19/08/2026
MAG-UYAB NGA MAGPAKASAL NA UNTA, NAMATAY SA DISGRASYA!
Usa ka mag-uyab nga nagsakay og motorsiklo ang gideklarar nga patay na pag-abot sa ospital human giingong milikay sa usa ka sakyanan nga kasugat samtang nagbiyahe sa Cebu Tops Road, duol sa Skyline Garden Columbary sa Busay, Siyudad sa Sugbo.
Nahitabo ang insidente pasado alas 9:35 sa gabii niadtong Martes, Agosto 18, 2026.
Sa wala pa mahitabo ang insidente, gikuha ni John Mike ang iyang pamanhunon gikan sa trabaho sa Tops, diin nagtrabaho kini isip Sales Manager.
Ang duha ka biktima giila nga sila si John Mike Reynes Boyonas, 27, ang drayber sa motorsiklo ug residente sa Pungtod Alaska, Mambaling, Siyudad sa Sugbo, samtang ang angkas giila nga si Rose Ann Mae Ato Hermoso, 25, ug residente sa Rosevelt, Barangay Busay, Siyudad sa Sugbo.
Ang mag-uyab gikatakdang magpakasal sunod bulan, sa Septiyembre.
Nasuta sa pasiunang imbestigasyon nga samtang nagdagan ang motorsiklo sa Cebu Tops Road paingon sa Cebu Transcentral Highway, mibalhin kini sa kilid sa dalan ug nabangga sa konkretong poste pag-abot sa bahin sa dalan nga kurbado ug nag-ubos.
Tungod sa kakusog sa impact, nangalagpot ang duha ug naligid makaduha ka higayon sa dalan, nga miresulta sa grabeng mga samad sa ilang lawas ug ulo.
Gisuwayan pagdala ang duha ngadto sa usa ka pribadong ospital sa Sugbo, apan gideklarar silang patay na pag-abot didto.
