianne Faye Cayabat

Nagpakitang-gilas ang mga atleta ng Dr. Arsenio C. Nicolas Integrated National High School (DACNINHS) sa Athletics Finals matapos makuha ang ilang puwesto sa track events at makamit ang kampeonato sa field event na ginanap sa loob ng dalawang araw ng ika-walo hanggang ika-siyam ng Agusto sa Calauag East Elementary School.

Umarangkada ang bilis ng biyas ng atletang DACNINHS na si Geterro Janoras. Nagawa niyang takbuhin ang 2 laps, may sukat na 800 metro sa loob lamang ng 2:25:75 minuto, dahilan ng kanyang pagka-sungkit sa unang puwesto. Naungusan niya sina Lawrence Gasino ng Enverga, na nagtala ng 2:27.87, at Sean Daniel Fugnit ng St. Peter School na nagtapos sa 2:32.68. Ang bawat sakripisyo at pagod na ibinuhos sa ensayo ay nagbunga ng Kampeonato ni Janoras "Inaalay ko ito sa aking tita na si Gemma Janoras dahil siya ang nag motivate sa akin para manalo." Ang motibasyon na ito ay kaniyang dadalhin patungo sa Palarong Quezon.

Isa pang tagumpay ni Janoras ang pag kamit ng ikalawang puwesto sa 5000 meter sa loob ng 19:08:00, dikit man sa 20:33:00 ni Brent Gabriel ng Sto. Domingo NHS, sinig**o nyang hindi mapapaiilalim sa tagumpay ang DACNINHS.
"Ang nag pahirap sakin ay ang sariling kaba dahil HINDI BASTA BASTA ANG MGA KALABAN.
Sangayon sa pahayag ni Janoras, malaki ang agwat ng nangunang si Mark Angelo Robes na nagtala ng 17:53:15, isang karangalan para sa Calauag Central College.

Ikalawang puwesto muli ang napagtagumpayan ng isa sa mga babaeng atleta na si Amy Canaco mula sa DACNINHS, hindi nagpatinag sa 3000 meter at mabilis na rumampa sa loob ng 20:01:43, sinundan ng Sto. Angel NHS na may talang 22:15:00 mula kay Jasmine terro.
Samantala, sa loob ng 14:43:10 pinangunahan ni Shane Dimaala mula sa St. Peter School, sinig**ong walang didikit sa kaniyang tagumpay.

Sa 1500-meters, isa muling babaeng Canaco, nag-ngangalang Elisa mula sa DACNINHS ang hindi sumuko hanggang makapagtapos na ika-lima sa loob ng 8:20:00. Muling nanguna si Dimaala ng SPS sa 6:54.62, sinundan nina Ayessa Jose ng Bantulinao Integrated School at Janella Villana ng Lamon Bay School of Fisheries Annex.

Hindi naging madali ang buong kompetisyon dahil ilang beses na nahinto ang laro bilang pag iwas sa panaka-nakang pagbuhos ng ulan. Kasabay ng ingay ng bawat patak ng ulan ay ang tahimik na kaba ng mga manlalaro, gayundin ang pag-aalala ng bawat coaches at ilang taga suporta dahil marami sa mga manlalaro ang nadulas at maari pang madulas sa maputik na bahagi ng track, na di umano'y lampas bukong-bukong.

Kinabukasan, ika siyam ng Agusto, ipinagpatuloy ang ilang Field events na hindi naisagawa noong Sabado. Panibagong araw, isa nanamang karangalan ang tinanggap ng DACNINHS. Salungat noong sabado, sa ilalim ng maaliwalas na kalangitan ng linggo, nasungkit ni Clarence Talento ang kampeonato sa Shot put; isang kasiguraduhan patungo sa Palarong Quezon. Hindi siya nagpatininag sa puyat, pagod, at kakulangan sa ensayo. Bagkus, matapang niyang hinarap ang kaba at pag aalinlangan sa bawat tapon na kayang binitawan. "Ang larong ito ay inaalay ko sa aking sinimulang paaralan lalong lalo na sa
aking mga magulang at g**o at mag aaral na laging naka support sakin lagi. Thankyou!" Mensahe ni Talento.

Bukod kina Janoras, Talento, Amy at Elisa Canaco kabilang din sa mga kinatawan ng DACNINHS sa athletics sina Yezha Canaco, Louisse Carlene Castor, Andre Banico, Lance Bas, Sherwill Calagoyo, Lester Salamat, Kian Candelaria, at Dave Aynera.

Sa kabila ng abala sa panahon at mahabang oras ng kompetisyon, ipinakita ng mga atleta ng DACNINHS ang kanilang tiyaga at determinasyon hanggang sa pagtatapos ng Athletics Finals.

Ang mga gasgas, pawis, pagod, at putik na kanilang tinamo sa bawat arangkada ay isang pagpupunyagi na buong init na yayakapin ng paaralang Dr. Arsenio C. Nikulas INHS, bilang karangalan na alay ng mga atleta.

09/08/2026

15/07/2026

LOOKING FOR NEW CAMPUS JOURNALIST MEMBERS

May kuwento ka bang gustong ibahagi? May boses ka na nais iparinig? Mag-ingay at maglingkod gamit ang iyong panulat at kamera! Sumali na sa opisyal na publikasyon ng Dr. Arsenio C. Nicolas INHS. Magkasama nating isulat ang kasaysayan ng ating paaralan! ✍️💙

🖼️: Kyle Matteo Villanueva
✍️: Rish Erne Violante