19/11/2025
𝐀𝐅𝐏 𝐊𝐔𝐒𝐆𝐀𝐍𝐎𝐍𝐆 𝐆𝐈𝐊𝐎𝐍𝐃𝐄𝐍𝐀 𝐀𝐍𝐆 𝐏𝐀𝐆𝐓𝐔𝐈𝐒 𝐒𝐀 𝐕𝐈𝐃𝐄𝐎 𝐍𝐈𝐋𝐀 𝐊𝐀𝐍𝐇𝐈 𝐇𝐒 𝐑𝐎𝐌𝐔𝐀𝐋𝐃𝐄𝐙 𝐔𝐆 𝐊𝐀𝐍𝐇𝐈 𝐀𝐂 𝐙𝐀𝐋𝐃𝐘 𝐂𝐎
KUSGANONG gikondena sa Armed Forces of the Philippines ang pagtuis ug tinuyo nga pag-usab sa karaang video ni kanhi House Speaker Martin Romualdez ug kanhi Appropriations Chair Zaldy Co, diin ilang gituki ang pag-umento sa subsistence allowance sa mga sundalo gikan sa ₱150 ngadto sa ₱350.
Sa nasangpit nga video, nga kuha niadtong Disyembre 11, 2024, ang adlaw nga giaprobahan sa Kongreso ang umento sa allowance sa mga sundalo, si Co ug Romualdez makita nga giingong nag-video call sa AFP Chief of Staff General Romeo Brawner Jr.
Apan, sa usa ka pahayag, giklaro sa Armed Forces nga usa kini ka diskusyon bahin sa reporma nga gipangayo ni Brawner gikan kang Presidente Ferdinand Marcos Jr. alang sa "long overdue" nga pagtaas sa subsistence allowance sa mga personnel sa AFP.
Kini human personal nga gipangutana sa Presidente si Gen. Brawner niadtong Disyembre 2023 kon unsaon niya pagtabang ang mga sundalo ug dinhi nihangyo ang AFP Chief nga usbawan ang allowance tungod kay dili na paigo ang P150 kada adlaw sa pagkaon sa mga sundalo.
Apan, siya miingon nga ang mga destabilizer nagtuis niini aron makita nga ang AFP gipalit, kontrolado, o nakompromiso.
Ang Armed Forces miinsistir nga ang maong asoy dili tinuod ug kini usa ka insulto sa mga sundalo.
Matod niya walay political bargaining, walay binayloay nga pabor, ug walay paglapas sa integridad sa institusyon.
Giklaro usab sa Armed Forces nga ang AFP dili sakop sa bisan unsang politikanhong personalidad ug nagpabiling maunongon sa Konstitusyon ug sa katawhan.
Matud niya patas ang dugang P200 nga allowance tungod kay dugay na kining gipaabot nga suporta sa mga sundalo.
Giingon usab sa AFP nga adunay mga grupo nga iresponsable nga gigamit ang daan nga video aron magsabwag og pagduhaduha ug pag-destabilize, busa gipasidan-an ang mga nagpakaylap og bakak nga mga asoy nga hunongon ang pagguyod sa AFP sa mga teatro sa politika.
Sa katapusan, ang Armadong Kusog miinsister nga dili gyud mapalit ang dignidad ug integridad sa mga sundalong Pilipino.
𝗟𝗶𝗸𝗲, 𝗦𝗵𝗮𝗿𝗲 & 𝗙𝗼𝗹𝗹𝗼𝘄
95.9 RADYO DE TURBO
