11/08/2026
LGU SAN MARCELINO, NAGHATID NG TULONG SA BARANGAY STA FE; ZIPLINE SYSTEM, INILATAG
Matagumpay na napasok ng pamahalaang lokal ng San Marcelino ang Barangay Sta. Fe ngayong araw matapos itong ma-isolate dahil sa pagkasira ng tulay sa naturang barangay dulot ng malalakas na ulan at pagbaha bunsod ng enhanced Habagat.
Sa pangunguna ng ating mahal na Mayor Elvis Ragadio Soria , kasama sina Vice Mayor Jimbo Ragadio Gongora, mga miyembro ng Sangguniang Bayan na sina Louella Aquino, MD, Earl Yap, MD, at Darrel Labio, at MDRRMO Chief Arsenio Edar Mauricio III, personal na tinungo ng mga opisyal ang barangay upang kumustahin at makita ang kalagayan ng mga residente sa kabila ng mataas na tubig at mahirap na kondisyon ng daan.
Tiniyak din ni Mayor Soria na patuloy na paiigtingin ng lokal na pamahalaan ang paghahatid ng kinakailangang tulong, kabilang ang relief goods at iba pang pangunahing pangangailangan ng mga residenteng apektado ng pagbaha.
Samantala, nagbayanihan ang Bureau of Fire Protection (BFP), Municipal Disaster Risk Reduction and Management Office (MDRRMO), Philippine National Police (PNP), Philippine Coast Guard (PCG), Philippine Army, at mga residente ng barangay sa paglalatag ng zipline system mula sa Barangay Hall patungo sa kabilang bahagi ng Sta. Fe, kung saan may mga residenteng hindi pa naaabot ng karaniwang access.
Layunin ng naturang sistema na magkaroon ng alternatibong paraan sa paghahatid ng tulong at iba pang pangunahing pangangailangan sa mga residenteng nananatiling isolated dahil sa mataas na tubig at patuloy na pagbaha.
Inaasahang ililipat bukas ang mga food packs mula sa Barangay Hall patungo sa north side ng barangay upang maihatid ang mga relief goods sa mga ito.
Nauna na rin nabigyan ng tulong ang mga residenteng nasa kabilang bahagi ng barangay.
Katuwang sa paghahanda at paghahatid ng relief goods sa tinatayang 800 pamilya ang Municipal Social Welfare and Development Office (MSWDO) at Motorpool Section ng LGU.
Bawat relief goods ay naglalaman ng bigas, kape, asukal, noodles, delata at kandila.
Nagpaabot naman ng pasasalamat ang mga residente ng Sta. Fe, sa pangunguna ni Punong Barangay Rico Diego Arquero, sa mabilis na pagtugon at patuloy na pag-alalay ng pamahalaang lokal sa kanilang kalagayan.
Patuloy namang nagsasagawa ang LGU ng monitoring at assessment sa lugar upang matukoy ang iba pang pangangailangan ng mga residente at makapagpatupad ng karagdagang interventions para sa kanilang kaligtasan at kapakanan habang nagpapatuloy ang epekto ng enhanced Habagat. (San Marcelino Public Information Office)
