01/05/2025
NAAPA BAY SENIOR HIGH SCHOOL KARONG UMAABOT NGA PASUKAN?
Para sa mga nangutana kung kuhaon na ba gyud ang Senior High School (Grade 11 ug 12) sa SY 2025-2026, ang tubag: DILI.
Sa bag-ong programa nga gitawag nga Strengthened SHS Program, gikuhaan na ang mga strand sama sa HUMSS, STEM, ABM, AFA, ug uban pa. Duha na lang kabuok ang kapilian: ACADEMIC ug TVL.
Kung ang imong anak nangandoy ug STEM, sultihi siya nga sa bag-ong curriculum, wala na’y strand, kundi Track na lang ang pilion. Sultihi siya nga dili na kinahanglan mangita pa og layo nga eskwelahan para lang sa usa ka strand kay pareho ra ang itudlo bisan asa nga eskwelahan. Mas sayon ug mas makabarato pa kung duol na lang nga school.
Sa ACADEMIC track, gihiusa na ang HUMSS, ABM, ug STEM.
Sa TVL, naa na ang tanan nga strand sa ubos niini sama sa Agriculture (AFA), Beauty Care, Food Processing, SMAW, ug uban pa.
Sa ilawom sa bag-ong curriculum, ang mga subjects gibahin sa tulo:
1. Core Subjects
2. Academic Electives
3. TechPro (TVL) Electives
Ang kanhing Applied ug Specialized subjects, gitawag na karon nga Electives
Mga Benepisyo sa Strengthened SHS Program:
- GIKAN SA 17, MAHIMO NA LANG 5 ANG CORE SUBJECTS.
Kini aron mamenosan ang doble-doble nga mga subject ug dili na bug-at ang load sa mga estudyante. Ang lima ka core subjects mao ni:
- Effective Communication
- Life Skills
- General Mathematics
- General Science
- Pagtuon sa Kasaysayan ug Katilingban sa Pilipinas
- MAS MAHASA ANG MGA TVL STUDENTS.
Ang Grade 12, ilabina sa TVL, mag-OJT o immersion sa ilang last semester para andam sila sa trabaho pagkahuman sa high school.
- NAAY PILIAN ANG MGA ESTUDYANTE (DOORWAY OPTIONS).
Kung gusto mo og kurso sa college sama sa engineering, pwede ka mukuha og mga elective nga related sa math. Ug pwede pud ka mukuha og subject gikan sa lain nga track bisan lain imong gi-enroll. Pananglitan, Academic track ka pero gusto ka mukuha og subject sa TVL — pwede na karon.
IMPORTANTENG PAHIMANGNO:
Ang mga mosulod og Grade 12 karong SY 2025-2026 — padayon lang sa daang curriculum, walay mausab.
Apil sa bag-ong curriculum ang mga mosulod og Grade 11.
Kung nigraduate ka og Grade 11 pero wala pa ka kahuman og Grade 12 — pagpadayon na karon aron dili na ka maapil sa bag-ong sistema ug basin pa, balik pa ka og Grade 11.
Busa, siguradoha una bago ka magbalhin og eskwelahan. Pag-abot nimo sa laing school, basin wala na didto ang imong gipangita nga strand (STEM, HUMSS, SPORTS, ABM, SMAW), sayang lang ang paningkamot.
Nanghinaut ko nga nakatabang ni nga impormasyon ilabina sa mga ginikanan nga NAGKAGULIYANG ug kabalaka kay daw kuhaon na ang SHS.
