NewStar Phil, F. Llamas Street, Cebu City (2026)

03/06/2026

𝐇𝐀𝐌𝐓𝐔𝐍𝐆 𝐆𝐈𝐓𝐔𝐌𝐁𝐎𝐊 𝐍𝐆𝐀 𝐍𝐀𝐍𝐆𝐋𝐔𝐆𝐎𝐒 𝐒𝐀 𝟏𝟕-𝐀𝐍𝐘𝐎𝐒 𝐍𝐆𝐀 𝐃𝐀𝐋𝐀𝐆𝐈𝐓𝐀 𝐍𝐆𝐀 𝐈𝐘𝐀𝐍𝐆 𝐆𝐈𝐊𝐀𝐈𝐍𝐎𝐌 𝐒𝐀 𝐔𝐒𝐀 𝐊𝐀 𝐑𝐄𝐒𝐎𝐑𝐓 𝐀𝐓𝐔𝐋 𝐒𝐀 𝐔𝐒𝐀 𝐊𝐀 𝐃𝐄𝐁𝐔𝐓; 𝐒𝐔𝐒𝐏𝐄𝐊 𝐍𝐆𝐀 𝐆𝐈𝐒𝐈𝐊𝐎𝐏 𝐊𝐔𝐒𝐆𝐀𝐍𝐎𝐍𝐆 𝐍𝐈𝐏𝐀𝐍𝐆𝐇𝐈𝐌𝐀𝐊𝐀𝐊

By PAUL LAURO
Senior Correspondent

Gipreso karun ang usa ka hamtung nga lalaki human siya gipasanginlan nga nilugos sa 17-anyos nga iyang gikainom atul sa usa ka debut party sa usa ka resort sa City of Naga, Cebu

Ang suspek nga si alias Kian, 24, taga Barangay Awihao, Toledo City gisikop pasado ala 1:00 sa hapon niadtong Lunes, Hunyo 1, human sa hitabo sa usa ka private beach resort nga nahimutang sa Barangay Langtad.

Positibo siyang gitudlo sa biktima nga si alias “Maria”, 17, Grade 11 sa usa ka pribadong eskwelahan kinsa residente sa Brgy. East Poblacion sa nahisgutang siyudad.

Segun sa asoy sa biktima ngadto sa City of Naga Police Station Women and Children Protection Desk (WCPD) nga diha nahitabo sa “Room 8” sa resort ang pagpanglugos mga alas 8:00 ang takna sa buntag human sila nagkainom atul sa usa ka debut diin siya inbitado.

I-click ang link sa kumpletong detalye…

https://newstaronlineph.net/2026/06/03/hamtung-gitumbok-nga-nanglugos-sa-17-anyos-bnga-iyang-gikainom-sa-usa-ka-resort-atul-sa-usa-ka-debut-suspek-nga-gisikop-kusganong-nipanghimakak

📷 via Paul Lauro/ctto

01/06/2026

𝐒𝐈𝐍𝐆𝐋𝐄 𝐌𝐎𝐌 𝐆𝐈𝐃𝐀𝐊𝐎𝐏 𝐇𝐔𝐌𝐀𝐍 𝐍𝐀𝐍𝐆 𝐒𝐇𝐎𝐏𝐋𝐈𝐅𝐓 𝐔𝐆 𝐆𝐀𝐓𝐀𝐒 𝐀𝐋𝐀𝐍𝐆 𝐒𝐀 𝐈𝐘𝐀𝐍𝐆 𝐀𝐍𝐀𝐊

CEBU CITY- Napreso hinoon ang usa ka single mom human siya nadakpan nga nikawat gikan sa usa ka grocery store ug infant milk alang sa iyang gamay pang anak nga gigatas.

Ang suspek nga si alias “Kat (tibuok pangalan gipugngan),” 32, taga Baybay City, Leyte apan kasamtangan nga nanimuyo sa B. Rodriguez St., Brgy. Sambag 2 ning maong siyudad nadakpan pasado alas 2:00 kagahapon sa hapon, Mayo 31, sa sulod sa grocery store sa usa ka mall nga nahimutang sa Natalio Bacalso, Brgy. Pahina Central.

Nadakpan siya sa usa ka security personnel sa maong establismiento dihang padulong na unta mugawas nga bitbit ang usa ka NAN Sensitive HW infant milk nga balor ug P1, 669.50 apan wala mubayad sa cashier.

Gawas sa maong gatas, nikuha sab ang suspek ug usa ka Kerasys Cleansing Conditioner nga kantidad ug P368.00 hinungdan nga gidala siya sa Abellana Police Station human sa maong hitabo.

Nangatarungan ang suspek nga wala siyay kwarta ug kinahanglan kaayo niya ang maong gatas alang sa iyang masuso nga anak maong nanguha na lang siya sa maong gatas sa pamasin nga dili madakpan.

Kay nadakpan man, kasong theft (shoplifting) ang gikatakdang ipasaka nga sumbong kriminal batok sa suspek./ via PAUL LAURO

📷 CCPO Station 2 thru Paul Lauro

27/05/2026

𝟏𝟗-𝐀𝐍𝐘𝐎𝐒 𝐍𝐆𝐀 𝐌𝐀𝐘 𝐊𝐀-𝐋𝐈𝐕𝐄-𝐈𝐍 𝐍𝐆𝐀 𝐀𝐌𝐄𝐑𝐈𝐂𝐀𝐍 𝐍𝐀𝐓𝐈𝐎𝐍𝐀𝐋 𝐍𝐆𝐀 𝐆𝐈𝐊𝐀𝐓𝐀𝐇𝐔𝐍𝐆 𝐌𝐈𝐒𝐒𝐈𝐍𝐆 𝐍𝐀𝐏𝐀𝐋𝐆𝐀𝐍𝐆 𝐏𝐀𝐓𝐀𝐘; 𝐒𝐔𝐒𝐏𝐄𝐊 𝐒𝐀 𝐊𝐑𝐈𝐌𝐄𝐍 𝐓𝐑𝐀𝐘𝐒𝐈𝐊𝐎𝐋 𝐃𝐑𝐈𝐕𝐄𝐑 𝐍𝐆𝐀 𝐆𝐈𝐈𝐍𝐆𝐎𝐍𝐆 𝐃𝐑𝐔𝐆 𝐏𝐄𝐑𝐒𝐎𝐍𝐀𝐋𝐈𝐓𝐘 𝐊𝐈𝐍𝐒𝐀 𝐌𝐀𝐘 𝐑𝐄𝐂𝐎𝐑𝐃 𝐒𝐀𝐁 𝐊𝐀𝐍𝐈𝐀𝐃𝐓𝐎 𝐍𝐆𝐀 𝐁𝐔𝐎𝐓 𝐔𝐍𝐓𝐀𝐍𝐆 𝐌𝐀𝐍𝐆𝐋𝐔𝐆𝐎𝐒

By PAUL LAURO
Senior Correspondent

Kunpirmado nga kadto gyung 19-anyos nga may kapuyo nga American national kinsa sa sayu pa gikatahung missing ang napalgan nga patayng lawas kaganihang buntag karung adlawa, Myerkules, Mayo 27, didto sa kasagbutan nga bahin sa Sitio Cangcaya, Brgy. Poblacion Alcoy, Cebu.

Giila sa Alcoy Police Station ang biktima nga si JEANI PYRIL OROPESA BELARDO kinsa taga Sitio Panagikan, Barangay Tapon, Dalaguete.

Gitahu siya nga missing sa iyang live in partner nga American national nga si Lane Todd Patrick niadtong Mayo 23, Sabado, human kini nisakay ug traysikol ug nasubay ang iyang location pinaagi sa GPS nga diha sa iyang dala nga cellular tablet segun sab sa asoy sa maong Amerikano.

Opisyal nga na-blotter nga missing ang biktima kagahapon ug dunay nitumaw nga testigo nga iyang nakita ang biktima nga nisakay sa tricycle nga gimaneho ni ANTHONY ANTIG BALDOGO alias “Degak” nga sumala pa gisakyan sa biktima niadtong Sabado sa hapon.

Sanglit dunay GPS ang dala nga tablet sa biktima nasubay kini ngadto sa Barangay Balud Dalaguete ug nahibaloan nga gibaligya diay sa suspek ngadto sa ginganlan ug Januar Herauda kinsa maoy nibutyag nga ang tablet gibaligya ngadto kaniya sa suspek nga tricycle driver.

Human natumbok nga siya ang nibaligya, dunay laing testigo nga si Danilo Avila ang nitug-an nga ang suspek nga driver iyang nakit-an nga maoy nagmaneho sa traysikol nga gisakyan sa biktima niadtong Mayo 23 hinungdan nga wala na gyud makapanghimakak ang suspek.

Dihang siya gidakop sa hot pursuit operation giangkon sa suspek ang krimen ug matud niya iyang gidunggab ang biktima ug iya sab nga gitudlo kun diin niya gitagoan ang kutsilyo nga iyang gigamit sa krimen.

Gibutyag ni Alcoy Chief of Police P/MAJOR JOSE NILO ABELLO nga ang suspek notado nga drug personality ug gikatahu sab nga nisuway na kini ug pangpanglugos kaniadto ug mga babaye sa ilang dapit apan wala mulampos kay naatul nga dunay muagi nga mga tawo.

Samtang niangkon ang suspek sa pagpatay maglisud pagmatuod ang kapolisan nga gilugos ba sab ang biktima sanglit anaa na sa “state of decomposition” ang patayng lawas niini dihang napalgan mga alas 8:00 ang takna kaganihang buntag.

Tukmang kasong kriminal ang gikatakdang ipasaka batok sa suspek kinsa gipreso na karun sa Alcoy Police Station./with a report from CCO

📷 Alcoy MPS via Paul Paul Lauro/ctto

27/05/2026

𝐏𝐄𝐃𝐎𝐏𝐇𝐈𝐋𝐄 𝐒𝐔𝐒𝐏𝐄𝐂𝐓 𝐍𝐆𝐀 𝐀𝐌𝐄𝐑𝐈𝐊𝐀𝐍𝐎 𝐍𝐀𝐒𝐈𝐊𝐎𝐏 𝐒𝐀 𝐍𝐁𝐈; 𝐁𝐈𝐊𝐓𝐈𝐌𝐀 𝐃𝐔𝐇𝐀 𝐊𝐀 𝐌𝐄𝐍𝐎𝐑 𝐃𝐄 𝐄𝐃𝐀𝐃 𝐍𝐆𝐀 𝐌𝐆𝐀 𝐋𝐀𝐋𝐀𝐊𝐈

Gipreso na karun sa detention facility sa National Bureau of Investigation- Central Visayas Region (NBI CEVRO) ang usa ka American national kinsa suspetsado nga pe*****le human naaktuhan mismo sulod sa iyang condominium nga dunay kuyog nga duha ka menor de edad nga mga lalaki.

Gipahigayon ang malampuson nga “Operation CHRIS” tumong ngadto sa maong suspek ubos sa pagpangulo ni NBI Senior Agent Donaver Inesin niadtong nilabayng Dominggo sa gabii, Mayo 24, nunot sa Trafficking In Person (TIP) Helpline nga nadawat sa DSWD Region 7.

Ang tigpamaba sa NBI CEVRO nga si NBI Agent Ma. Contessa “Coco” Lastimoso nibutyag nga naabtan gyud sa mga operatiba ang maong langyaw nga kuyog ang duha ka menor de edad nga mga lalaki, edad 10 ug 15 anyos.

Segun sa inbestigasyon - ang mga biktima kuyogon sa suspek sa pagpanuroy niini sa mall unya may higayon usab nga makigdungan kini ug pangaligo sa banyo nga walay mga sapot kun “naked.”

Ang mga biktima nitug-an nga bayran sila ug P1,000 ngadto na sa P1,500 sa maong langyaw kinsa napaubos na sa inquest proceedings sa piskaliya tungod sa kalapasan sa Section 6 “Attempt to Commit Child Prostitution” ug Section 10(b) “Accompanying Minors in Establishments” basi sa Republic Act 7610 - Special Protection of Children Against Abuse, Exploitation, and Discrimination Act.

Samtang gipreso ang langyaw nga suspek anaa sab sa kustodiya sa DSWD 7 ang duha ka mga na-rescue nga mga menor de edad./CCO

27/05/2026

𝐍𝐀𝐍𝐆𝐀𝐖𝐀𝐓 𝐒𝐀 𝐇𝐀𝐋𝐈𝐍 𝐒𝐀 𝐖𝐀𝐓𝐄𝐑 𝐕𝐄𝐍𝐃𝐎 𝐌𝐀𝐂𝐇𝐈𝐍𝐄 𝐍𝐀𝐒𝐈𝐊𝐎𝐏 𝐊𝐀𝐘 𝐍𝐀𝐊𝐈𝐓𝐀 𝐒𝐀 𝐂𝐂𝐓𝐕 𝐂𝐀𝐌𝐄𝐑𝐀 𝐅𝐎𝐎𝐓𝐀𝐆𝐄

By PAUL LAURO
Senior Correspondent

Tingkagol karun sa presohan ang usa ka tawo nga nahibaw-an nga maoy nikawat sa halin sa water vendo machine human siya nakita sa CCTV camera footage.

Ang suspek nga si alias “Virgilio,” 57, nagpuyo sa Sitio Bato, Barangay Ermita, Cebu City nadakpan niadtong Lunes sa hapon, Mayo 25, didto sa dapit sa nahitaboan sa Natalio Bacalso Avenue, Barangay Basak San Nicolas sanglit ang iya gyud nga nawong ang nakita diha sa CCTV camera nga gimontar sa tag-iya nga biktima sa pagpangawat.

Nanawag dayon sa kapolisan ang biktima nga si alias “Swety”, 31, businesswoman ug nirespondi dayon ang mga polis nga sila Patrolman Kenneth Empleo ug Patrolman Dennis Dave Apas.

Giguba sa suspek ang vendo machine nga balor ug P9, 500.00 nga dunay sulod nga P3,000.00 nga halin sulod sa tulo ka semana ug tungod sa lig-on nga ebedensya nga CCTV footage gidakop gyud ang naasuyng suspek.

Kasong “robbery” ang gipasaka batok sa suspek kinsa nahibaloan nga walay klarong trabaho ug gituhuan sab nga dunay bisyo./with a report from CCO

26/05/2026

𝐂𝐀𝐋𝐋 𝐂𝐄𝐍𝐓𝐄𝐑 𝐀𝐆𝐄𝐍𝐓 𝐍𝐀𝐍𝐆𝐀𝐖𝐀𝐓 𝐔𝐆 𝐏𝐀𝐃𝐃𝐋𝐄 𝐒𝐀 𝐏𝐈𝐂𝐊𝐋𝐄𝐁𝐀𝐋𝐋

CEBU CITY- Gidakop ug napreso karun ang nagpaila nga call center agent (BPO employee) human siya nang-shoplift ug duha (2) ka paddle sa pickleball sa usa ka sporting goods store sulod sa Ayala Center Cebu.

Ang suspek nga si alias “Vic”, 29, ulitawo, mulopyo sa Barangay Basak San Nicolas ning siyudad nasikop pasado alas 3:00 sa hapon niadtong Lunes, Mayo 25, sa usa sa mga gwardya sa naasuyng establismiento.

Segun sa reklamo batok sa suspek nanguha kini ug duha ka paddle sa pickleball nga balor ug P5, 180 nga gisulod niya sa iyang itom nga backpack apan wala kini mubayad sa cashier sa maong tindahan.

Human siya gidakop sa gwardya gidala ang suspek sa Mabolo Police Station ug gipasakaan ug kasong “theft (shoplifting)” diin nasayran nga ang suspek bag-o pang nakat-on sa nauso karun nga duwa nga mao ang “pickleball.”/via PAUL LAURO

📷 Mabolo Police Station via Paul Lauro

23/05/2026

Look: 𝟐𝟎 𝐊𝐈𝐋𝐎𝐒 𝐍𝐆𝐀 𝐒𝐇𝐀𝐁𝐔 𝐍𝐆𝐀 𝐁𝐀𝐋𝐎𝐑 𝐔𝐆 𝐏𝟏𝟑𝟔 𝐌𝐈𝐋𝐘𝐎𝐍𝐄𝐒 𝐆𝐈𝐊𝐀𝐍 𝐒𝐀 𝐌𝐀𝐍𝐈𝐋𝐀 𝐍𝐀𝐒𝐀𝐊𝐌𝐈𝐓 𝐒𝐀 𝐏𝐃𝐄𝐀 𝐒𝐀 𝐂𝐄𝐁𝐔

Biente (20) kilos nga shabu nga balor ug P136 milyones pesos nga gi-land trip gikan sa Manila ang nasakmit sa mga operatiba sa PDEA ug kapolisan didto sa Purok Gaway-Gaway, Barangay Uling, City of Naga, Cebu.

Duha ang nadakpan atul sa naasuyng “big time buy-bust operation” kagahapon sa hapon, Sabado, Mayo 23, nga gipahigayon sa PDEA 7, Philippine Drug Enforcement Group (PDEG-SOU7) ug City of Naga Police Station.

Ang mga suspek nga giila nga sila alias “Romy D. (tibuok pangalan gipapungan sa mga otoridad)”, 57, kanhi electrician, taga Southern Leyte ug alias “Dante P. (gipapugngan sab ang pangalan),” 47, construction worker nga taga Province of Laguna didto sa Luzon natumbok nga maoy tig-deliver ug dinagko nga supply sa shabu sa Cebu hinungdan nga giliusad ang usa ka buy-bust operation ngadto kanila human sa dul-an sa usa ka buwan nga kinatibuk-ang operasyon nga nagsugod sa giingong source didto sa kaulohan.

Dunay undercover PDEA agent ang nagpatuo nga mupalit ug P1 million nga shabu ug nasabutan nga adto mag-abot sa Naga gikan sa byahe sa Luzon sa duruha subay sa giingong Western Drug Route - niagi gikan sa pantalan sa Batanggas paingon sa Mindoro tabok sa Caticlan, Aklan didto sa Panay dayon gikan sa Iloilo tabok sa Bacolod ngadto na sa San Carlos City sa Negros Island Region tabok na dayon sa Toledo City alang sa Cebu isip final destination.

Ang duha nga luwan sa usa ka Chevrolet Optra (ZGA 430) nipanghimakak
hinoon nga nakahibawo sila nga shabu ang ilang karga sa awto sanglit nila
pa - igo ra sila gisugo nga mu-deliver ug “parcel” bugti sa bayad nga P130,000.

Human sa pagdunol sa maong shabu nagpaila dayon ang poseur buyer nga PDEA agent ug ila dayong gihamag ug gisuta kun unsa pa ang dugang karga sa awto ug didto madiskobre ang daghan pang mga shabu nga gitago ilawom sa backseat ug diha sa hood niini nga giputos ug itom nga eco bag.

Kasamtangang gitanggong ang duha ka mga suspek nga pulos pamilyado sa PDEA 7 detention facility samtang gihikay pa
ang tukmang sumbong kriminal batok kanila segun sa nalatid sa Comprehensive Dangerous Drugs Act of 2002 (RA 9165)./CCO with a report from PAUL LAURO

📷 via Paul Lauro/ctto

20/05/2026

𝐃𝐔𝐇𝐀 𝐊𝐀 𝐁𝐀𝐓𝐀 𝐍𝐆𝐀 𝐍𝐀𝐖𝐀𝐋𝐀, 𝐍𝐀𝐏𝐀𝐋𝐆𝐀𝐍 𝐍𝐆𝐀 𝐏𝐀𝐓 #𝐘 𝐒𝐔𝐋𝐎𝐃 𝐒𝐀 𝐀𝐖𝐓𝐎
(gituhuang na-suffocate ug wala na kaginhawa kay na-lock ang sakyanan nga dugay nang gigarahe)

By PAUL LAURO
Senior Correspondent

Napalgang patay sulod sa usa ka abandonadong awto kaganihang udto karung adlawa, Myerkules, Mayo 20, ang duha ka mga batang lalaki kinsa gikatahu nga missing sukad pa niadtong Lunes sa hapon, Mayo 18, didto sa Barangay Tuyan, City of Naga, Cebu.

Ang mga biktima nga sila alias “Jeff” ug “Remart” (ilang tibuok pangalan gipangpugngan), pulos mga 7-anyos napalgan sulod sa usa ka gray Kia Picanto sedan (plate number ABM 7107) didto sa Sitio Sambag sa naasuyng barangay human natimahoan sa mga mulopyo ang baho gikan sa maong sakyanan nga dugay nang giparada sa maong dapit.

Pag-abli sa maong sakyanan nga nag-parking sa garahean sa usa ka pamilya sa naasuyng lugar didto nakit-an ang anaa na sa state of decomposition nga patayng lawas sa duha ka mga bata nga managhigala nga wala na makapauli pa sa ilang mga pinuy-anan didto sa Sitio Tapon, Tuyan.

Ang mga ginikanan sa maong mga bata nipa-blotter sa City of Naga Police Station kagahapon sa hapon nga “missing” ang ilang mga anak human sila nagtuo nga nagkuyog ra kini sa paglaag sanglit suod ang duha ka mga bata.

Nipahigayon pa ug dugang inbestigasyon ang kapolisan sa maong panghitabo apan segun sa inisyal nga pakisusi - nakasulod ang duha ka mga bata sa sakyanan ug na-lock na kini ug wala na gyud makagawas pa hinungdan nga na-suffocate sanglit wala nay makasulod nga hangin (oxygen) maong nakabsan sila sa ilang kinabuhi.

Ang mga ginikanan sa maong mga bata wala hinoon mureklamo nga dunay “foul play” sa maong panghitabo apan mahibaloan gyud ang tanang sirkumstansiya human na unya sa inbestigasyon nga gimando ni City of Naga Chief of Police PLTCOL DEXTER CALACAR.

Tainted ang bildo sa awto ug layo sa kabalayan maong wala gyuy nakatabang sa maong mga bata kan kansang mga patayng lawas gilubong dayon sa Naalad Public Cemetery sanglit naa na kini sa state of decomposition - ang usa nila diha naghigda sa drivers seat samtang ang usa didto sa back seat sa maong awto./with CCO

📷 via Paul Lauro

17/05/2026

Look: 𝐋𝐀𝐍𝐆𝐘𝐀𝐖 𝐍𝐆𝐀 𝐑𝐄𝐒𝐓𝐎𝐁𝐀𝐑 𝐌𝐀𝐍𝐀𝐆𝐄𝐑 𝐊𝐈𝐍𝐒𝐀 𝐍𝐀𝐆𝐇𝐔𝐏𝐎𝐓 𝐔𝐆 𝐀𝐔𝐒𝐓𝐑𝐀𝐋𝐈𝐀𝐍 𝐏𝐀𝐒𝐒𝐏𝐎𝐑𝐓 𝐍𝐀𝐃𝐀𝐊𝐏𝐀𝐍 𝐔𝐆 𝐒𝐇𝐀𝐁𝐔 𝐒𝐀𝐌𝐓𝐀𝐍𝐆 𝐊𝐀𝐍𝐇𝐈 𝐉𝐎𝐁 𝐎𝐑𝐃𝐄𝐑 𝐒𝐀 𝐆𝐎𝐁𝐘𝐄𝐑𝐍𝐎 𝐍𝐀𝐃𝐀𝐊𝐏𝐀𝐍 𝐒𝐀𝐁

Gipreso karun ang usa ka gikatahapang Australian national human siya nakuhaan ug shabu sulod sa iyang pinuy-anan sa Alegria Palms Uno subdivision sa Brgy. Gabi, Cordova, Cebu.

Mga sakop sa PDEA 7 ug Cordova Police Station ang nakadakop sa suspek nga si alias “Matthew”, 49, kasamtangan nga nanimuyo sa maong dapit pasado alas 11:00 ang takna kagahapon sa buntag, Sabado, Mayo 16, 2026.

Nagdala ug Search Warrant ang mga operatiba ug dihang gisiksik ang iyang gipuy-an - nakita ang shabu nga singko (5) gramos nga dunay balor nga P34,000 segun sa Standard Drug Price (SDP).

Segun sa PDEA 7 ang suspek nga usa ka restobar manager naghupot ug Australian passport kinsa gikatakdang pasakaan ug tukmang sumbong nunot sa iyang kalapasan sa Republic Act 9165 (Comprehensive Dangerous Drugs Act of 2002).

Samtang gipreso na karun sa Mandaue City Police Office (MCPO) ang usa kanhi ka job order (J.O.) employee sa usa ka nasudnong ahensya sa gobyerno nga nagbasi sa Cebu kinsa nasakmitan sab ug P3.4 milyones nga shabu sa usa ka buy-bust operation.

Ang suspek nga si alias “Midal”, 48, residente sa Barangay Tejero, Cebu City nadakpan sa mga operatiba sa MCPO CIty Intelligence Unit (CIU) ug City Drugs Enforcement Unit (CDEU) didto sa Mantawe Drive Extension, Barangay Subangdaku, Mandaue City.

Nasakmitan siya ug tunga sa kilo nga shabu (500 grams) dihang nalit-ag siya sa usa ka police poseur buyer nga iyang naka-transaksyon ubos sa superbisyon ni PLTCOL MARK GIFTER SUCALIT, hepe sa MCPO CIU.

Ang suspek nalakip sa High Value Individual (HVI) target regional level kinsa segun sa intelligence info siya mao ang “bodegero/kabayo” sa usa ka pinireso sa Cebu City Jail nga si alias “Jomel.”

Ang nadakpan maoy suguon asa i-deliver ang shabu human sumala pa nabayran pinaagi sa Gcash o GoTyme segun gihapon sa intel report nga nahipos sa kapolisan. /CCO with a report from PAUL LAURO

11/05/2026

𝟏𝟖-𝐀𝐍𝐘𝐎𝐒 𝐍𝐆𝐀 𝐃𝐀𝐋𝐀𝐆𝐀 𝐆𝐈𝐔𝐍𝐀𝐘 𝐔𝐆 𝐏𝐀𝐓𝐀𝐘 𝐒𝐀 𝐔𝐘𝐎𝐀𝐍 𝐍𝐆𝐀 𝐆𝐈𝐊𝐀𝐈𝐍𝐎𝐌; 𝐁𝐈𝐊𝐓𝐈𝐌𝐀 𝐌𝐀𝐘 𝐏𝐎𝐒𝐈𝐁𝐈𝐋𝐈𝐃𝐀𝐃 𝐍𝐆𝐀 𝐆𝐈𝐋𝐔𝐆𝐎𝐒 𝐒𝐀𝐁

Gawas sa kasong murder- posible sab nga mag-atubang ug kasong r**e kadtong usa ka uyoan kinsa niangkon nga maoy niunay ug patay sa iyang 18-anyos nga pag-umangkon nga dalaga didto sa Barangay Doljo, Panglao, Bohol.

Giila ang suspek nga si Elmo Lood, 37, usa ka kusinero, kinsa niangkon nga iyang gidunggab sa dughan ang biktima nga si Jerose Lood, service crew sa usa ka barbecue house sa naasuyng lungsod.

Segun sa police investigation nga nagkuyog ug inom ang duha hangtud niadtong nilabayng Myerkules sa kaadlawon, Mayo 6, ug sukad niadto na-missing na ang maong biktima kinsa gikan sa Plaridel, Misamis Occidental kay nadani sa suspek nga manimpalad sa Panglao arun mutrabaho.

Nakita na lang ang patayng lawas sa biktima niadtong Byernes sa hapon, Mayo 8 sa may basurahan nga duol sa baybayon sa Sitio Talisayan, Brgy. Doljo.

Gibutyag ni Panglao Chief of Police P/Major Sherwin Destora nga posibleng may “sexual assault” nga nahitabo ngadto sa biktima sanglit wala nay gisul-ob nga pa*ty ang dalaga dihang nakita ang iyang patayng lawas nga nagsugod na sa pagkadugta.

Kun mamatud-an sa forensic examination nga nahilabtan ang biktima nga dalaga- mapasakaan sab ug kaso nga “r**e” gawas sa murder ang suspek kinsa pinireso na karun didto sa Panglao Municipal Police Station.

Gihulagway sa kapolisan nga maayo ug hitsura ang biktima ug posibleng naibog niini ang suspetsado. /CCO

📷 DyRD/ctto

NewStar Phil

03/06/2026

01/06/2026

27/05/2026

27/05/2026

27/05/2026

26/05/2026

23/05/2026

20/05/2026

17/05/2026

11/05/2026

Address

Website

Alerts

Shortcuts

Share

Category