05/08/2025
LALAKI SAMARAN HUMAN GIPUSIL SA ZAMBOANGUITA GABIE
Samaran ang usa ka lalaki human kini pusila didto sa Brgy Poblacion, Zamboanguita Negros Oriental, pasado alas 8 gabie, Lunes, Agosto 4.
Ang biktima naila nga si Norway Eluna, hingkod ang pangidaron, minyo ug molupyo sa naasoy nga dapit.
Samtang sa pagluwat niining balita, blanko pa ang kapulisan sa pagkatawo sa suspect kinsa gikataho nga nagmaneho og motorsiklo, nagsul-ob og itom nga jacket, denim nga pantalon, ug dirty white nga helmet.
Taho sa Zamboanguita Municipal Police Station nagkanayon, nahitabo ang insidente 8:22 sa gabie samtang nag-lakaw paingon sa iyang balay ang biktima diin pipila lamang ka lakang gikan sa highway.
Nakabantay matod pa ang biktima dihang iyang nakita ang suspek nga duna kini dautang plano batok kaniya, hinungdan nga paspas kining nidalagan paingon sa bakante nga luna nga anaa sa 200 metros ang distansya gikan sa iyang balay.
Apan nasundan gihapon kini sa suspek kinsa nagsakay ug kalit nga nihulbot sa wa matino nga pi***la og dayong gipusil ang biktima sa pipila ka higayon.
Gumikan kay nakadalagan palayo ang biktima, natipsingan lamang sa bala ngadto sa abaga ang biktima.
Human sa pagpamusil, paspas nga nisibat ang suspitsado paingon sa habagatan nga direksyon.
Samtang dali usab nga nakaresponde sa alarma ang Zamboanguita PNP ug sa tabang sa rescue team, nadala gilayon sa balay tambalanan ang biktima.
Narekuber sa crime scene ang usa ka kabhang sa kalibre .45 nga pi***la, duha ka fired deformity bullets sa wa pa matino nga kalibre sa armas de fuego, ug duha ka buhing bala sa kalibre .45.
Lakip sa narekuber sa kapulisan sa maong dapit mao ang 4 ka kabhang sa caliber 9mm ug usa ka kabhang sa wa pa matino nga kalibre sa armas.
Nunot niini, gikasa karon sa kapulisan ang Oplan Tambayayong, ingon man gisulayan usab niini karon pag kolekta ang mga cctv footage duol sa crime scene aron maila ang suspitsado.
Blanko pa hinuon ang kapulisan sa motibo sa krimen. | Yett Calulot
photos collage: Zambo PNP
