04/02/2025
Sige’g saad mubayad og utang, gipuspusan
Napiang ug dakong lakra sa lawas ang nahiaguman sa usa ka drayber human gibunalan sa naningil og utang sa Basak, San Nicolas, Cebu City.
Sa report sa kapolisan, napungot na, matod pa, ang suspek nga si alyas Benito ngadto sa biktima nga si alyas Jun-jun, nga sige’g saad nga mubayad apan wala gyud mituman sa iyang obligasyon.
Sa interbyu sa Brigada Cebu ngadto kang Benito, iyang gisaysay nga duha na ka bulan nga wala kabayad si Jun-jun sa iyang giutang nga plywood, ug kada paningil, igo ra musaad.
Nagpadulong, matod pa, sa komprontasyon ang maong paningil ni Benito, ug sumala pa niya, midepensa lang siya kay mipunit na og tubo si Jun-jun.
Mitagumbol ang kabilya sa lawas sa biktima human gipuspusan sa suspek.
Nag-atubang karon og kasong physical injury ang naningil og utang.
