29/07/2026
KASYA BA SA 3 GYM BAG?’ | Sen. Raffy Tulfo, kinuwestiyon ang pagbibiyahe sa ₱125-M confidential funds ng OVP!
Sa nagpapatuloy na pagdinig sa impeachment trial ni Vice President Sara Duterte ngayong araw, Hulyo 29, 2026, hinarap ni Senator-Judge Raffy Tulfo ang testigong si Violeta Constantino, ang dating branch manager ng LandBank Shaw Boulevard, upang uriratain kung paano nailabas ang ganoong kalaking halaga ng cash.
Nang ihayag ng testigo na isinilid lamang sa tatlo hanggang apat na "gym bags" ang daang milyong piso, agad itong dinalubong ng pagdududa ng senador. Ayon kay Tulfo, batay sa pamantayan ng Bangko Sentral ng Pilipinas (BSP), ang bawat isang milyong piso ay tumitimbang ng humigit-kumulang isang kilo—na nangangahulugang aabot sa 125 kilo ang kabuuang bigat ng pera kaya't malabong magkasya o mabuhat ito sa tatlong karaniwang bag lamang.
Bukod sa sukat at bilang ng mga bag, kinuwestiyon din ni Tulfo kung bakit hinayaan ng LandBank na ilabas ang pondo nang walang kaakibat na armored vehicle o mahigpit na security es**rt ng bangko.
Depensa naman ng dating branch manager, wala silang opisyal na kasunduan para sa delivery services kasama ang OVP at wala ring hiling na tulong-seguridad mula sa panig ng mga nag-withdraw.
Gayunpaman, kinumpirma ng testigo na bagamat walang kawani ng bangko ang bumuhat sa mga gym bag, nagpahiram sila ng trolley upang matulungan ang Special Disbursing Officer ng OVP na si Gina Acosta at ang mga kasamahan nito na maihatid ang bilyete patungo sa kanilang sasakyan.
