29/04/2026
13-ANYOS NGA DALAGITA GISUGO MAG PALIT UG ICE SA IYANG INAHAN WALA NA MAKAULI, PAGKAUGMA NAPALGANG PATAY NA SA TUBUHAN.
Hilabihan ang pag bangutan karon sa pamilya sa 13-anyos nga dalagita sa dihang gisugo kini sa inahan nga mopalit ug ice apan wala na kini makabalik ug pagka-ugma napalgan kini nga wala nay kinabuhe sa katubhan sa Sitio Lawagon, Barangay West, kagabie , Abril 27, 2026 .
Giila ang biktima nga usa Rica Grace Simple, molupyo sa Purok Pag-ulinganan , Barangay Haba, Cardoni , Negros Occidental .
Sa pasiunang imbestigasyon sa Cardoni Municipal Police Station nga gisugo ang maong dalagita sa iyang inahan nga magpalit ug ice niadtong nakalabay nga adlaw, sa mga alas-7:00 ang takna sa gabie Abril 26, apan nahibulong ang pamilya kay wala na kini makabalik ug pagka- alas-8:20 ang takna kagabie, Abril 27, napalgan ang patay nga lawas ni Rica sa usa ka Jerald 15-anyos uban ang iyang mga kauban sa katubhan nga wala na kini kinabuhe .
Sa dihang gisusi sa mga imbestigador ang lawas sa biktima aduna kini nakita nga samad sa agtang nga posible kining gibunalan ug gahi nga butang.
Bo-ot karon sa kapulisan nga ipailalom sa autopsiya ang patay nga lawas sa biktima aron masayran ang tinuod nga hinungdan sa kamatayon sa biktima ug aron masuta kung adunay laing nahitabo una pa namatay si Rica.
Sa pagkakaron aduna nay person of interest ang mga kapulisan ug nagapadayon pa ilang gihimong imbestigasyon ,samtang ang pamilya sa biktima ang nagapanawagan ug hustisya sa kamatayon sa dalagita.
