09/03/2026
DAKUNG SAKA SA PRESYO SA LANA
CEBU CITY – Naghuot na ang mga linya sa mga sakyanan sa nagkadaiyang gasolinahan sa dakbayan sa Sugbo ug Mandaue karong gabhiona, Marso 9, samtang naglumba ang mga motorista sa pagpatubil sa wala pa ang gipaabot nga dako kaayong saka sa presyo sa lana ugmang adlawa.
Subay sa pahibawo sa Department of Energy (DOE), usa ka "massive price hike" ang mahitabo tungod sa nagkagrabe nga tensyon sa Middle East. Gipaabot nga mosaka ang presyo sa diesel og ₱17.50 hangtod ₱24.25 matag litro, samtang ang gasolina mosaka og ₱7.00 hangtod ₱13.00.
Aron maminusan ang epekto sa "price shock," nisaad ang mga dagkong kompanya sa lana ngadto sa DOE nga himuon ang pagsaka sa staggered basis o anam-anam sulod sa tulo hangtod pito ka adlaw imbes nga idiretso og implementar ang tibuok kantidad ugma.
Bisan pa niini, wala na maglangay ang mga Sugboanon sa pagpuno sa ilang mga tangke sa wala pa ang tungang gabii. Sa pagkakaron, hugot nga nag-monitor ang DOE sa mga gasolinahan sa Sugbo aron maseguro nga walay mapahimuslanon nga mopatuman og "advance" nga pagsaka sa presyo o mag-hoarding sa ilang suplay.
Gawas sa lana, nagsugod na usab og paumento sa fuel surcharge ang mga shipping lines sama sa Trans-Asia sugod karong adlawa, butang nga gipaabot nga moigo sa bulsa sa mga biyahedor ug negosyante sa rehiyon.
