11/12/2016
“Tokneneng”
Ni Neneng Crishia
Ang tokneneng ay isa sa mga putaheng kilala at tinatangkilik ng mga Pilipino. Noon pa lamang ay kilala na ang tokneneng dahil sa kakaibang lasang hatid nito at dahil sa mabibili ito sa murang halaga lamang. Kabilang ito sa mga “street foods” at ito ay kadalasang binibili o kinakain ng mga Pilipino sa miryenda. Nagmula sa pinakuluang itlog ng manok na pinagulong-gulong sa arina, inilublob sa kumukulong mantika, inisawsaw sa s**a na may pipino, ay huling-huli nito ang panlasang pinoy. Kaya’t hindi nakapagtatakang mula noon hanggang ngayon ay isa ito sa mga paboritong kainin ng mga Pilipino lalo’t higit para sa masang Pilipino.
Maihahalintulad ang kilalang putaheng ito sa mga balita at impormasyong ating nakukuha at nalalaman sa araw-araw. Gaya ng tokneneng, nararapat lamang na ang mga balita at impormasyong ating nalalaman ay may sustansya, mahalaga, at mabibili nasa murang halaga. Ang tokneneng ay para sa lahat. Mas tinatangkilik man ito ng mga nasa mababang antas ng lipunan ay hindi pa rin dapat ito ipagkait sa mga nasa taas. Sa pagtanggap ng mga balita at impormasyon, lahat ay pantay-pantay.
Ang tokneneng ay sumisimbulo at nagrerepresenta sa mga balita at impormasyong kami mismo ang naghanda at aming ihahain sa lahat lalo’t higit para sa masang Pilipino. Mga balita at impormasyong tumatalakay sa mahahalagang paksa at pangyayari sa loob ng bansa at naglalayong maghatid ng libreng balita at impormasyong tapat at may kredibilidad sa masang Pilipino.
Kaya’t tayo na at makituhog, makisawsaw, makibalita!
