09/04/2023
Salamat Gob Art Yap - ikaw ang among paglaom sa Bohol, maot ang padagan karon sa Province Kapitolyo, puro lang pangu rakot.
PERSONAL NGA PAMALANDONG KARONG SABADO SANTO
Sa akong mga kaigsuonang Bol-anon, bisan asa man kamo karon, nanghinaut ko nga anaa kamo sa kapiskay sa inyong panglawas. Gipili nako nga magsuwat ug hamubo nga pamalandong karong adlawa human sa paghandom nato sa kamatayon sa atong Manunubos kagahapon, Byernes Santo, ug sa dili pa ang pagsaulog sa pasko sa pagkabanhaw ugma puhon.
Ang Sabado Santo bililhon nga adlaw para nako tungod sa kahilom niini. Kagahapon, puno ug kabalaka ang atong mga kasing-kasing sa dihang atong gihandum kung giunsa nga ang usa ka inosente nga tawo gipasanginlan, gilansang ug namatay sa krus. Ugma puhon, maglipay ug magmaya kita isip timaan sa pagkabanhaw sa atong Manunubos apan karon, gibukutan ang kalibutan sa kahilum tungod sa atong pagtuo nga ang atong Manunubos anaa pa sa iyang lubnganan.
Sa akong pagpamalandong karon, naghanduraw ko sa unsa ang mga nawala nako ug sa unsa ang mga nagpabilin sa akong kinabuhi. Mapasalamaton ko nga magkauban kami sa akong pamilya karon ug ang akong amahan nga 90 anyos na, nagpabiling baskog ang panglawas tungod sa grasya sa Ginoo. Ug samtang may kinabuhi pa, naaninaw nako ang dakong paglaum nga mupadayon kita sa pagpangalagad. Ang pagserbisyo sa atong isig katawo, wala mag depende sa bisan unsang posisyon o titulo apan sa pagpadayon sa atong mga buhat uban sa panghinaut nga kini makahatag ug kaayuhan sa kadaghanan ug dili sa pipila lamang. Karon, nagpadayon ko sa akong trabaho isip abogado ug sa natad sa agrikultura ug sa umaabot nga panahon, nanghinaut ko nga mapaambit ko kini kaninyo.
Nanghinaut ko nga bisan unsang pagsulay ang atong giatubang karon, makahuna-huna gihapon ta sa daghang grasya nga atong nadawat pinaagi sa atong pamilya ug mga kahigalaan, pinaagi sa pagkamanggihatagon sa uban, sa edukasyon ug mga magtutudlo, pinaagi sa gasa sa panahon, pag-amoma ug pagpangga gikan sa atong mga kaila ug bisan sa mga dili nato kaila... gi grasyahan ta ug angayan kitang magpasalamat. Busa, magmadasigon kita sa pagpaambit niining mga grasya ngadto sa uban pinaagi sa mga maayong pulong ug binuhatan, pag-alim sa mga masakiton ug pagtabang sa mga nanginahanglan. Magbaton kita ug taas nga pasensya, ipakita nato ang atong panaghigalaay ug pagsinabtanay sa atong tagsa-tagsa nga komunidad. Gimingaw ko ninyong tanan. Nanghinaot ko nga naa mo sa maayong kahimtang.
Panalanginan unta kita sa Labawng Makagagahum ug ang atong pinalanggang lalawigan sa Bohol.
