31/05/2026
TURISTA NALUWAS HUMAN MAHULOG SA WHITE SAND SA MT. APO
DIGOS CITY β Usa ka 37 anyos nga babaye nga turista gikan sa Quezon City ang naluwas ug nadala sa ospital human mahulog sa bahin sa White Sand sa Mt. Apo atol sa iyang pagsaka sa bukid niadtong Mayo 30, 2026.
Base sa report nga nadawat sa City Disaster Risk Reduction and Management Office (CDRRMO) sa Digos City bandang alas-9:00 sa buntag gikan sa personnel sa DENR Kapatagan, ang biktima nga nailhang si Glaiza Prencipe nahulog human nag-patong sa usa ka bato ug kalit siya nga naapektuhan sa kusog nga hangin. Tungod niini, nahulog siya ngadto sa usa ka pangpang nga gibanabanaang adunay gitas-on nga kapin o kulang 30 metros.
Dihang nadawat ang impormasyon, gilayon nga gipalihok sa City Government of Digos ubos sa pagpangulo ni Mayor Josef F. Cagas ang mga responder sa CDRRMO aron motabang sa rescue operation. Nakigtinabang usab ang lokal nga kagamhanan sa Digos sa LGU Sta. Cruz pinaagi sa Municipal Disaster Risk Reduction and Management Office (MDRRMO) tungod kay ang biktima usa ka bisita nga turista sa maong lugar ug giagian sa Digos Trail nga gigamit sa mga tour guide gikan sa Sta. Cruz alang sa mas paspas nga pagdala kaniya ngadto sa medikal nga pasilidad.
Ang rescue operation gihimo sa hiniusang paningkamot sa mga personnel sa CDRRMO Digos ug sa Special Rescue Force (SRF) sa Bureau of Fire Protection (BFP), nga dali nga mitubag sa nahitabo aron mahatagan dayon og tabang ang biktima.
Human sa operasyon, malampusong nadala si Prencipe ngadto sa Digos Doctors Hospital diin siya nahatagan og medikal nga pag-atiman. Sumala sa report, stable na ang kahimtang sa biktima sa dihang nakaabot siya sa ospital bandang alas-12:45 sa kaadlawon sa Mayo 31, 2026.
Courtesy πΈ| City DRRMO Digos
!
