20/07/2025
Amigo na, apan dili pa
BALITAHOM (Balita Sagol Panahom)
Atty. JOSE MARIE N. POBLETE
“Gitunol” pag-usab ni Presidente Maros ang iyang kamot ngadto kang Bise Presidente Sara Duterte alang sa posibleng paghiuli sa nasilo nga relasyon sa duruha. Apan mibanat pa gihapon si Palace press officer Claire Castro ngadto kang Sara Duterte sa pag-ingon nga ang naulahi maoy mibiya ug wala motanyag og tabang ngadto sa administrasyon. Alegre ni’ng ilang setplay; ang agalon reconciliatory kaayo, samtang ang alipores, combative pud. Kon ingon ani ang pagpadangat sa mensahe gikan sa Malacanang, mora’g tataw nga ang tubag sa bise presidente mao nga, “Sige, amigo na ta…. pero dili lang ‘sa diay.” Madahaan!
HAYAHAY LANG KON HABAGAT
Segun sa ulahing resulta sa Pulse Asia “Ulat ng Bayan” survey, ang pagkontrolar sa inflation ug ang pagpausbaw sa suholan sa mamumuo maoy nag-unang concern sa mga Filipino. Padayon pa diay gihapon nga nag-antos ang katawhan sa kalisod bisan sa gipangandak nga economic reforms sa kagamhanan. Apiki ug alimoot gihapon ang panginabuhi sa katawhan. Matud pa sa mga gwatsinanggo,”Bation lang ang mga Pinoy og kahayahay sa kahimtang kon mohuros na ang hangin’g Habagat.” Fezteleern!
KULANG USAB ANG GAMIT
Sa pagtuon nga gihimo sa Philippine Institute for Development Studies (PIDS), nasayran nga kinahanglan’g motukod kita og 7,000 ka classroom matag tuig sulod sa 15 anyos aron masulbad ang kakulangon sa classrooms ug maseguro ang long-term nga access sa edukasyon. Nahisama na lang kining maong suliran sa kahimtang sa panahon: daghan ang maghisgot apan walay usa nga mibuhat sa angayan buhaton aron mapanagan-an. Komento pa sa akong paryente, “Dili kay classroom lang ang kulang, kon dili, hasta mga suplay usab, mao nga usahay mangawat na lang ang maestra sa ilang balay og mga gamit aron gamiton niya sa eskwelahan.” Muleeng!
‘PHILIPPINE AIR’ NA LANG
Namahayag si Presidente Marcos, Jr., nga komitedo siya nga palig-onon ang atong depensa sa kahanginan ug nga makita kini sa naulahing pagpamalit og bag-ong mga fighter planes alang sa Philippine Air Force (PAF) gikan sa South Korea ubos sa US700 million dolyares nga kontrata. Maanindot unta ang maong katuyoan apan daw diyotay ug awahi na kini’ng maong lakang kay layo na man kaayo kita kon itandi sa mga silingan’g nasud kon ekwipo sa depensa ang hisgutan. Apan sige lang kon nangiwit kita kay, “Kon dili pud kita mopalit, dili mabutangan og “Force” ang Philippine Air Force. Pagatawgon ra kini og Philippine Air.” Pagkatoytoy!
NAIBTAN OG TUNOK
Nanawagan si Senador Imee Marcos sa Presidente nga pirmahan na gilayon ang bag-ong napasar nga balaod nga naglugway sa termino sa mga barangay ug SK officials ngadto sa upat na ka tuig ug nagtakda usab sa sunod eleksyon karong unang Lunes sa Nobyembre 2026 inay karong Disyembre 1, 2025. Ni’ng maong kalambuan, nawala na ang mga kahingawa sa mga kasamtangan’g opisyal sa barangay ug dili na sila kinahanglan magsige’g pahiyom. Matud pa bitaw sa akong amigong kapitan, “Mora’g naibtan ko’g tunok ni’ng kalakiha kay tiaw mo ba’y Disyembre unta ang eleksyon, panahon nga tingpangayo og pinaskohan.” Ateerr!
