Bagwis-Agham

01/10/2025

𝗞𝗜𝗟𝗔𝗟𝗔𝗡𝗜𝗡 | 𝗣𝗮𝘁𝗻𝘂𝗴𝘂𝘁𝗮𝗻 𝗻𝗴 𝗕𝗮𝗴𝘄𝗶𝘀-𝗔𝗴𝗵𝗮𝗺

Sa bawat salita, larawan, at guhit ay nakaukit ang tatak ng isang patnugutang nakabatay sa katapatan, kahusayan, at paglilingkod sa bayan.

Ngayong taon, muling ibinubuka ng Bagwis-Agham ang kaniyang mga pakpak—pumapailanlang tungo sa higit pang tagumpay at liwanag ng katotohanan.

| Likha ni Frezhia Eunice Minoy

27/09/2025

𝗦𝗔 𝗠𝗚𝗔 𝗟𝗔𝗥𝗔𝗪𝗔𝗡 | 𝗕𝗮𝗴𝗼𝗻𝗴 𝗸𝘂𝗿𝗶𝗸𝘂𝗹𝘂𝗺, 𝗰𝗼𝗱𝗲 𝗼𝗳 𝗰𝗼𝗻𝗱𝘂𝗰𝘁 𝗽𝗶𝗻𝗮𝗴𝘁𝗶𝗯𝗮𝘆 𝘀𝗮 𝗣𝗶𝘀𝗮𝘆-𝗗𝗮𝘃𝗮𝗼; 𝗮𝗴𝗮𝗺-𝗮𝗴𝗮𝗺, 𝗻𝗶𝗹𝗶𝗻𝗮𝘄

Upang higit pang maunawaan ng mga iskolar at kawani ang bagong kurikulum at Code of Conduct, idinaos ng Philippine Science High School System (PSHSS) Executive Committee ang Enhanced Curriculum Town Hall Forum at New Code of Conduct Orientation sa PSHS Southern Mindanao Campus (PSHS-SMC).

Mula ika-19 hanggang ika-20 ng Setyembre, iginiit ng PSHS Office of the Executive Director (OED) at Code of Conduct Committee (CCC) ang layunin ng paaralan na makasabay sa mga pandaigdigang pamantayan.

"We want you to have a competitive and quality STEM education comparable with the best in the Asia Pacific," wika ni Dr. Ronnalee N. Orteza, PSHSS Executive Director.

𝗘𝗻𝗵𝗮𝗻𝗰𝗲𝗱 𝗖𝘂𝗿𝗿𝗶𝗰𝘂𝗹𝘂𝗺

Ipinabatid ni Dr. Orteza sa Town Hall Forum na sinimulan ang bagong kurikulum noong 2024 upang iayon ito sa tatlong piling graduate profile ng mga iskolar: Problem Solver, Ethically Principled, at Lifelong Learner.

Kabilang dito ang pakikipag-ugnayan sa mga research institute para sa mga specialized learning program at pagbibigay-halaga sa independent learning bilang kasanayan ng mga 21st century learner.

Tinalakay rin ang pagbubukas ng mga kursong wika gaya ng Mandarin, German, at Japanese, gayundin ang pagkakaroon ng mga kursong akma sa pang-rehiyong pangangailangan.

Nabaha ng tanong ang forum, lalo na mula sa ika-7 at ika-8 baiting na unang nakararanas ng bagong kurikulum.

Ibinangon ang mga usapin ng mga siksikang pagsusulit, kakulangan ng pasilidad, dami ng asignatura, at apektadong mental health ng mga iskolar.

Binigyang-diin ng OED na taon-taon ay may inaasahang pagbabago at pag-improve sa kurikulum upang manatiling nakaayon sa pangangailangan ng mga mag-aaral.

“Ginagawa natin ito para sa kabataan at para sa bayan,” panghuli ni Dr. Orteza.

𝗖𝗼𝗱𝗲 𝗼𝗳 𝗖𝗼𝗻𝗱𝘂𝗰𝘁

Sa kasunod na Code of Conduct Orientation sa piling mag-aaral, mga magulang, at mga kawani ng PSHS-SMC, tinalakay naman ng PSHSS CCC ang mga nagbago sa mga tuntunin ng disiplina.

Binigyang-diin ni Dr. Orteza na pinaluwag nila ang Code of Conduct, kung saan hindi na maaring mapatigil ang mga mag-aaral dahil lamang sa minor infraction.

"We want you to be disciplined individuals who will be ethically principled. The challenge now is to give you that support, that these guidelines are well-equipped to [help you reach] the expectations we have for you," aniya.

Samantala, tinalakay ni Central Luzon Campus Director Bb. Theresa Anne O. Diaz ng mga bagong tuntunin sa attendance policy, pagsusuot ng uniform, at paggamit ng AI.

Ipinaliwanag naman ni Legal Officer Atty. Edward Herbert S. Escalona ang Rule of Procedure sa pagtugon sa mga disciplinary case.

Bilang panghuli, isiniwalat ni Dr. Orteza at Bb. Diaz na rerepasuhin pa ang Code of Conduct, lalo na sa mga kondisyon ng scholarship termination at non-graduation.

| Sulat nina Alexandrea Gamale at Aubrey Pamaylaon
| Mga larawan nina Zaira Bravo, Francis Gabriel Dangoy, Christine Gomez, at Denzel Heart Hontanosas

26/09/2025

𝗧𝗜𝗡𝗚𝗡𝗔𝗡 | 𝗦𝗼𝗰𝗦𝗰𝗶 𝗯𝗼𝗼𝘁𝗵 𝗳𝗮𝗶𝗿, 𝗹𝗶𝗯𝗿𝗲𝗻𝗴 𝘀𝗼𝗿𝗯𝗲𝘁𝗲𝘀, 𝗶𝗸𝗶𝗻𝗮𝗹𝘂𝗴𝗼𝗱 𝗻𝗴 𝗣𝗶𝘀𝗮𝘆-𝗗𝗮𝘃𝗮𝗼 𝘀𝗮 𝗽𝗮𝗴𝘁𝗮𝘁𝗮𝗽𝗼𝘀 𝗻𝗴 𝗲𝘅𝗮𝗺 𝘄𝗲𝗲𝗸

Matapos ang mapanghamong pagsusulit sa unang markahan, nabigyan ang mga iskolar ng Philippine Science High School Southern Mindanao Campus (PSHS-SMC) ng pagkakataong magsaya sa Social Science (SocSci) Fair at Ice Cream Day noong ika-24 ng Setyembre 2025.

𝗦𝗼𝗰𝗦𝗰𝗶 𝗙𝗮𝗶𝗿 𝟮𝟬𝟮𝟱

Bilang "Civic Engagement and Leadership Project," nagbenta ng iba't ibang produkto ang mga mag-aaral ng ika-12 na baitang sa kani-kanilang mga booth sa SocSci Fair 2025.

Ayon kay Bb. Krishna Zabate, g**o ng Social Science 6, bahagi ng proyekto ang pagtukoy sa mga pangangailangan ng mga komunidad at ang maayos na pagpaplano ng resources.

“We want to produce STEM professionals who are not just intelligent but also have the heart of service and the heart for others,” pahayag niya.

Para kay Biddy Jo Hansh Gaspar ng Grade 12 - Altair, naging mahalaga ang karanasang ito sa paglinang ng core values ng isang estudyante sa PSHS-SMC: katapatan, kahusayan, at paglilingkod sa bayan.

“I learned leadership because I managed all the tasks from start to finish. We also had to plan effectively to reach our target profit, which honed my skills in business and hosting,” aniya.

𝗜𝗰𝗲 𝗖𝗿𝗲𝗮𝗺 𝗗𝗮𝘆

Kasabay ng SocSci Fair, naghandog ang PSHS-SMC Student Government ng libreng sorbetes para sa lahat ng iskolar.

Higit pa sa simpleng pampalamig ang sorbetes; isa itong sagisag ng pagkilala sa pagsusumikap ng bawat estudyante sa kabila ng academic load.

Sa bawat scoop ng sorbetes, nadama ng mga iskolar ang pasasalamat at suporta mula sa pamunuan ng paaralan.

-

𝐌𝐮𝐥𝐚 𝐬𝐚 𝐛𝐚𝐠𝐰𝐢𝐬-𝐚𝐠𝐡𝐚𝐦, 𝐢𝐬𝐚𝐧𝐠 𝐩𝐚𝐠𝐛𝐚𝐭𝐢 𝐬𝐚 𝐦𝐚𝐭𝐚𝐠𝐮𝐦𝐩𝐚𝐲 𝐧𝐚 𝐩𝐚𝐠𝐭𝐚𝐭𝐚𝐩𝐨𝐬 𝐧𝐠 𝐮𝐧𝐚𝐧𝐠 𝐤𝐰𝐚𝐫𝐭𝐞𝐫!

| Sulat ni Mar-Veign-Rouza-Janet Diel at Kena Rose Sancebutche
| Mga larawan nina Zaira Bravo at Francis Gabriel Dangoy

25/09/2025

𝗧𝗨𝗡𝗚𝗛𝗔𝗬𝗔𝗡 | 𝗥𝗼𝗯𝗼𝘁𝗶𝗰𝘀 𝗖𝗵𝗮𝗹𝗹𝗲𝗻𝗴𝗲, 𝗴𝗶𝗻𝗮𝗻𝗮𝗽 𝘀𝗮 𝗽𝗮𝗴𝗯𝘂𝗯𝘂𝗸𝗮𝘀 𝗻𝗴 𝗣𝗶𝘀𝗮𝘆 𝗦𝗺𝗮𝗿𝘁-𝗨𝗽! 𝟮𝟬𝟮𝟱

Opisyal nang sinimulan ang Pisay Smart-Up! 2025 sa Philippine Science High School Southern Mindanao Campus (PSHS-SMC) auditorium noong ika-24 ng Setyembre sa pamamagitan ng Robotics Challenge.

Isinagawa ang Robotics Training sa umaga at Line Tracing Competition sa hapon, kung saan nasungkit ng Precious International School of Davao, Ateneo de Davao Grade School, at Lighthouse Homeschool Network ang mga puwesto para sa final round.

Idinaos din ang Soccerbot Competition, kung saan aabante sa final round ang Lighthouse Homeschool Network, Precious International School of Davao, F. Bangoy Central Elementary School, at Tugbok Central Elementary School.

Ang mga nanalong koponan ay muling maghahanda para sa huling yugto ng kumpetisyon sa event proper ng Smart-Up! Sa SM City Davao Annex, ika-10 ng Oktubre.

| Sulat ni Hayly Venice Diente
| Mga larawan nina Michaella Tiffany Geonanga at Denzel Heart Hontanosas

21/09/2025

𝗡𝗚𝗔𝗬𝗢𝗡𝗚 𝗔𝗥𝗔𝗪 | 𝗜𝗸𝗮-𝟱𝟯 𝗔𝗻𝗶𝗯𝗲𝗿𝘀𝗮𝗿𝘆𝗼 𝗻𝗴 𝗕𝗮𝘁𝗮𝘀 𝗠𝗶𝗹𝗶𝘁𝗮𝗿

Noong ika-21 ng Setyembre 1972, idineklara ni dating Pangulong Ferdinand Marcos ang Batas Militar sa pamamagitan ng Proklamasyon Blg. 1081.

Ito’y naging panahon ng paglabag sa karapatang pantao, panunupil sa malayang pamamahayag, at katiwalian sa pamahalaan.

Huwag nating kalimutan ang madilim na kabanatang ito ng ating kasaysayan—ang hindi natututunang aral ay paulit-ulit na nangyayari.

Ngayon, higit kailanman, kinakailangan nating maging mapanuri, mausisa sa mga anomalya, at matapang na gamitin ang ating mga tinig upang ipaglaban ang katotohanan at katarungan.

| Sulat at Likha ni Alexandrea Gamale

13/09/2025

𝗧𝗨𝗡𝗚𝗛𝗔𝗬𝗔𝗡 | 𝗛𝗢𝗡𝗠𝗢𝗢𝗡 𝗦𝗘𝗔𝗟𝗘𝗗: 𝗣𝗶𝘀𝗮𝘆-𝗗𝗮𝘃𝗮𝗼, 𝗶𝗽𝗶𝗻𝗮𝗺𝗮𝗹𝗮𝘀 𝗮𝗻𝗴 𝗵𝘂𝘀𝗮𝘆 𝘀𝗮 𝗽𝗮𝗴𝗸𝗮𝗻𝘁𝗮, 𝗽𝗮𝗴𝘀𝗮𝘆𝗮𝘄 𝘀𝗮 𝘂𝗻𝗮𝗻𝗴 𝗰𝗮𝗺𝗽𝘂𝘀-𝘄𝗶𝗱𝗲 𝘄𝗲𝗹𝗹𝗻𝗲𝘀𝘀 𝘀𝗲𝘀𝘀𝗶𝗼𝗻

Upang pasiglahin ang mga iskolar bago ang hell week, nag-organisa ang Teen Center ng Philippine Science High School Southern Mindanao Campus (PSHS-SMC) ng K-Pop random dance at karaoke sessions sa Quadrangle at Mini Auditorium noong ika-12 ng Setyembre 2025.

Ayon kay Krishna Jazz Ares, Presidente ng Teen Center, ang nasabing aktibidad ay bahagi ng mga hakbang upang maipakita sa mga mag-aaral ang tunay na layunin ng Wellness Period.

"We want to promote the campaign of well-being on campus. Maraming nagsasabing walang silbi ang Wellness Period, kaya sa pamamagitan ng inisyatibang ito, nais naming ipabatid ang tunay na layunin nito at kung paano ito magagamit nang mabuti, especially before we face our projects and exams," aniya.

Dagdag pa niya na marami pang aktibidad ang aabangan sa hinaharap, alinsunod ng pagpapatupad ng Wellness Period ngayong taong panuruan.

| Sulat nina Alexandrea Gamale at Hayly Venice Diente
| Mga larawan nina Denzel Hontanosas at Francis Dangoy

11/09/2025

𝗦𝗔 𝗠𝗚𝗔 𝗟𝗔𝗥𝗔𝗪𝗔𝗡 | 𝗣𝗶𝘀𝗮𝘆 𝗗𝗮𝘃𝗮𝗼, 𝗻𝗮𝗸𝗶𝘀𝗮𝗺𝗮 𝘀𝗮 𝗡𝗮𝘁𝗶𝗼𝗻𝘄𝗶𝗱𝗲 𝗦𝗶𝗺𝘂𝗹𝘁𝗮𝗻𝗲𝗼𝘂𝘀 𝗘𝗮𝗿𝘁𝗵𝗾𝘂𝗮𝗸𝗲 𝗗𝗿𝗶𝗹𝗹

Aktibong nakilahok ang mga iskolar at kawani ng Philippine Science High School – Southern Mindanao Campus (Pisay Davao) sa isinagawang Nationwide Simultaneous Earthquake Drill para sa ikatlong kuwarter ng taong ito, ngayong ika-11 ng Setyembre 2025.

Alinsunod sa Memorandum No. 027, s. 2025 na inilabas ng National Disaster Risk Reduction and Management Council (NDRRMC), inaasahan ang lahat ng paaralan at institusyon sa bansa na makiisa sa naturang aktibidad bilang bahagi ng patuloy na kampanya para sa kahandaan sa sakuna at kaligtasan ng bawat Pilipino.

Pinaaalalahanan ang lahat na maging ligtas, handa, at mapagmatyag sa anumang oras ng kalamidad.

| Sulat ni Aubrey Pamaylaon
| Mga larawan nina Denzel Hontanosas, Francis Dangoy at Kryst Toledo

06/09/2025

𝗧𝗜𝗡𝗚𝗡𝗔𝗡 | 𝗛𝗼𝗹𝗶𝘀𝘁𝗶𝗰 𝗱𝗲𝘃'𝘁 𝗻𝗴 𝗶𝘀𝗸𝗼𝗹𝗮𝗿, 𝘁𝘂𝗻𝗴𝘂𝗵𝗶𝗻 𝗽𝗮 𝗿𝗶𝗻 𝗻𝗴 𝗣𝗶𝘀𝗮𝘆-𝗗𝗮𝘃𝗮𝗼

Idinaos ang SCALE (Service, Creativity, Action, at Leadership Enhancement) Fair 2025 noong ika-5 ng Setyembre sa PSHS-SMC gymnasium.

Layunin ng programa na ipakilala ng mga mag-aaral mula sa ika-11 at ika-12 na baitang ang kanilang iba't ibang adbokasiya at organisasyong nakatutulong sa mas malawak na komunidad sa labas ng paaralan.

"The values that helps us scholars to grow not only academics, but also in character, leadership, and service to others. Today's fair is not only a celebration of these values, but also an opportunity to ignite inspiration among our younger baches as they prepare for their own LeAP journey," pahayag ni Senior Vice President Mariel Tagimacruz sa kaniyang Pambungad na Pananalita.

Ngayong taon, nilahukan ng 16 na organisasyon ang SCALE Fair.

BeadaYarn – Gumagawa ng beaded accessories upang mapakain at mapangalagaan ang mga pusa ng Pisay.

Dreamscapes – Lumilikha ng mga handicraft and beaded accessories para masuportahan ang Field of Dreams Orphanage.

Project Kahayag – Kumikita sa pagbebenta ng stickers at keychains upang makatulong sa pagpapalaganap ng edukasyon sa isang bahay-ampunan.

GalaXsikat – Nagtuturo ng astronomiya sa mga mag-aaral ng ika-5 at ika-6 na baitang.

SIKHAY Media and Current Affairs – Nakatuon sa paggawa ng mga dokumentaryo at de-kalidad na media upang maiangat ang produksyong Pilipino.

Scholars of Hope – Naglalayong hubugin ang pananagutan ng mga iskolar upang magbalik sa komunidad at mapaunlad ang empatiya at pagpapahalaga.

Project Tassah – Nagtuturo ng literacy, comprehension, at journalism sa mga estudyante ng Sta. Clara Elementary School.

Project Delta – Nagtuturo ng digital literacy at cognitive skills sa mga bata, kabilang na ang paggamit ng Word at Excel.

Create-a-Zine – Bumubuo ng digital at pisikal na kalipunan ng literatura at panitikang inilikha ng mga iskolar.

Project Hayagmaon – Nagtuturo ng values education sa mga mag-aaral ng Padaman Madrasah Al-Islamie Inc.

Happy Hookers Company – Gumagawa ng handmade crochet pieces.

Kanlungan – Naglalayong palawakin ang kaalaman ng publiko tungkol sa ADHD at autism.

Aruga – Nagtuturo ng sining at crafts sa mga benepisyaro—Pahiyom para sa matatanda at Pagpangga para sa mga bata.

CSNX – Para sa gustong matuto ng coding at computer science; may iba’t ibang gawain tulad ng technical skills training, competitive coding workshop, at e-sports tournament.

Likharal – Nagtuturo ng Matematika, Agham, Ingles, at Filipino sa mga mag-aaral ng iba't ibang elementarya sa Davao City.

Project AJA! – Isang environment sustainability movement para sa komunidad ng Sama-Bajau.

Sa pagtatapos ng SCALE Fair 2025, hindi lamang sipag, talino, at malasakit ang ipinamalas ng mga iskolar, kundi nagbigay-inspirasyon din sila upang makapagsimula ang ika-9 at ika-10 na baitang sa kani-kanilang LeAP (Leadership and Advocacy Program) journey.

| Sulat nina Mar-Veign-Rouza-Janet Diel at Kena Rose Sancebutche
| Mga larawan nina Christine Gomez, Francis Gabriel Dangoy, Denzel Heart Hontanosas, at Rhaizyll Clyte Giltendez

31/08/2025

𝗣𝗔𝗡𝗢𝗢𝗥𝗜𝗡 | 𝗕𝘂𝘄𝗮𝗻 𝗻𝗴 𝗪𝗶𝗸𝗮 𝗦𝗮𝗺𝗲-𝗗𝗮𝘆 𝗘𝗱𝗶𝘁, 𝗵𝗮𝘁𝗶𝗱 𝗻𝗴 𝗦𝗜𝗞𝗛𝗔𝗬

Send a message to learn more

30/08/2025

𝗣𝗔𝗚𝗧𝗔𝗧𝗔𝗣𝗢𝗦 | 𝗣𝗶𝘀𝗮𝘆-𝗗𝗮𝘃𝗮𝗼, 𝗺𝗮𝘁𝗮𝗴𝘂𝗺𝗽𝗮𝘆 𝗻𝗮 𝗶𝗽𝗶𝗻𝗮𝗴𝗱𝗶𝗿𝗶𝘄𝗮𝗻𝗴 𝗮𝗻𝗴 𝗕𝘂𝘄𝗮𝗻 𝗻𝗴 𝗪𝗶𝗸𝗮 𝟮𝟬𝟮𝟱

Sa temang "Sa Paglinang sa Filipino at Katutubong Wika: Makasaysayan sa Pagkakaisa ng Bansa," masaya ang naging kulminasyon ng Buwan ng Wika 2025 sa Philippine Science High School Southern Mindanao Campus (PSHS-SMC) ngayong ika-29 ng Agosto.

Matapos ipinamalas ng mga iskolar ang kanilang galing at talino sa iba't ibang patimpalak, nakasungkit ang iilan ng mga gantimpala.

𝗟𝗮𝗿𝗼 𝗻𝗴 𝗟𝗮𝗵𝗶

Sa larong Sipa Takyan, ang Panahon ng Kastila (Baitang 7) ang nagwagi ng unang gantimpala. Sinundan naman ito ng Panahon ng Hapon (Baitang 9) sa ikalawang gantimpala at Panahon ng Kasalukuyang Panahon (Baitang 10) sa ikatlong gantimpala.

Samantala, sa larong Kadang-kadang at Luksong Lubid ay nakasungkit ng unang gantimpala ang Panahon ng mga Amerikano (Baitang 12), na siyang sinundan naman ng Panahon ng Unang Republika (Baitang 11) at Panahon ng Hapon.

𝗣𝗮𝗴𝗹𝗶𝗸𝗵𝗮 𝗻𝗴 𝗙𝗮𝗰𝗲𝗯𝗼𝗼𝗸 𝗙𝗿𝗮𝗺𝗲

Para naman sa Paglikha ng Facebook Frame, ginawaran ng unang gantimpala ang Panahon ng Unang Republika para sa kanilang walang kaparis na pagkamalikhain, kasunod ang Panahon ng Kastila at Panahon ng Amerikano.

𝗟𝗮𝗸𝗮𝗻 𝗮𝘁 𝗟𝗮𝗸𝗮𝗺𝗯𝗶𝗻𝗶

Sa Lakan at Lakambini ng Wika 2025, ang kaluluwa ng Buwan ng Wika, binigyang-pugay ang mga kalahok na tunay na nagpakita ng angking talino, talento, at pagmamahal sa wika at kultura ng Pilipinas.

Itinanghal na panalo ang Lakambini ng Panahon ng Unang Republika at Lakan ng Panahon ng Hapon bilang Pinakamahusay na Pagpapakilala.

Ang makapanindig-balahibo na talento ng Lakan at Lakambini ng Panahon ng Hapon ang nakapagpanalo sa kanila sa Pinakamahusay na Talento.

Samantala, ang mahusay na mga adbokasiya naman ang nakapagpawagi sa Lakan at Lakambini ng Panahon ng Amerikano bilang Pinakamahusay na Adbokasiya.

Nang sa gayon, napunta ang korona ng Lakambini ng Wika 2025 sa Panahon ng Amerikano. Pumangalawa naman ang Kasalukuyang Panahon, habang Pumangatlo ang Unang Republika.

Sa kabilang dako, itinanghal na Lakan ng Wika 2025 ang kalahok mula sa Panahon ng Hapon. Nakasungkit naman ng pilak ang Panahon ng Amerikano at tanso ang Panahon ng Kasalukuyan.

Batay sa mga nalikom na puntos sa mga patimpalak, hinirang na kampeon ang Baitang 12, ikalawang puwesto ang Baitang 11, at ikatlong puwesto ang Baitang 9.

Bilang pagtatapos sa selebrasyon, binigyang-diin ni Bb. Justine Aubry Galan ang halaga ng wika sa pagbubuklod ng bayan.

"Hindi lamang sa Buwan ng Agosto ang paggamit ng Filipino at katutubong wika, [ito] ay kailangang linangin sa araw-araw na buhay para magkaroon tayo ng pagkakaisa," pagtatapos niya.

Higit pa sa mga napanalunang gantimpala at mga parangal, pinatunayan ng mga mag-aaral ngayong Buwan ng Wika 2025 na buhay na buhay ang wika at kultura ng mga Filipino na handang isulong ng mga kabataan hindi lamang sa loob ng paaralan, kundi tungo na rin sa kanilang kinabukasan.

| Sulat ni Kathleen Rose Pasaol
| Mga larawan ni Kryst Irle Toledo

30/08/2025

𝗧𝗜𝗡𝗚𝗡𝗔𝗡 | 𝗔𝗱𝗯𝗼𝗸𝗮𝘀𝗶𝘆𝗮 𝘀𝗮 𝘄𝗶𝗸𝗮 𝗮𝘁 𝗯𝗮𝗻𝘀𝗮, 𝘁𝗮𝗺𝗽𝗼𝗸 𝘀𝗮 𝗟𝗮𝗸𝗮𝗻 𝗮𝘁 𝗟𝗮𝗸𝗮𝗺𝗯𝗶𝗻𝗶 𝟮𝟬𝟮𝟱 𝗻𝗴 𝗣𝗶𝘀𝗮𝘆-𝗗𝗮𝘃𝗮𝗼

Nagningning ngayong hapon ang gymnasium ng Pisay-Davao sa pagdaraos ng Lakan at Lakambini bilang bahagi ng selebrasyon ng Buwan ng Wika 2025.

Ipinamalas ng mga kumakatawang pares ang talento nila sa pagsayaw, pagkanta, at pag-arte sa temang nakabatay sa iba’t ibang yugto ng kasaysayan mula pa Panahon ng Katutubo hanggang sa Kasalukuyan.

Ngunit higit sa sining, tampok ngayong taon ang paninindigan. Sa halip na tradisyunal na Q&A, naghain ang bawat kalahok ng talumpati na nagsusulong ng kani-kanilang adbokasiya.

Tinalakay ng mga kalahok ang katiwalian, kahirapan ng mga magsasaka, at dekalidad na edukasyon.

Umani ng sigla ang bawat pahayag, kasabay ng mensahe na ang pagmamahal ng mga Pilipino ay hindi naglalaho ano man ang panahon. Isa ang sigaw mula kahapon, hanggang ngayon, at para sa susunod na henerasyon.

Nagsilbing patunay ang patimpalak na ang ating wika ay hindi lamang kasangkapan ng komunikasyon, kundi tinig ng pagkilos at pagkakaisa ng sambayanan.

| Sulat ni Estelle Zoe Athena Maturan
| Mga larawan nina Francis Gabriel Dangoy, Denzel Heart Hontanosas at Christine Gomez

30/08/2025

𝗦𝗔 𝗠𝗚𝗔 𝗟𝗔𝗥𝗔𝗪𝗔𝗡 | 𝗞𝗮𝘀𝘂𝗼𝘁𝗮𝗻 𝗮𝘁 𝗽𝗮𝗴𝗸𝗮𝗺𝗮𝗹𝗶𝗸𝗵𝗮𝗶𝗻𝗴 𝗙𝗶𝗹𝗶𝗽𝗶𝗻𝗼, 𝘁𝗮𝗺𝗽𝗼𝗸 𝘀𝗮 𝗽𝗮𝗴𝘀𝗶𝘀𝗶𝗺𝘂𝗹𝗮 𝗻𝗴 𝗕𝘂𝘄𝗮𝗻 𝗻𝗴 𝗪𝗶𝗸𝗮

Kaakibat ng pagbabalik-tanaw sa iba’t ibang yugto ng kasaysayan ng Pilipinas, masiglang binuksan ang kulminasyon ng Buwan ng Wika sa Philippine Science High School Southern Mindanao Campus (PSHS-SMC) noong ika-29 ng Agosto taong 2025.

Nagsimula ang selebrasyon sa Parada ng Kasuotan, kung saan itinampok ng mga iskolar, g**o, at kawani ang iba't ibang tradisyunal na kasuotan sa Panahon ng Katutubo, Panahon ng Kastila, Panahon ng Amerikano, Panahon ng Hapon, Panahon ng Unang Republika, at Kasalukuyang Panahon.

Sunod namang naghatid ng Pambungad na Pananalita si Dr. Jonald Fenecios, ang Direktor ng PSHS-SMC.

"Nawa'y maging inspirasyon ang pagdiriwang na ito upang lalo pa nating mapahalagahan, gamitin, at ipasa sa susunod na henerasyon ang ating sariling wika," inihayag niya.

Bilang pagpapakilala at pagpapaliwanag sa Pista sa Nayon Booths, itinanghal naman ng bawat baitang ang kani-kanilang mga spiel sa madla at sa mga hurado.

| Sulat ni Hayly Venice Diente
| Mga larawan nina Francis Gabriel Dangoy, Rhaizyll Clyte Giltendez, Christine Gomez, Denzel Hontanosas, Kryste Irle Toledo, at Shainlee Dyla Adeva