15/12/2022
SIM CARD REGISTRATION, IPATUMAN KARONG DISYEMBRE 27
Nangandam na ang mga kompanya sa telecommunications sa pagsugod sa ilang tagsa-tagsa ka mga SIM registration portals sa mga mosunod nga semana, samtang ibaligya ang mga bag-ong SIM cards nga anaa sa "deactivated mode."
Ipatuman ang mandatory rules bahin sa maong pagrehistro sa Disyembre 27 karong tuiga.
Gi-isyu sa National Telecommunications Commission (NTC) ang implementing rules alang sa SIM Registration Act niadtong Lunes, Disyembre 12, 2022.
Ang maong balaod nag-require sa tanang mobile subscribers sa pagrehistro sa ilang SIM cards sulod sa 180 ka adlaw o unom ka bulan gikan sa pag-epekto sa maong balaod o mag-atubang og automatic deactivation ang ilang mga cards.
Mahimong ma-reactivate kini apan sulod lamang sa lima ka adlaw, matod pa sa balaod.
Buhaton ang SIM registration pinaagi sa usa ka secure platform o website nga ihatag sa telecommunications company.
Kinahanglan nga mohatag ang individual users sa ilang full name, date of birth, s*x, address ug valid government ID o susamang mga dokumento nga aduna'y litrato, samtang ang business users kinahanglang mohatag sa business name, business address ug full name sa authorized signatory.
Ang mga foreigners, kinahanglan nga mohatag sa ilang personal data apil na sab ang passport information ug ilang address.
Isyuhan og SIM card nga valid sa 30 ka adlaw ang mga nibisita sa nasud isip turista, diin mahimo kining i-extend sa dihang mopresentar sila sa ilang approved visa extension. Ang mga foreigners nga aduna'y ubang klase sa visa mahimong makakuha sa SIM card nga wala'y 30-day validity period.
| with reports from INQUIRER.net
