26/01/2024
LANTAW: 8 anyos nga batang lalaki, kritikal human gilambos sa iyang amahan sa General Santos City!
Anaa karun sa kritikal nga kahimtang ang usa ka 8 anyos nga batang lalaki human gikatahong gilambos sa iyang kaugalingong amahan kagahapong adlawa, Enero 23, 2024 sa Purok Templano, Barangay Fatima, General Santos City.
Giila ang biktima nga si Yuri, 8 anyos, grade 2 pupil ug lumulupyo sa naasoy nga dapit. Samtang ang suspek nga amahan sa bata giila nga si Roy, 33 anyos.
Sigon sa taho, aduna matud pay gisugo ang amahan sa biktima samtang kini nag-inum sa ilimnong makahubog apan wala mituman ang bata ug tungod sa iyang kasuko iya kining giaswat ug gilambos.
Tungod niini, nakaangkon ug mga bali sa kalawasan ang biktima nga misangpot sa kritikal nga kondisyon.
Daling gidala sa balay tambalanan ang bata samtang ang suspek ang anaa balhog sa Fatima Police Station.
Matud pa sa iyaan sa bata nga dili lang kini ang unang higayon nga gipasakitan sa suspek ang iyang mga anak.
Nasayran usab nga bisan ang duha ka igsuon ni Yuri ang nakasinati usab sa pagpasakit sa ilang amahan.
Bulag na matud pa ang inahan ug amahan sa bata ug atoa kini sa Manila.
Desidido karun ang pamilya nga pasakaan ug kaso ang suspek aron mahatagan ug hustisya ang gidangatan sa biktima.
