01/05/2026
MAABOT P20-K NGA PASAHE HA CATARMAN-MANILA NGA RUTA HAN PAL, GINKWESTYON HAN MGA ALKALDE HA NORTHERN SAMAR
Seryoso an pagkabaraka han mga alkalde han Northern Samar tungod han mahal nga presyo han plane ticket ha Catarman-Manila nga byahe ha Catarman Airport.
Iginpadangat ini han mga alkalde durante han ira katitirok para han League of Municipalities of the Philippines.
Sumala kan Catarman Mayor Dianne Rosales, maabot ha Php15,000 ngada Php20,000 an presyo han plane ticket ha Philippine Airlines (PAL) para han byahe nga Catarman-to-Manila ngan vice versa.
Dugang pa niya nga makakaapekto ini diri la ha mga residente han ira probinsya kondi lakip na an sektor han turismo ngan pangkabug-usan nga ekonomiya han Northern Samar.
Baton naman han PAL-Tacloban Area Manager nga hi Joery Fallori nga nagamit hin turboprop nga eroplano, sugad hiton Bombardier Dash 8 Q400, an mga airport nga mayda limitasyon, ngan an paggamit hiton gutiay nga mga eroplano inin nakakaapekto gihapon ha mahal nga presyo han plane ticket.
Pero ginkwestyon naman han mga alkalde ha probinsya kun kay-ano waray pricing specialist ha Catarman Airport nga makakahatag unta hin detalyado nga komputasyon han pasahe ha eroplano.
Ha pagka yana, an PAL pala an airline nga mayda ruta nga Catarman-Manila ngan vice versa.
Ini nga notisya in durot ha iyo han:
Mapapalit ha tanan na Branches han Clinica De Alternativo ngan ha mga nangunguna nga Botika ha iyo mga Lugar. Ha Tacloban an Clinica De Alternativo Medicina and Wellness Center in nahimumutang ha Brgy. 23-A, Avenida Veteranos Tacloban City, na a-andihas hiton main entrance han Divine Word Hospital.
K5 News FM Tacloban 103.1
Photo Courtesy: Catarman Airport | via PNA
Kim Soriano | Abril 29, 2026