11/09/2026
SSS CELEBRATES PENSIONERS' DAY
Ginanap ngayong Setyembre 11 ang SSS Pensioners’ Day sa Fynn Boutique Hotel sa City of Bacoor, Cavite, bilang pagkilala sa mga pensionadong Pilipino na patuloy na tumatanggap ng benepisyo at serbisyo mula sa Social Security System (SSS).
Opisyal na nagsimula ang programa dakong alas-9:00 ng umaga sa pangunguna ng host na si Acy Roman. Nagbigay ng pambungad na mensahe si SSS Bacoor Branch Head Monica P. Dino, na nagsabing ang okasyon ay isang selebrasyon para sa mga pensionadong Pilipino na patuloy na pinaglilingkuran ng SSS.
Sinundan ito ng pagbati mula kay SSS Vice President for Luzon South 1 Division Edwin S. Igharas. Bukod sa kaniyang mensahe, nagkaroon din ng maikling palaro at pamamahagi ng ilang regalo mula sa SSS, na nagbigay ng dagdag na saya sa mga dumalo.
Tinalakay naman ni Sheilamarie B. Alconera, Senior Analyst mula sa SSS Bacoor Branch, ang SSS Pension Loan Program. Kabilang sa kaniyang diskusyon ang mga paalala para sa mga aplikante, mga kinakailangang dokumento, loan guidelines, at mga uri ng pensioner na maaaring mag-apply, kabilang ang retirement pensioners at surviving spouse pensioners. Ipinaliwanag din niya ang mga konsepto tulad ng Net Take-Home Pension at Aggregate Monthly Pension, pati na ang iba pang mahahalagang alituntunin sa programa.
Nagbahagi rin ng kanilang “Kuwentong SSS” sina Doris Quizon, na 11 taon nang benepisyaryo ng SSS, at Ruben Manocdo, na 17 taon nang tumatanggap ng benepisyo mula sa ahensya. Ibinahagi nila ang kanilang mga karanasan bilang mga pensioner at benepisyaryo ng SSS.
Matapos ang talakayan, nagkaroon ng maikling Zumba exercise na pinamunuan ni Zumba Instructor Victor, kung saan aktibong nakilahok ang mga pensioner attendees.
Samantala, usaping pangkalusugan naman ang tampok sa “Talk on Health Wellness” na pinangunahan ni Dr. Ehmerald G. De Leon, Medical Specialist II ng SSS Bacoor Medical Evaluation Center. Tinalakay niya ang gout, isang uri ng arthritis na maaaring maranasan ng mga nagkaka-edad. Ipinaliwanag niya ang mga karaniwang sintomas, mga pagkaing maaaring may mataas na purine na dapat limitahan, at mga hakbang na maaaring gawin kapag nakararanas ng sintomas ng gout.
Bahagi rin ng programa ang paggawad ng Certificate of Appreciation sa mga partner at media partner ng SSS na naging bahagi ng programa, kabilang ang Dateline Weekly News.
Mas naging masigla ang pagdiriwang dahil sa iba't ibang palaro at raffle draws para sa mga pensioner na nagmula sa Bacoor, Kawit, at Imus. Marami sa mga dumalo ang nag-uwi ng iba't ibang regalo mula sa SSS.
Nagkaroon din ng mga booth mula sa mga partner ng SSS, kabilang ang Unilab at Dermees, na nagbigay ng karagdagang serbisyo sa mga dumalo, tulad ng blood pressure checking at pagpapakilala ng mga produktong para sa pangangalaga ng balat.
Nagtapos ang programa sa isang simpleng salu-salo para sa mga dumalo, partners, miyembro, at mga opisyal ng SSS mula sa iba't ibang sangay.
Ang SSS Pensioners’ Day ay isang taunang programa na naglalayong kilalanin at bigyang-pugay ang mga pensionadong patuloy na tumatanggap ng serbisyo at benepisyo mula sa SSS. Ngayong taon, bahagi rin ito ng pagdiriwang ng ika-69 na anibersaryo ng Social Security System.
✍ Vida Branson
📷 Chamea Tacayon
