Maguindanao Network

16/08/2013

Egkanggula sa Egypt.. kapembuno sa Islam
Posted on August 16, 2013 at 5:05 AM
Katigan ni: Mubarak Dumato

Egkanggula anya sia sa Egypt na dikna den i nia papalnan a guligaw atawka kapembunoa sa pageltan na mga political parties atawka mga lumpokan, dikna i nia kapembunoa sabap sa kabagagawa sa kamal sa mana ipebpayag (ipeb-promote) na mga taw anya minagaw sa kamal sa silan anya a mga Islamist na malini kumamal.

Dikna i nia papalnan a Military Coup sa kinaagaw sa kamal, ya den sia pembunon mismo na su Islam!!!

Kapembunoa i nia sa pageletan na bantang endu batil. Sa ya nin palas na nia ba mga Islamist anya a baninindeg sa Islam nandu banamikal sa kapambalingan sa kadatu nu Islam (on one side), nandu nia ba mga Secularist anya a pedsupporten na mga kontra na Islam sa kaped a inged, a tinabangan na "kaped" a mga datu na Arab anya sa Arab Gulf mana KSA endo Emirates (on the other hand).

limudep sa dark-tunnel i Egypt a dili katawan ngin i kabpawangan nin.

Saguna anto a Guiamat na ya ipegkagilek na kadadakel sa mga Political Analyt anya na kapagkaulad sa kabaminasakan anya endu kabanutong, sa ya nin palas na apya mga government establishments na binasan nilan, taman sa kagay na nanawag i minagaw anya sa kamal sa rumally mambu silan, katawan nilan i masla a rally na mga taw anya a pro-legitimacy & pro-democrac, mga supporter ni Pres. Morsi, nandu iblebeng nilan i gatus a mga Shahid a sampay saguna na dala makalebeng gumanat sa kinapamuno kanilan sa kanu gay na Arba, August 14.

Mapakay a manggula

Amaika dili madenda i kabamuno na military anya, egkaulad a tanto i kabaminasakan na mga taw na minagaw anya sa kamal a bagigiling sa civilian, nandu dili ipamamantag na interim government (or military) anya i mga countries anya a bagungaya (like Turkey & Qatar, etc), salta na edtamanan a kasabar i mga Islamist anya nandu edsambi i kanilan a paninindegan (Principle) sa ganatan nilan i kanilan a Political Line (non-violent or peaceful means) sa kaudtang nilan sa military coup anya na egkapakay a duwa i palaguyan nin:

- Civil War: nia bun ba i egkambitiala nandu ipegkagilek a manggula sa endaw den i kina awa sa kani Pres. Morsi. atawka

- Religious War: sa pageletan na mga Qib'ti (Copt) anya endu mga Muslim anya kagina samaya na madakel i nabidsulan a mga simbahan na mga bisaya anya sa embala-bala a probinsia. Ya bun namidsul lun na nia bun ba mga taw anya a namidsul sa mga Masjid endu mga bangkay na mga Shahid. (Secular na dili barityaya sa Agama, atawka papedsenggayan nin i Agama endo Politics).

Kaped a kailay a mangilut sa pilagay saguna atawka pilakapadyan amaika dili mapinda i nia a egkanggula na security, political, & economic catastrophe atawka kabinasan a masla.

Ya kahanda sa kapapegkasla endu kapapegkaulad sa guligaw anya sia sa Egypt na enggu makapayapat sa intiru na inged i kabinasan a masla endu enggilek sa tidto, mauli na isendit sa mga Islamist anya, ya nin kasla-sla na Muslim Brotherhood, sa i declare na Interim Government anya a minagaw sa kamal, nandu kaayunan na United Nation, i Muslim Brotherhood anya na terrorist a umpongan sa dunya, nandu i haram kanilan i kapagigiamung embalingan sa politika atawka kaumbal sa political party, nandu lupeten nilan i langun a Islamic Movement.. taman sa taman.

Tindeg na mga Islamist

Mga Islamist anya na pedtindegan nilan sa mabagel i kanilan a policy “Non-violent or Peaceful Resolution” apya maitu den i nanggula na entuba i di kabangandam sa di manggula i isa sa duwa anan. Kagina ya lun kailay na military anya na ibagulog nilan i situation anya sa Civil War asal di silan ma court martial, nandu makwa nilan a tindeg sa benal i kanilan a antapan sa mga Islamist anya na mga terrorist.

Temu ya last a bitiala ni Pres. Morsi bagu sekanin inawa na military na ya nin inipanutuma endu ini pananawag na “Non-violent or Peaceful Resolution” (democratic means) kagina katawan nin i saben-sabenal a pedtalun anya a PLOT or CONSPIRACY na malendu i tanul nin nandu masla, entuba sa nauna anto a bitiala, dikna i nia papalnan a Military Coup ka ya den pebpunasen endu pembunon na pedtalun a Islamic Plan, ya maitu na kapambalingan sa kadatu nu Islam. Ya nin amadan na pedsiken 5,000 i nashahid, labi 10,000 i napalyan sa mga taw anya a baninindeg sa Islam (bilangan na mga doctor sa ground), ngibo-ngibo bun i binilanggo, magidsan i normal a taw endu mga leader na mga Islamist, su kaped na dili den katawan endaw nakasangol.

Tidtu a punsuan na guligaw

Dikna ya kina awa sa kani Pres. Morsi i sabap sa "failure" i guberno nin sa dalem a naka isa lagon, kagina dili magaga mumbaya sa saplek-mata i inged a bininasa na nangauna salkanin sa puloan lagon, ya masla na upama ka “failure” na dikna ya dait a issolve lun i Military Coup, kagina si Pres. Morsi i paganayan a civilian a nabaloy a President sa langun a inged na mga Arab anya, naukit sa limpiyo a election atawka Democratic means.

Ya tidtu a sabapan a kinaawa sa kani Pres. Morsi endu kabagimatay sa umpongan na Muslim Brotherhood, sa pidtatabangan na mga secularist sia sa ludep endu liyo na Egypt, European countries ya masla na US government, apag na mga kaped sa mga datu na Arab world anya, na sabap sa ipegkagilek nilan i makapass nandu mananalusan i kamal ni Pres. Morsi, na makapass su pamikiran a kapapembalingan sa kadatu nu Islam, dikna ya sabap i failure su lekanin a guberno.

Ya mauli sia na kapangingarap ku sa Darul Ifta nu Bangsamoro Homeland atawka su Masajid Affairs i i makasekat nilan i tumabang sa du’a atawka kunot sia kanu mga sambayang tanu, sa tabangan nu Allah i mga suled tanu anya a banamikal sa kapapedtibambaw kanu Agama, kagina san den sa ka pass u nia a kahanda, na munot bun su lekitanu a ibaninindeg (inshaAllah), amaika dili den egkasulot i makaaden sa peaceful rally sa support sa mga Islamist anya atawka ungkir sa kinapamuno anya sa mga taw a dala bagel nilan a sinapang ya tabya na Iman.
*********
Mapakay a ilay nu i video anya a bitiala ni US Senator Mark Kirk pantag Egyptian political situation kanu December 2011 para kasabutan i kaped a punsuan o nia a guligaw [ http://www.youtube.com/watch?v=oIh1RihNvYs ]

** Nia su link nu nia a bitiala: [ http://maguindanaonetwork.webs.com/apps/blog/show/32056159-egkanggula-sa-egypt-kapembuno-sa-islam- ]

10/08/2013

(Katigan nu Amerul Mujahideen sa kinauma nu Hariraya Fitri)

بسم الله الرحمن الرحيم
MORO ISLAMIC LIBERATION FRONT
CENTRAL COMMITTEE
Office of the Chairman
_______________________________________________

In Behalf of the Moro Islamic Liberation front M**F let me extend our warmest and brotherly Eidul Fitre greetings and felicitations to the entire Bangsamoro people and Muslim Ummah in every nook and corner of the Bangsamoro homeland and those elsewhere and congratulate them for the faithful and religious completion of the month-long fasting as prescribed by Allah (Subhanaho wa taalah). May Almighty Allah accept and reward our fasts, prayers and good deeds during this holy month of Ramadhan and grant us His forgiveness and mercy.

Alhamdulillah, relative peace reigned in most part of the Bangsamoro homeland especially after the signing of the Framework Agreement on the Bangsamoro on October 15, 2012, which bolsters the optimism for the final resolution of the Bangsamoro Question and the conflict in Mindanao. However, recent happenings particularly the skirmishes between armed groups and the Government forces which claimed innocent lives and destruction of properties and displacement of helpless civilians run counter to the efforts in finding a peaceful negotiated political settlement of the centuries old Bangsamoro problem. Aggravating the situation is the series of bombing in Cagayan de Oro City, Cotabato City and elsewhere, killing and injuring precious lives and causing destruction of properties and establishments. Condemning these heinous acts is not enough; we must unite and strengthen our pursuit in countering these deplorable activities.

At this juncture, we appeal for calm and sober. Let us unite and exert our utmost effort to stop all these criminal and anti-people activities leading to more destruction and unnecessary lost of lives. We exhort you to give chance to permanent, lasting and genuine peace not only in the Bangsamoro homeland but elsewhere especially in the Muslim World. We should succeed in this endeavor to guarantee the safety and security of all peoples, which will redound to progress and economic advancement, insha Allah.

Therefore, once again we earnestly appeal for your enduring support to the Framework Agreement on the Bangsamoro (FAB) and the ongoing peace process between the Moro Islamic Liberation Front (M**F) and the Government of the Philippines (GPH). For those critics of the agreement, we call upon them not to negatively pre-judge the accord, give chance for its completion and ultimately its implementation, be constructive and be not spoilers of peace. Anyway inshaAllah, we will all be beneficiaries of dividend of peace we are trying our level best to attain.

May I reiterate, your unflinching support and cooperation are inevitable for us to succeed. As we celebrate this auspicious day of Eidul Fitre, we solemnly pray to Almighty Allah for His continued blessings and guidance in order to attain what is good in this world including our inalienable rights to freedom and self-determination and the hereafter, insha ALLAH.

Your brother in Islam and humanity,

AL HAJ MURAD EBRAHIM
(sgd)
CHAIRMAN

----------------------------------------------------------------
(Message of Chairman Al Haj Murad Ebrahim of the Moro Islamic Liberation Front on Eidul Fitre, August 9, 2013, Camp Darapanan, Simuay, Sultan Kudarat, Maguindanao, Bangsamoro Homeland)

[Source: Maguindanao Network correspondent in Camp Darapanan,Simuay, Sultan Kudarat, Maguindanao]
- Nia su link nu nia a katigan sa mainsite: http://maguindanaonetwork.webs.com/apps/blog/show/31946933-message-of-chairman-murad-on-eidul-fitre-2013

09/08/2013

Pedsabutan sa Annex on Wealth-Sharing
Posted on August 9, 2013 at 5:45 AM
Katigan ni: Mubarak Dumato


Ya tidtu a kakawasan nu inged na su t'nay atawka su taw nu inged. Langun a inged, ya nin upama na maya ba sa inged na Bangsamoro anya, na amaika ya pangilain i kaiseg atawka kaudsul nu inged (development), na nasisita muna i mambalay nandu maaden muna i bagel atawka kasangkapan nu maginged.

Langun a pedtalon a "development' na nasisita i sia lumudso ku maginged nandu sia bun kanilan dumedsa.

Amaika ya kayaten nandu ebpapangilain na uman i isa i katilan a nadalem sa Annex on Wealth-Sharing na aden bun matun nin lun. Labi den su mga taw a dili pakaayun lun. Kagina apya panun na dala kapasadan (agreement) a sia egkaukit sa "negotiation" a dala tila nin.

Sia sa kapasadan (agreement) pantag sa kakamal nu isa a lumpokan u maginged (self-governance) na ya bu labi a mapya nandu dili katunan sa tila na amaika "indipendence".

Negotiation a pedtalon na kabagenggaya. Ugaid na su paninindegan na dili egkalusod sa pasayan, ugaid na uman i isa na papedtamanen nin i lekanin i kabagayag. Dikna ya egkambitiala san i kabpuloan nengka, ugaid na nasisita i kasabutan nengka i untong nu pantagay nengka. Nia ba i sabap nin i dili egkanggula i dala maton a tila sa maya ba a mga kapasadan, kagina ya bitiala sia na kabagenggaya, dikna kapedtegela. Upama ka ipedtegal na dili den mukit sa negotiation ka simudan a sinapang i ukitan.
Annex on Wealth-Sharing a nasampay nu Jihad u Bangsamoro na dait i nia a pebparihalan nandu pedtatabangan u Bangsamoro sa kaiseg nin sabap sa apya kaped a mga taw sa dunya a pedtulik sa kapembitialay na napamedta nilan.

Sia ku kalkula (estimate) nu mga migkakataw na nakasaut sa 26 i embalangan na "Natural Resources" a naludep sa kalupan u Bangsamoro. Upama pedtad/budta endu grava, mga wato (non-metallic minerals) na dala den porsinto na Central Government (guberno na Pilipinas), sia manem sa Tax endu putaw, wagya enda salakaw pan san (metallic minerals) na 75-25 i kapembad lun sa ya mapulo i kana guberno na Bangsamoro. Sia manem sa Energy mana upama na gasolina, crudo, atawka uranium (matag nalabit i uranium na dili bun katawan u aden) na 50-50 i kabagumon lun, ugaid na nabpasadan i mambitiala pan embalingan sa kapakay a egkapulo pan i umon nu Bangsamoro government.

Su taw a banuliman sa mapya na dili nin tumpongen i kapangingilay nin sa ya nin bu sandengen na mga antangan anan sa kinapamagumon sa kakawasan.

Ya pedsabutan sa nia ba Annex on Wealth-Sharing anya na ya tidto a napantiali nandu nadtaban u Bangsamoro na pedtalun anto a "Authority". Kawagib sa kagkibilan atawka kakamalan nu Bangsamoro su kakawasan u inged nin. Sa dili mapanalapas nu Central Government su kakawasan atawka tamok nu Bangsamoro Government.

Masla i embidayan o nia a kapasadan sa kinapagumon sa kakawasan nandu su kapasadan a nadalem sa Final Peace Agreement (FPA) sa pageletan u guberno na Pilipinas nandu su Moro National Liberation Front (MNLF). Upama ka mapya a tanto i nadalem sa FPA anto na dili manggubasa i bagidtugan bu sa balegkas i ARMM, ya masla na nakasengaw-sengaw den i Bangsamoro sa kasimpit a kapaguyag endu kabaginged sa dalem a naka labi 20 lagon.

Categories: Bitiala na Ana
[Link nu nia a bitiala: http://maguindanaonetwork.webs.com/apps/blog/show/31938127-pedsabutan-sa-annex-on-wealth-sharing ]

08/08/2013

Darul Ifta sa Bangsamoro Homeland: Guiamat i paganayan a Eid'l Fitr

Bandar na Kutawato -- Pinasabutan na walay nu Darul Ifta sia sa kalupan na Bangsamoro Homeland i gay na Guiamat, August 9, i paganayan a Eid'l Fitr nandu ento ba a gay i kapedsambayang sa buka na hariraya fitri al-mubarak.


Su ento a katigan na ya lun napalyu na su Chairman nu Darul Ifta a si Al-Mufti Ash-sheikh Abu Hurayra Udasan sia kanu magabi nu Arba (malulem na Salasa).


Ulyan a kina lakit nandu kinatalanged nu langun u committee a sinaligan nu Darul Ifta sa embala-bala kanu mga pagingedan u kalupan nu Bangsamoro sa su sebang a ulan-ulan nu Shawwal na dala mailay sia ku kalupan nu Bangsamoro na entu pan ka nakapalyu su Darul Ifta sa katigan sa makabpuasa pan sia kanu gay na Khamis.


Sia sa kaped a mga inged na Muslim sa dunya na Saguna a gay na Khamis i paganayan a Eid nilan.


Sabap san, su ingalan u opisina nu Maguindanao Network na ipedsampay nin su sakaw-sakaw a malilintad endo salemendua sa kanu langun o Bangsamoro, magidsan i sia sa ludep endo liyu na inged. [ini sulat ni Haytham Abdussamad]
Categories: Tudtulan

[Nia su link nu nia a tudtulan sa main-site: http://maguindanaonetwork.webs.com/apps/blog/show/31917026-darul-ifta-sa-bangsamoro-homeland-guiamat-i-paganayan-a-eid-l-fitr- ]

24/07/2013

Su Bangsamoro.. endo Regalian Doctrine
Posted on July 24, 2013 at 12:30 PM
Katigan ni: Mubarak Tiboron Dumato

Bago napirman i ika 2 a Annex nu Framework Agreement on the Bangsamoro (FAB), nia ba Wealth-Sharing anya, na aden pedtalon a "contentious issues" atawka mga bitiala a egkambimbangan, dili bagayunan, upama ka dala kapangilayi sa ukit su ento a enggagaisa na dala bun kapirman kagina dili egkatalima nu mga kasaligan tanu sa panel na M**F i ipedtegel na guberno na PIlipinas.

Kaped sa pinakamasla a bitiala a egkambimbangan nando dili bagayunan, na ipedtegel nando ipebpeges nu guberno na Pilipinas i ya mabaloy a udsadan a gugudan atawka pangitaban a kaunotan pantag sa kabagumon sa "natural resources" na pangitaban a pembedtuan sa "Regalian Doctrine".

Ya pedtalon a Regalian Doctrine sia sa kasabut lun o kukuman (constitution) nu Pilipinas na (su kapantekan nin); "langon o kalupan a dala kigkuwan lun, kalagatan, langon a embalangan na mina na gasulina (oils), mga mina a kakwayan sa bagel (energy) endo kaped pan a kakawasan o inged na ya lun ki milik na kanu inged (guberno); nando su kambaraguna lun, kaabak lun.. na taratanto bu sia kanu edsinakatawan kanu mga taw na Pilipinas..; dala lisensya atawka endaw san a kasulatan a sumugot sa kambaraguna atawka kaabak kanu kakawasan sa sumobra sa 25 lagon, nasisita na mabago su lisensya, ya salakaw lun na amaika pantag sa kawagib sa irrigation, ig.. salakaw pan"

Nia ba a bitiala a ipedtegel nu guberno na Pilipinas na dala pagalang-alang atawka dala enduwa-duwa su panel tano sa dala nilan katalima sa nia ba a antangan na Pilipinas a mabaloy a atulan sa kanu kakawasan o inged nu Bangsamoro.

Ya dawa nu guberno na Pilipinas na ini upama nilan i Regalian Doctrine anya sa mana tanda (symbolism) a makatutulo tig nilan nando sabapan a kapaginugot o mga taw sa Pilipinas sa su M**F atawka su Bangsamoro na dikna "pedsenggay" (Independence) sa Republika na Pilipinas.

Dikna nasisita i maaden pan i pedtalon a "symbolism" kagina ya nin sabap na gumanat sa kinaludso na kinambitialay kano lagon a 1997 (timpo pan nu Ameer a nawafat a si Sheikh Salamat Hashim), taman kanu 2001 sampay den saguna na dikna egkambitiala i "Independence" sa kapembitialay. Ya pan labi, na sia kanu kinapirma sa FAB, a nalabit lu i su bago a gugudan atawka antangan sa pageletan o guberno na Pilipinas endo guberno na Bangsamoro na pedtalon a "asymmetric", na ento bu ba a bitiala na mapayag a benal i dikna ya bitiala i kapedsenggay.

Dili egkatalima
Tanto a nangimpatain nando naninindeg su mga tagapda sa panel tano sa dala katalima nando kinan-discuss sa enduken ka dili egkatalima nu Bangsamoro i Regalian Doctrine, sa apya banasang i kapegka-waw nandu gutem sa timpo a kapebpuasa na dala nilan magedam.

Sia kanu bitiala ni Robbert "Bobby" Maulana Marohombsar Alonto, senior member nu panel na M**F, na inupama nin sa "brutal" atawka pidtedtaban a kapasang i kinandiscuss nilan sa kanu pantagay nilan sa guberno pantag sa nia ba a bitiala.

Ya nin sabap into na upama ka taliman u Bangsamoro i Regalian Doctrine a pedtalon na dala natagan o kinapangimpatain, dala natagan o kinapaninindeg sa kanu kawagib sa puloan lagon. Su katalima nu Bangsamoro sa Regalian Doctrine na timbang tinalima nin bun i nasakop nandu naulipen o Espanyol sa mana su silan a mga Filipino.. su Moro na dala maulipen na Espanyol, dala maulipen na Hapon, dala maulipen na Amerikano, nando dili tumalima sa maulipen na endaw san a inged!

Sabap sa Regalian Doctrine a kinamalan na Pilipinas nando ininggulalan nin sia kanu pagingedan o Bangsamoro na namba i (kaped) a sabapan a kinasaged nu Moro sa matalem nando sabapan a kinapaninindeg, sabapan a kinan-Jihad, nandu nambun ba i kaped a sabapan a kina ato tano embitialay sa guberno na Pilipinas.

Upama ka tinalima nu Moro i mamba a atulan na dala natagan atawka dala nasisita sa kanu FAB.

Su katalima lun na mabaloy a maka haram kanu Bangsamoro sa kasampay nin kanu unga nu Jihad endo kinapaninindeg, kagina ya nin sabap, na su kinapanggulalan endo kinapangamal lun nu Pilipinas sa mabaloy a pangitaban i Regalian Doctrine, bilang ulipen na Espanyol endo Amerikano, na namba i nadsabapan a kinadala nu mga kalupan o Bangsamoro.. sabap sa Regalian Doctrine na naagaw nando nadala su pagingedan o Bangsamoro, ya masla, na sabap san na nadala su MARTABAT endo KAWAGIB o Bangsamoro sa kandaludaya (freedom) bilang isa a taw a aden kawagib nin sa mauyag sa mapya, nando kawagib nin sa kakamal nin kanu inged nin a pusaka. (sumpatan tano bu)

http://maguindanaonetwork.webs.com/apps/blog/show/30915187-su-bangsamoro-endo-regalian-doctrine-

24/07/2013

Kasandeng tano den su kalilintad, ugaid...
Posted on July 24, 2013 at 12:00 PM
Ini sulat ni: Mubarak Tiboron Dumato

Sia ku kitab a ini sulat ni Ustadz Salamat Hashim a "Bangsamoro Mujaheed: His Objectives & Responsibilities" a ya nin lun kinasulat na sia ku lagon a 1984, na nadtalo ni Ustadz Salamat (Allahu Yarhamuhu) i amaika dili masulut i "Independence" na ya den pinakapaidu na "Meaningful Autonomy".

Ya mapantek a kasabut sa pedtalon a Meaningful Autonomy na ibarat u isa a walay, na isa bu i walay, ugaid na aden natatalanged a bilik nu Bangsamoro a dili kapangilunsudan nu kaped a taw nu walay, dili magkibil-kibil su ludep u bilik nin, nando aden natatalanged a lekanin a mga atulan sia ku ludep u walay. Amaika sia ku liyu nu ento a bilik na aden mga atulan endo enggagaisa a kadtumpukan u Bangsamoro endo su kaped a taw nu walay. Su liyu manem u walay na ya lun pegkibil na su egkadtalo a papegkakan sia ku walay, ugaid na dala kawagib nu entain a taw nu walay sa kaungen endo kasapal nin sa entain i pembisita endu b'ludep sa kanu bilik nu Bangsamoro.

Su namba a antangan na namba i andang andang a tindeg nu mga kangaunotan tanu sia sa umpongan.

( https://www.facebook.com/photo.php?fbid=526680934033806&set=pb.417591781609389.-2207520000.1374642760.&type=3&theater )

Timpo sa Cairo;

Ya nin tanda, na sia ku lagon a 1969 na aden kasuguan (Resulotion) a pimbalay nu mga kangaunotan tano sa timpo a sia pan silan sa Cairo.

Uway, kagina kadadakelan a tumideng o umpongan tano na sia nakapangagi sa Cairo, sia sa Al-azhar University, iganat sa kani Ustadz Salamat Hashim, si Ustadz Ebrahim Kampong a kilala sa ngalan a si Ustadz Abukhalil Yahya, si Ustadz Omar Pasigan, endo kaped pan.

Sia kanu lagon a 1959 na nilimbag nilan su Umpongan u mga Mulit sa Kutawato sia sa Cairo, nia ba i paganayan a umpongan atawka lumpokan na maginged a Moro atawka Filipino sia sa Egypt, nauli pan i kinabetad na guberno na Pilipinas sa Embassy nin, sabap sa mga mulit a Moro sia na entu ba i sabap a kinabetad na Pilipinas sa Embassy nin, taman sa su namba a umpongan nu mga mulit na ya matanug i suwara endo ya labi a bamakikinegen na guberno na Egypt ganat sa ganatan.


Resolution;

Aden 6 timan a naludep sa ento ba a "resolution" a ya nin pimbitiala na kapedsugo sa isa atawka duwa a sugo (representative) a tumalabok sa "Constitutional Conference" a bangadenen na guberno na Pilipinas sia ku lagon a 1971.

Nadtalo sia ku ika 2 kanu ento a 6 timan a kasugoan (resolution) i;

"Palyugat sa kanu sugo (representative) i pangenin nin sia ku ento a Conference i mabaloy su Pilipinas sa "FEDERAL GOVERNMENT" sa ya maito na maaden sia ku uman i pulo-pulo (region) i kawagib a talutup sa uman i isa a "region" na makambalay sa natatalanged a mga atulan nin sia ku ludep o "region".

Ya maito na apya endaw den san i palas a guberno, ya importante na su Bangsamoro na sekanin i maka umbal sa lekanin endo natatalanged a pangitaban nin.

Iganat sa paganayan na ya tindeg o mga kangaunotan tano na maito ba sa pamikiran nu andang a Ameer, pagiso pan i palas na guberno ya importante na su Bangsamoro i makaumbal sa lekanin a pangitaban a sumugat sia ku kaaden nin a Moro.

Framework Agreement on Bangsamoro (FAB);

Saguna na tanto a egkababesan sa galbek su Bangsamoro Transition Commission (BTC) sa kapembetad nilan sa kano Bangsamoro Basic Law (BBL). Su namba a Basic Law atawka unayan u pangitaban nu Bangsamoro Government a papedtindegen na ya pegkandutan lun na endaw i makadait endo sumugat sia ku Bangsamoro.

Kailay tano endo kadsaksian tano i madakel i pedtabang sa panun i kaiseg endo kanggulalan na FAB anya, apya kaped anya a mga bisaya na pakaayon sa FAB anya, kagina madakel i masla i inam nin sa nia ba FAB anya i kaped a lalan sa ikalilintad na Bangsamoro.

Benal, kagina FAB anya na lalan bo i nia a bagukiten sa ikasampay nu Bangsamoro sa kano tidto a kahanda. Dikna tano sia pedtaman.

Ya makalido sa ginawa na aden bun anya egkaton a Moro a dili pakaayon sa FAB anya. Dili silan lu madaway amaika bangandam silan atawka penggilek. Ugaid na amaika ya nilan di kape-support i sabap sa aden natatalanged a kahanda nilan (personal interest) na edtawbat endo magumbaya silan ka dusa nilan sa kanu million a Bangsamoro a karasay.

Apya ngin i kapatuntay nengka sa kanu taw sa ya warna nu nan a enggagaisa na maliga, na itegel nin bun i kulit. Taman a dili nin palyun kano akal nin i lekanin anto pamikiran a limban na malalagit nin su kamapyanan o madakel.

http://maguindanaonetwork.webs.com/apps/blog/show/30914550-kasandeng-tano-den-su-kalilintad-ugaid-

24/07/2013

Narasay silan.. kawagib nilan
Posted on July 24, 2013 at 12:20 PM
Katigan ni: Mubarak Tiboron Dumato

Aden (at least) 5% a pakasenggay a natatalanged sia egkausal sa kano mga babay a sakop nu Bangsamoro, sia ku kanilan a mga programs atawka activities a ikaudsol endo ikaiseg o mga babay "for support programs and activities for women". (Section 12:Gender & Development - Annex on Revenue Generation & Wealth Sharing)

Dala kinapagapas o umpongan tano a M**F sa maya ba a gugudan ya tabya na limo nu umpongan tano sa kano mga babay o Bangsamoro sabap sa silan ba i tidto a nananggit sa kanu Jihad sa kanu inged, ya anan nadtalo na (at least 5%) pinakapaido den, kagina dilik egkawagib a dili makurmat su mga babay nu Bangsamoro ka silan ba i madakel i nakadsakripisyo nin sa kanu Jihad.

Silan ba i naawan a kaluma, silan i naawan a mga wata, silan ba i timarbiya sa kano mga wata nu mga Mujahideen, silan ba i timarbiyyah sa kanu mga mauli a taw nu Bangsamoro sa kutika a baninindeg su mga mama nilan sa kano inged. Silan ba a mga babay i timyakap sa kano martabat endo ebpangkatan o mga Mujahideen.

Dili silan pembuko apya gagapilagay na dili nilan egkadtagapda su kaluma nilan ka nagadidi silan sa kanu inged nando parityaya nilan sa kanu kasuguan o Agama.

Amaika lumalakaw su mga Mujahideen, na apya endaw silan makaut sia kano mga pagingedan, atawka apya makasagad bu sa isa a inged, na dili makadtuganula su silan a mga babay, su mga ina, sa kapamagatol sa endaw den i aden, apya ig bo, na dili nilan katigkelan i dili nilan makapainum su mga Mujahideen sa apya isa ka-adtak bu a ig, sa mana su dili katigkel endo kakalimu nu ina sa kanu tidto a wata nin, atawka minuna pan lu ka aden anto na dili nin madtulan su wata nin.

Babay na Bangsamoro na tanto a mataya endo malimu nando marasam.. maya ba i adat endo tabyat nilan amaika ya pembitialan i kabaninindeg kanu inged.

Paido pan i nan a dait a baras para kanilan sabap sa madakel endo masla i nanggalbek (role) nu mga babay sa kapapedtindeg sa Bangsamoro government.

Su mga babay nu Bangsamoro na timapid silan sa tidto-tidto, side by side, sa kano mga mama nu Bangsamoro sa kinapaninindeg kanu inged a pinadtaya.

Be proud enough for being a Bangsamoro woman! We are so proud of you.

http://maguindanaonetwork.webs.com/apps/blog/show/30915070-narasay-silan-kawagib-nilan

24/07/2013

Kaped sa katigan nu Amir sia ku kinalimud nu mga ustadz
Posted on July 24, 2013 at 12:15 PM
Ini sulat ni: Hassan Al-Basri Dalanda

Su kina General Assembly nu Lujnatod Da'awah (Da'awah Committee) kagay ba antu, July 6, 2013 na madakel i naka attend embala-bala i provinces i naganatan nin.

Madakel i nambitiala nu Amir tanu antu, di ko magaga sa ma i share ko intu salkanu langun ugaid na ya ko bu maka sampay salkanu langun na su mga muntos o bitiala.

Paganayan a kadtalo nu Amir tanu na Madakel tig nin e Islamic Movements sia sa dunya, na langun na entoba na yanin kahanda na ya makatibambaw na so Islam, uged tig nu Amir tanu na embidaya sa ukit, aden tig nin ya nilan inukit na Da'wah aden manem tig nin ya nilan inukit na matalem mayaba sa Pakistan ah.

Taman man sa pinanudtol nu amir tanu i nanggula sa Egypt sa bago pon a nia.

Al-Ikhwanil Muslimeen tig nin na paganay na kalinyan gaid nu ped a mga tao ka mapia i ka Islami nilan, engguna silan makangguberno, taman sa simangkad silan sa enggulalan nilan i Islam sa Egypt na dala kalini no ped kanu mga tao su ento a sangkad nilan, yanin ma'ana ped kanu mga tao na dala nilan kalinyay i makanggulalan su Islam.

Namba tig nin a nanggula na masla a pangagi salkitanu a mga BANGSAMORO, di tanu tigin masiguro i langun na Muslim a nya sia sa Mindanao na malilini makatibambaw i Islam, aden pan tig nin mga tao a ped-takbir sa mabagel inunta na ilayn nengka na di nengka ma ilay i ka islami lu kanu ginawa nin, basi ya tanu bun magkontra na mga pagali tanu bun. Na namba na ka ingatan tanu i namba.

Nandu sekitanu tigin a mga Bangsamoro, na di tanu gaid inamen i su BANGSAMORO GOVERNMENT na purely Islamic Government. Di tanu tigin inamem i endaw den tig nin i kadtakena na Bangsamoro Government na egkapia den su Bangsamoro, uged tig nin na nambumba i kahanda nu Bangsamoro Gov. na egkapia su Bangsamoro.

Taman sa aden tig nin pagali tanu a taga Turkey a naka talabuk kanu kinalimod nu Hay-atol Ulama (Lumpukan nu mga Ulama) na ya naka advise nu Turkian "Kapengguberno na pelipaladuwan a benal, ingati no tig nin ka su mga tao tig nin a paganay a pedtabang sa Gov. na aden gay di den edtabang sa Gov. ka ya den tabangan nu Gov. na ingati nu tig nin ka di silan makakan na maya minggoberno i Bangsomoro a nya na dala bun palin nin.

Na namba, ka ingatan tanu a benal e namba.

Nalabit bun ni Chairman, i pantag sa mga text msg. a nya embalang-balang i uni nin, na namba na dili dait a ibamamantag. Ka upama nin ka aden plano nu Umpongan na dikena man i ukit nin ka timbang a pinaingat nengka den e kuntra.

Yaden sia mauli na su pantag kanu kapembitialay. Upama tig nin ka aden kapasadan ka makangguberno tanu na pelipaladuwan tanu sa mapya.

Upama nin manem ka so kapembitialay ka dala den inam nin sa makagkapya pan sa Bangsamoro na andang den a tinalima tanu i musal tanu sa matalem.

Mga pagali ko a mga Bangsamoro di tanu gaid edsasaw sa kangguberno ka mapasang i nan a galbek.

http://maguindanaonetwork.webs.com/apps/blog/show/30914650-kaped-sa-katigan-nu-amir-sia-ku-kinalimud-nu-mga-ustadz-

17/04/2013

BIAF inatak na AFP, natalsak su ceasefire
Ika 8 sa Jamadil Akhir 1434 | April 18, 2013

Camp Darapanan, Sultan Kudarat, Maguindanao – Madakel i napalyan sa kasundaloan na Moro Islamic Liberation Front (M**F) sabap sa niludepan silan na kasundaloan na gubernoa na Pilipinas sa mapita-pita na Isnin, April 15, sa Sitio Badja Maluha, Baryo na Baguindan sa munisipyo na Tipo-tipo, Basilan.

[Sumpat no nia a tudtul - click ka so nia a link]:
http://maguindanaonetwork.webs.com/apps/blog/show/25735746-biaf-inatak-na-afp-natalsak-su-ceasefire

Papedsampaya sa katigan kano pageletan o inged endo so talainged.